আপডেট:
image

সৌদি আরবিয়ানা মেসিগী গোল হন্দোক্তুনা আর্জেন্টিনাবু ২-১দা মায়থীবা পীখ্রে        

কাতার, নভেম্বর ২২ : সৌদি আরবিয়াগী অনীশুবা হাফটা চনখিবা গোল অনীগী মতেংনা লিওনেল মেসিগী গোল হন্দোক্তুনা ২-১ দা ঙসি লুসেল ষ্টেদিয়ামদা শান্নখিবা গ্রুপ সী গী মেটচ অমদা মায়থীবা পীদুনা আর্জেন্টিনাবু ফিফা ৱার্ল্ড কাপ ২০২২ কেম্পেইনগী হৌরকপদা চাওনা নীংহন্নবা পোকহনখ্রে। মেটচ অসিগী শান্নবা হৌরকপা কুইদ্রিঙৈ রেফারিনা আর্জেন্টিনাগী ফেভারদা পীখিবা পেনাল্টি অমা মেসিনা শান্নবগী ১০ শুবা মিনিটতা গোল ওন্থোক্তুনা ঙন্না সৌদি আরবিয়াবু ১-০ দা লীড তৌখি। স্পোট কিক্ গোল অদুনা মেসিবু তোঙান-তোঙানবা ৱার্ল্ড কাপ ৪ দা গোল চনবা ঙম্বা আর্জেন্টিনাগী অহানবা শান্নরোয় ওইবা ঙমখি।

অনীশুবা হাফতা সারেহ আল-শেহরি অমদি সালেম আল-দোসারিনা নাইতোম চনখিবা ফজবা গোলশিংগী মতেংনা সৌদি আরবিয়ানা আর্জেন্টিনাবু ২-১ দা মাংজিল থাকি। আল-শেহরিনা অনেম্বা শট অমা শান্নবগী ৪৮ শুবা মিনিটতা গোল ওন্থোকখি। অদুগা আল-দোসারিনা পেনাল্টি বোক্স মতোন্দগী শাফূ কন্না কাওশিল্লকখিবা বোল অমা শান্নবগী ৫৩ শুবা মিনিটতা গোল ওন্থোক্তুনা আর্জেন্টিনাবু অৱাবা নংহনখিবনি।

ঙসি মেটচ রিজাল্ট অসিনা ইটালিদা পাঙথোকখিবা মমাংগী ইন্টারনেশনেল রেকোর্দতা আর্জেন্টিনানা গেম ৩৭ শান্নবগী মনুঙদা ৩৬ মায়থীদনা লাকপগী লমজেল লেপহনখ্রে। অমরোমদা, ঙসি নোংয়াই মতুংদা আহমদ বিন অলি ষ্টেদিয়ামদা শান্নখিবা গ্রুপ বি-গী মেটচ অমদা ভেটরান ষ্ট্রাইকার গেরেথ বেলনা অথেংবদা চনখিবা পেনাল্টিগী মতেংনা ওয়েলসনা য়ু এস এগা ১-১দা দ্রো ওইখ্রে।

য়ুএসএগী টিমোথি উইনা অহানবা হাফকী শান্নবগী ৩৬ শুবা মিনিটতা ওপেনিং গোল চনশিন্দুনা ওয়েলসপু ১-০দা লীড থৌখি। মেটচ লোইরমদাই গেরেদ বেল পুশিল্লকখিবা বোল অমা য়ুএসকী দিফেন্ডার টিম রিমনা ১৮ য়ার্দ বোক্স মনুঙদা ফাউল তৌরবদগী রেফারিনা ওয়েলসকী ফেভারদা পেনাল্টি অমা পীখি। স্পোটকিক্ অদু গেরেথ বেলনা শান্নবগী ৮২ শুবা মিনিটতা গোল ওন্থোক্তুনা ইক্কেলাইজ গোল চনবা ঙমখিবনি।

অমারোমদা, এদ্যুকেসন সিটি ষ্টেদিয়ামদা শান্নখিবা গ্রুপ ডি-গী মেটচতা দেনমার্ক অমদি তিউনিশিয়া গোল অমত্তা চন্নদনা দ্রো ওইখ্রে। অতোপ্পা ষ্টেডিয়াম ৯৭৪ দা গ্রুপ সী-গী ওইনা শান্নখিবা মেটচ অমদা মেক্সিকো অমদি পোলেন্দ ০-০ দা দ্রো ওইখ্রে।

সোর্স: হুইয়েন লানপাউ

0 কমেন্ট:

কমেন্ট তৌবিয়ু

আপনার ইমেইল ঠিকানা প্রচার করা হবে না. প্রয়োজনীয় ক্ষেত্রগুলি চিহ্নিত করা আছে *

পাউ অতৈসু