ত্রিপুরাগী ক্ষেত্রিময়ুম মাধবীদা 'থিয়াম ইবোচৌবি নেশনেল এৱার্ড- ২০২৬'
আগরতলা, ওক্টোবর ০১ : ইন্টারনেশনেল ট্রান্সলেশন দে’ নুমিৎকা মরী লৈননা ঙরাং সেপ্টেম্বর ৩০, ত্রিপুরাগী শক্নাইরবী কলচরেল এক্টিভিস্ট শৈশকপী অইবী ক্ষেত্রিময়ুম মাধবী সিংহদা 'থিয়াম ইবোচৌবি নেশনেল এৱার্ড- ২০২৬' পিদুনা ইকাই খুম্নখ্রে।
সাহিত্য থৌপাং লূপনা শীন্দুনা মণিপুর প্রেস ক্লাব, ইম্ফালদা পাঙথোকখিবা ত্রান্সলেসন ডে থৌরম দা মনা অসি লান্থোকখিবনি। থৌরম অদুদা শরুক য়াখিবা সাথৌলূপকী এদভাইজর অমসুং সাহিত্য একাদেমি এৱাদি শরতচান্দ থিয়ামনা হায়খি, চহী খুদিংগী ইন্তরনেসনেল ত্রান্সলেসন দেগী থৌরম পাংথোকপদা চহী ওল্ল ওল্লগা তোঙান তোঙানবা এৱার্দশিং লান্থোক্লগা লাকখি। মসিগী খোঙচৎ অসিদা ঙসিগী এৱার্দি মাধবী মশামক রোল মোদেল অমনি। মঙোন্দগী তমজনিঙাই ওইবা মায়থোং য়াম্না য়াম্বীনি। ত্রিপুরাদা পোকখিবী মহাক্না মণিপুরী সাহিত্য, মণিপুরী লোল, কলচর ঙাক্তুনা য়ামখ্রবা বেঙ্গলিশিংগী মরক্তা মণিপুরী কৌবা কাঙলুপ অমা লৈরি হায়না ঊৎনবা হোৎনবা হায়বসি য়াম্না চেলেঞ্জিং ওইবা অমনি।
ত্রান্সলেতর অমা ওইনা ত্রিপুরাদা মহাক্লা লৌরিবা থৌদাং অসি য়াম্না চাউই। মাধবীনা মণিপুরবু মশক তাক্নবা হোৎনরিবা অসিদা শকখঙবা ওইনা হায়রিবা নেসনেল এৱার্দ অসি মহাক্কী মফমদা পীবনি হায়না শরতচান্দনা ফোঙদোকখি।
মনা অসিদা সাইটেশন, লেংয়ান অমসুং শেল ওইনা লুপা লিশিং তরা য়াওই। থৌরম অদুদা চীফ গেষ্ট ওইনা এম.এল.এ থাংজম অরুন কুমার সিংহ শরুক য়াখি। সাহিত্য থৌপাং লুপকী প্রেসিডেন্ট তোংব্রম অমরজিৎনা থৌরম মপু ওইরগা গেষ্ট অব অনার ওইনা আরকে নয়ন সানা শরুক য়াখি। থৌরম অদুদা শরতচান্দ থিয়ামনা ওক্না ৱারোল পীখি অদুগা রাহুল হিদাংনা থৌরমগী মরমদা ৱারোল ফোঙখি হায়না ইম্ফালদগী ফংবা পাউদা হায়রি।
সোর্স : মরূপ অমসুং পোক্নফম
0 কমেন্ট:
কমেন্ট তৌবিয়ু