লময়ানবা হিজম ইরাবতকী ১৩০ শুবা মপোক কুমওন থৌরম বাংলাদেশতসু পাঙথোকখ্রে
সিলেট, ওক্টোবর ১ : বাংলাদেশকী মৌলভীবাজার দিষ্ট্রিক্টকী মনুং চনবা কমলগঞ্জ উপজেলা, ভানুবিল খুঞ্জাদা লৈবা মণিপুরী কমপ্লেক্সতা ঙরাং ৩০ সেপ্তেম্বর, ইন্টিগ্রেটেড মণিপুরী এসোসিয়েশন, বাংলাদেশ (ইমা)না শিনলাঙদুনা লময়ানবা হিজম ইরাবতকী ১৩০ শুবা মপোক কুমওনগী নিঙশিং থৌরম অমসুং নৈন মিফম অমা পাংথোকখ্রে।
থৌরমগী অহৌবদা মহৈরোয়শিংনা নেশনেল এন্থেম ( জাতীয় সংগীত) শক্লদুনা বাংলাদেশকী ফীরাল অমসুং মচু তরেৎকী ফীরাল, অমদি ইমা বাংলাদেশকী ফিরাল অথোইবা মীথুংলেন অমদি লুপ অসিগী প্রেসিডেন্টনা চিঙ্খৎখি। মথংদা থৌরম অসিদা লাকখিবা ময়াম্না লময়ানবা হিজম ইরাবতকী মীতম অমসুং কৃষক প্রজা আন্দোলনগী মরু ওইবা থৌদাং লৌরম্বা কাসেম আলীগী মীতমদা হৈকৎ লৈকৎ তমখি।
থৌরমগী অরোইবদা পাংথোকখিবা নৈন মীফম অদুদা ইমা বাংলাদেশ কী প্রেসিডেন্ট অহৈবম রণজিৎনা থৌরম মপু অমসুং মীথুংলেন ওইনা মাইবম বীরেন্দ্র, এডভাইজর, বাংলাদেশ মণিপুরী সাহিত্য সংসদ, কমলগঞ্জ মশা ফুরুপ, কৈসাম মণিন্দ্র, এডভাইজর, বাংলাদেশ মণিপুরী কাং ফেডারেশন শরুক য়াখি।
কৃষ্ণচন্দ্র সরকারী প্রাথমিক বিদ্যালয়গী হেডটিচার এন শান্ত কুমারনা কন্ডাক্ট তৌখিবা মীফম অদুদা অখন্নবা ৱাঙাংলোয় ওইনা ৱা ঙাংখি লৈচোম্বম রাজকুমার, জেনারেল সেক্রেটারী, ইমা বাংলাদেশ, ওইনাম পামহৈবা, জেনারেল সেক্রেটারী, মণিপুরী কল্যাণ পরিষদ, হামোম প্রবিত, জেনারেল সেক্রেটারি, বাংলাদেশ মণিপুরী সাহিত্য সংসদ, কমলগন্জ মশা ফুরুপ, সোশ্যাল এক্টিভিস্ট জয় কুমার সিংহ, সোশ্যাল এক্টিভিস্ট অৱাংতাবম সমরেন্দ্র ।
0 কমেন্ট:
কমেন্ট তৌবিয়ু