ত্রিপুরাগী ডিস্ট্রিক্ট মরিদা খিন্না লৈবা লময়ানবা হিজম ইরাবতকী মীতমদা হৈকৎ-লৈকৎ
আগরতলা, ওক্টোবর ০২ : তোঙান তোঙাননা ত্রিপুরাগী ডিস্ট্রিক্ট মরি অৱাং, নোংচুপ, খোয়াই অমসুং সিপাহীজলাদা খিন্না লৈবা লময়ানবা হিজম ইরাবতকী মীতমদা হৈকৎ লৈকৎ তমদুনা হন্দক চহীগী ১৩০ শুবা মপোক কুমওন থৌরম পাঙথোকখ্রে।
অৱাং জিলাগী ধর্মনগর রাজবাড়ীদা খিন্না লৈবা মপুং ফাবা মীতমদা চহী খুদিং তৌনা হন্দকসু মণিপুরী সাহিত্য পরিষদ, নর্থ ডিস্ট্রিক্টনা শীন্দুনা হৈকৎ লৈকৎ তম্বগা লোয়ননা লময়ানবা হিজম ইরাবতপু শৈথারগা মখল মথেল কয়াগী থৌরম অমসু পাঙথোকখি হায়রি।
লালসিংমুড়াদা পেত্রিওটিক রাইটার্স ফোরাম ত্রিপুরা ব্রাঞ্চনা ইরাবত ষ্টেচু কমপ্লেক্সতা খিন্না লৈবা ইরাবতকী মীতমদা হৈকৎ লৈকৎ তমদুনা মপোক নুমিৎ থৌরম পাঙথোকখি। খরনি মমাং ত্রিপুরা খোঙচত্তা লাকপীরম্বা মণিপুরগী ৱাংখৈ এ/সিগী এম.এল.এ থাংজম অরুন কুমারগী মীৎয়েং মখাদা লালসিংমুড়াদা খিন্না লৈবা ইরাবত মীতমগী গ্রাউন্ড ফ্লোর অমসুং অঙাংশিংগী মখল কয়াগী থৌরম য়াওনা ফেন্সিং তৌদুনা খুঞ্জাশিংদা শিন্নবগী থৌরম চৎখিবা সেপ্টেম্বর ২৭ দা পাঙথোকখি। থৌরম অদুদা ফোরামগী মণিপুরগী প্রেসিডেন্ট এন খম্বা লুৱাং, সেক্রেটারী রাকেশ নাওরেম, গুৱাহাটি ব্রাঞ্চকী সেক্রেটারী রাজু মাইবম নচিংবা শরুক য়াখি। অঙাং লাইয়েকপগী চাংয়েং থৌরমদা শরুক য়াখিবা অঙাং ৪২ বু শক্তাকচে পীদুনা পুক্নিং থৌগৎখি।
খোয়াই দুর্গানগর খুঙ্গংদা খিন্না লৈবা লময়ানবা হিজম ইরাবতকী মীতমদা লৈকোল মণিপুরী কালচারেল ওর্গানাইজেশননা শীন্দুনা হৈকৎ লৈকৎ তমখি। থৌরম অদুদা খোয়াই ম্যুনিসিপালগী কাউন্সিলার উষারাণী সিংহ শরুক য়াখি। থৌরম অদুদা কে হরিপদ, কে নীলকান্ত, সুচিত্রা ব্যানার্জি নচিংবা ৱা ঙাংখি।
ধলেশ্বর কল্যানীদা খিন্না লৈবা লময়ানবা হিজম ইরাবতকী মীতমদা লৈ কৎতুনা মণিপুরী সাহিত্য পরিষদ অমসুং এ.এম.সিনা নুমিৎ অসি ইকাইখুম্নখি। নুংথিলদা স্টুডেন্ট হেলথ হোম হোলদা ইরাবতকী পুন্সি অমসুং খৌদাং হীরমদা ৱা ঙাংখি অমসুং হন্দক চহী সেকেন্ডারী (মাধ্যমিক) অমসুং হায়ার সেকেন্ডারী দা অথোই অহেন ফাষ্ট ডিভিশন্দা পাশ তৌবা ত্রিপুরাগী মৈতৈ মহৈরোইশিংবু মনা মথুম পীদুনা ওকখি হায়রি।
সোর্স : মরূপ
0 কমেন্ট:
কমেন্ট তৌবিয়ু