বাংলাদেশতা এক্সপো পাঙথোক্লগা মণিপুরগী হেন্দলুমগী পোথোকশিং খঙহল্লুরগনিঃ এম এল এ খোঙবানতাবম ইবোমচা
ইম্ফাল, ওক্টোবর ০৬ : বাংলাদেশতা হেন্দলুম এক্সপো অমা পাঙথোক্লগা লমদম অসিগী হেন্দলুমগী পোত্থোকশিং খঙহল্লুরগনি হায়না মণিপুর হেন্দলুম এন্ড হেন্দিক্রাফত দিবেলমেন্ট কো-ওপরেসন লিমিতেদকী চেয়ারমেন, এম এল এ খোঙবানতাবম ইবোমচানা ফোঙদোকখ্রে।
ইবোমচানা ৱাফম অসি কৈশামপাংতা লৈবা কোর্পোরেসন অসিগী অফিসতা বাংলাদেশতগী লাকপা মাইকো (মণিপুরী ইউথ কলচরেল অর্গানাইজেসন) গী মীহুৎশিংগা উনব অমদা ফোঙদোকখিবনি।
বাংলাদেশতগী লাকপা মাইকো (মণিপুরী ইউথ কলচরেল অর্গানাইজেসন) গী মীহুৎশিং
মহাক্না হায়খি, বাংলাদেশতা মৈতৈ খুল ৩৫রোম খুন্দাদুনা অপুনবা মীশীং লীশীং য়াঙ্খৈ রোম লৈরি। লমদম অদুগী মৈতৈশিংসু হেন্দলুমগী পোত্থোক পুথোক্তুনা ৱাংখৈ ফি, রাণী ফিনচিংবা ফংহল্লি। লাইবক থীবদি লমদম অদুগী ফিশাবীশিং ত্রেনিং নিংথিনা তৌদবনা ফি মচু শংবা, চানাং থাবনচিংবা ফি শাবা লোইরবা মতুং ফিনিশিং পীবা হৈতবনা মশক ফজবা ৱাৎপগী নুংঙাইতবা থেংনৈ হায়রি।
মিনিস্ত্রি ওব তেক্সতাইলগী মখাদা হেন্দলুম এক্সপো অমা বাংলাদেশতা পাঙথোকপগা লোয়ননা বাংলাদেশকী ফিশাবীশিংদা ফি মচু শংবা অমদি ফিনিশিং পীবগী ত্রেনিং পাঙথোক্পা হোৎনরগনি হায়না ইবোমচানা ফোঙদোকখি।
মাইকোগী সেক্রেতরি রাজিব কোন্থৌজম অমসুং এদভাইজর হাওরোংবম বাবলু অনীনা পাউদমখি, বাংলাদেশতা লৈবা মৈতৈশিংনা হেন্দলুমগী ফি ফজনা শানরি। মৈতৈশিংনা শাবা ফি অসি বাংলাদেশকী মরু ওইবা মিনিস্তরশিংদা খুদোল পীনবা থৌওইনা থিন্নরকই। বাংলাদেশকী মৈতৈনা শাবা ফি মণিপুরদা শারিবগা মান্ননা শাবা ঙমদে। মণিপুরগী ফি বাংলাদেশতা য়ৌরক্তবনা বাংলাদেশতা শাজরিবশিং য়াম্না পাম্নৈ। মণিপুরদগী ফিশাবীশিং বাংলাদেশতা হেন্দলুমগী ফি য়োনবা লাক্লবদি ময়ামদা অপেনবা ওইগনি ফোঙদোক্লমখি।
সোর্স : পোক্নফম
0 কমেন্ট:
কমেন্ট তৌবিয়ু