রাজর্ষি ভাগ্যচন্দ্রগী ২৮৪ শুবা মপোক কুমওন পাঙথোকখ্রে
ইম্ফাল, জুন ২১ : রাজর্ষি ভাগ্যচন্দ্র কলচরেল ফাউন্দেসন্না শীন্দুনা রাজর্ষি ভাগ্যচন্দ্রগী ২৮৪ শুবা মপোক কুমওন থৌরম ঙসি মোইরাইখোম বোকুল মখোঙদা লৈবা ভক্ত আশ্রম লম্পাক্তা পাঙথোকখ্রে।
পাঙথোকখিবা থৌরম অদুদা কলচরেল ফাউন্দেসন অসিগী মেম্বরশিংনা রাজর্ষি ভাগ্যচন্দ্রগী শক্তমদা হৈকৎ-লৈকৎ তম্বগা লোয়ননা মহাক্কী মফমদা শ্রদ্ধাঞ্জলি কৎপা ওইনা রাজর্ষি ভাগ্যচন্দ্রা প্রথ অমদি খোংজোম পর্ব শৈশক পাঙথোকখি। লোয়ননা সংকির্ত্তন মহা যজ্ঞসু পাঙথোকখি।
থৌরম অদুগী শরুক অমা ওইনা ফাউন্দেস অসিনা সংকির্ত্তনগী লমদা কত্থোকপা অমগা লোয়ননা য়োকখৎনবা হোৎনরিমখিবশিংদা ইকায় খুম্নবা ঊত্তুনা পীবা এচিবমেন্ত এৱার্দ চহী অসিগী ওইনা স্তেত এৱার্দি, গুরু লাইশ্রম মণি দেবী অমসুং নত সংকির্ত্তনগী গুরু এল লাকপতিদা পীখি।
থৌরম অদুগা মরী লৈননা ফাউন্দেসন অসিগী স্পোক্সপার্সন তখেল্লম্বম ইরাবতনা হায়, ঙসি রাজর্ষি ভাগ্রচন্দ্রগী ২৮৪ শুবা মপোক কুমওনগা মরী লৈননা ফাউন্দেসন অসিনা ভাগ্যচন্দ্রগী মফমদা ইকায় খুম্নবা ঊৎপা ওইনা ঙসিগী থৌরম অসি পাঙথোকপনি। থৌরম অসিদা সংকির্ত্তনবু য়োকখৎলম্বা অহল ওইরবা গুরু অনীদা মখোয়না কত্থোকপগা লোয়ননা হোৎনরকখিবা অদুবু ইকায় খুম্নদুনা এচিবমেন্ত এৱার্দশিং অসিসু লান্থোকচবনি। ফাউন্দেসন অসিনা মণিপুর অমদি লৈবাক অসিগী মনুংখক্তদা নত্তনা লৈবাক অসিগী ৱাংমদা মৈতৈশিংনা খুন্দাবা মফমশিংদা চত্তুনা মৈতৈ ঐখায়গী কলচর অসিবু য়োকখৎনবা থবক থৌরম কয়া অমা পায়খৎলগা লাক্লি। ম্যান্মা অমদি বাংলাদেশ য়াওনা লৈবাকশিং অসিদা মৈতৈশিংনা চৎনরিবা চৎনবী অমসুং লমদম অসিদা চৎনরিবা চৎনবীশিং অসিগা খেন্নবা মশক কয়া লৈরিবসি অচুম্বা মায়কৈদা চৎমিন্ননবা থবকসু পায়খৎলি।
মখা তানসু ফাউন্দেসন অসিনা লৈবাক অসিগী মনুং অমদি মপান্দা মৈতৈশিংনা খুন্দাবা মফমশিংদা চত্তুনা মৈতৈ ঐখোয়গী কলচর য়োকখত্তুনা থম্লম্নবা ফাউন্দেসন অসিনা মখা তানা হোৎনখিগনি হায়নসু মহাক্না ফোঙদোকখি।
সোর্স: পোক্নফম
0 কমেন্ট:
কমেন্ট তৌবিয়ু