১০ শুবা কংলা থিয়েতর মরাথোন হৌদোকখ্রে
শিথরক্লিবা মণিপুরী থিয়েতরগী মতাঙসি ঐখোয় পূন্না থিদোকমিন্নরগা নৈনহৌবা মথৌ তাইঃ বুধ চিংথাম
ইম্ফাল, জুন ২৩: মিনিস্ত্রী ওব কলচরগী শেন্থং মখাদা চহী খুদীংগী লেপ্তনা পাঙথোক্তুনা লাকপা ‘ফেস্তিবেল ওব ফোল্ক নেরেতিব আর্তস ফেস্তিবেল অমসুং কংলা থিয়েতর মরাথোন’ গী ১০ শুবা এদিসন ঙসিদগী হৌদোকখ্রে।
উচিৱাদা লৈবা কংলৈ লিবিং আর্তস (কংলা), মণিপুরনা শীন্দুনা য়াইস্কুলদা লৈবা মণিপুর দ্রামাতিক য়ুনিয়ন (এম দি য়ু) গী ওদিতোরিয়মদা পাঙথোকখিবা থিয়েতর অমদি ফোল্ক নেরেতিব আর্তস ফেস্তিবেল অসি হৌদোকপগী থৌরম অদুদা সেনিয়র থিয়েতর দিরেক্তর কে বি শর্ম্মানা প্রেসিদেন্ত, শক্নায়রবা থিয়েতর ক্রিতিক অমদি প্লেরাইত বুধ চিংথাম্না চীফ গেস্ত অমসুং থিয়েতর দিরেক্তর এম সি থোইবা অমদি প্লেরাইত নবকুমার নোংমৈকাপমনা গেস্ত ওনর ওইনা শরুক য়াখি।
থৌরম অদুদা মরী লৈননা, মতম অমা য়াম্না শাহৌ ফনা লৈরম্বা মণিপুরী থিয়েতরনা ঙসি তপ্না-তপ্না শিথরক্লিবা অসিগী মতাঙদা নুংনাংবা ৱাফমশিং ফোঙদোক্লদুনা বুধ চিংথাম্না হায়, মালেমগী শক্নাইরবা থিয়েতর দিরেক্তর রতন থিয়াম, কহ্নাইলাল, লোকেন্দ্র অরাম্বমনচিংবা ওজা কয়াসিনা মণিপুরী থিয়েতরবু মালেমগী ফম্বাক্তা পুখৎলক্তুনা অচৌবা ফিদা অমা কল্লম্মী। অদুবু ওজাশিং অসিগী মখাদা লাক্লিবা হায়বদি ঙসিগী মীরোলসিনা তৌরিবা থিয়েতরগী মচৎ অসি তপ্না-তপ্না মনীং হল্লকপা নৎত্রগা শিথরকপগী মওং অমদা লাক্লে।
অমরোমদা, ঐখোয়গী থিয়েতর তৌরিবশিং অসিগী ক্রিয়েতিবিতি করিসু অৱাৎপা লৈবদি নত্তে।অদুবু কদায়দনো করিদনো অমদা ঐখোয় চাওনা শোয়রি। ঐখোয় মশেল পূনশিন্নদুনা অমগা-অমগা পূন্না নৈনমিন্নবা অমদি চৎমিন্নবা ইৱাৎ ৱাৎপদৌনা তৌরি। খুদীংমক মানা-মানা অপাম্বা মওংদা তৌনবগী মওং অমদা লৈ। মসিদি তশেংনা লাইবক থীবনি। ঐখোয়দা হৌজিক ৱাৎলিবা অসি কদায়দনো হায়বদু ঐখোয় পূন্না থিদোকমিন্নবা চঙই। নৎত্রবদি মণিপুরী থিয়েতর অসি দায়িং আর্তফোর্ম অমগী থাকসিদা লৈখিবসু য়ারি। মতাঙসি হৌজিক ঐখোয় পূন্না নৈনহৌবা মথৌ তাই।
মণিপুরী থিয়েতরদা ভাবোক্কী অৱাৎপা করিসু লৈতে। ভাবোক্না পাম্বা প্লে পুথোকপদা ভাবোক্কী অৱাৎপা লৈরোই। মতাঙসিদসু ঐখোয় মীৎয়েং খরা থম্বা চুম্ব্রা নৎত্রগা চুমদব্রা হায়বসি নৈনবদা কান্নগনি খল্লি। থিয়েতরদা খুন্নাই অমগী মশক-মওংগী মমি ইরায় লায়না লোইনা ফোঙদোকপা ঙম্মী। হৌজিক শিথরক্লিবা মণিপুরী থিয়েতরগী খোঙজেল অসি হিংগৎহন্নবা হোৎনবদা পূম্নমক্কী থৌদাংসু লৈ হায়খি।
মহাক্না মখা তানা আর্ত এন্দ কলচরগী লমদমনি হায়দুনা চাওথোকচরিবা লমদম অসিদা ঙসিদি থিয়েতর ফেস্তিবেলদা নৎতনা অতৈ আর্ত ফোর্মশিংগী ফেস্তিবেলসু অমত্তা তৌখিদ্রে। মসিমক ঐখোয়গী খ্বাইদগী লাইবক থীবনি। অসিগুম্বা তাল্লক অসিদা নহা ওইরিবা কংলা, মণিপুরগী দিরেক্তর প্রেমজিৎনা মশাগী উইল অমগা লোয়ননা লেপ্তনা চহী ১০ চূপ্না থিয়েতর ফেস্তিবেলদা নৎতনা ফোল্ক নেরেতিব আর্তসকী ফেস্তিবেল অমা শীল্লিবা অসি তশেংনা থাগৎনীংই। মসিদা ঐখোয় খুদীংমক্না শৌগৎফম থোকই।
থিয়েতরগী ঊৎনবা প্লেতফোর্ম লৈত্রগা মণিপুরী থিয়েতরনা কমদৌনা হিংদুনা লৈবা ঙমগনি। মসি মণিপুরী থিয়েতর হৌজিক মায়োক্নরিবা অচৌবা প্রোব্লেম অমনি। মসিগী অৱাৎপা অসি লৈরিবমখৈ মণিপুরী থিয়েতরগী খোঙজেল অসি অসুম থিন্থরক্কনি হায়নসু বুধ চিংথাম্না ফোঙদোকখি।
ঙসিদগী হৌখিবা ফেস্তিবেল অসিগী সোভেনির অমসু ঙসিগী থৌরমসিগী দাইজ মেম্বরশিংনা রিলিজ তৌখি। নুমিৎ ৭ নি চূপ্না চত্থগদৌরিবা ফেস্তিবেল অসিদা একজিবিসন সো ১ য়াওরগা তোঙান-তোঙানবা থিয়েতর গ্রুপ ২৩ গী অপূনবা প্লে ২৩ ঊৎকনি। লোয়ননা ফোল্ক নেরেতিব আর্তস মখল মথংশীৎনা খোংজোম পর্ব, খুনুং ঈশৈ, পেনা, খুবাক ঈশৈ, ৱারী লীবদা নৎতনা পপ্পেত্রি আর্ত ফোর্মগী প্রেজেন্তেসন অমসু ফেস্তিবেল অসিদা ঊৎকনি।
ঙসি হৌদোকপা নুমিৎকী অহানবা শরুক্তা পাঙথোকখিবা ফোল্ক নেরেতিব আর্তসকী শরুক্তা খুনুং ঈশৈ, খোংজোম পর্ব, মণিপুরী ফোল্ক সোং খূদোল তমখি। মসিগী তুংদা কংলা থিয়েতর মরাথোনগী শরুক ওইনা অহানবা শো'দা কলচরেল স্তার একাদেমী, উরিপোক্কী মোইরাংথেম নিতিসকুমারনা ইবা অমদি এস ঐচ চিরোল শর্ম্মানা দিজাইন অমসুং দিরেক্সন তৌবা ‘মীরেল লাংচপ’, অনীশুবা শোদনা থাংজিং আর্ত এন্দ কালচারেল একাদেমী, মোইরাংগী ‘শৌবোন য়াইরেন চনু’ হায়রিবা প্লে অনী অসি ঊৎখি। প্লেসিগী অইবনা নোদিয়া ঙাঙোইচা অমদি দ্রামাতাইজ অমসুং দিরেক্সন তৌরিবনা মাইরেম্বম প্রোমো দেবীনি।
সোর্স: পোক্নফম
0 কমেন্ট:
কমেন্ট তৌবিয়ু