বাংলাদেশ মণিপুরী সাহিত্য সংসদকী গোেল্ডন জুবিলি থৌরম লোইশিনখ্রে
লোল অমসুং সাহিত্যগী যুম্ফম অমা লেপচরেঃ এ কে শেরাম
ইম্ফাল, নবেম্বর ১৭ঃ বাংলাদেশতা মণিপুরী লোল অমসুং সাহিত্য হিংহন্নবা হোৎনবদা অচৌবা থৌদাং লৌরকখিবা বাংলাদেশ মণিপুরী সাহিত্য সংসদনা চহী ৫০ মপূং ফারক্তুনা থা তরুক চুপ্পা চখরকখিবা গোল্ডন জুবিলিগী থৌরম সনা ফুদোংবা চহী লোইশিনবগী থৌরম পাঙথোকখে।
থা অসিগী ১৪ অমসুং ১৫ দা বাংলাদেশকী কমলগঞ্জগী আদমপুর বাজারদা লৈবা মণিপুরী কলচরেল কমপ্লেক্সতা পাঙথোকখিবা লোইশিনবা থৌরমগী অহানবা নুমিৎকী অহানবা সেসন্দা স্পিসিএল গেস্ত ওইনা মণিপুরী সাহিত্য পরিষদ ইম্ফালগী জোইন্ত সেক্রেতরি এল রামেশ্বর সিংহ, সাথৌলুপকী এদভাইজর আর কে বুধিমন্ত অমসুং লৈকোলগী সেক্রেতরি জি এ ঘনপ্রিয়া দেবীনা শরুক য়াখি। সাহিত্য সংসদ লিংখৎখিবগী মতাঙদা এ কে শেরাম অমসুং বাংলাদেশকী মপান্দগী য়েংলকপা মীৎয়েং হায়বসিদা শরতচান্দ থিয়ামনা ৱা ভাঙখি।
সংসদনা চহী ৫০ শুরকপা খোঙচৎকা মরী লৈননা এ কে শেরামনা হায়, সংসদকী চহী ৫০গী খোঙচৎতা য়াম্না মরু ওইনা ফংজবা অমা হায়বা তারবদি বাংলাদেশতা মণিপুরী লোল অমসুং সাহিত্যগী যুম্ফম অমা লেপচবা ঙমজবসিনি।
এ কে শেরামনা হায়খি, 'হৌজিক্তি ঐখোয় ইমালোলনা ৱা ঙাঙবদা কিদ্রে, ইকায়দ্রে। মসি পূন্নমক সংসদকী থৌবুরেল, মেম্বরশিং, ঐখোয়বু নুংশিবীবশিং অমসুং মসিবু লিংখৎপদা অচৌবা খৌদাং লৌবীরম্বশিং গী মতেঙদগীনি'।
খৌরম অদুদা প্রসিদেন্ত ওইখিবা গোল্ডন জুবিলি সেলেব্রেসন কমিতিগী কনভেনর প্রসান্তকুমার সিংহনা হায়, সংসদনা চহী ৫০ চঙলকপা হায়বসি অরাইবা অমদি নত্তে। চাউথ্রবা বাংলাদেশতা লৈরিবা মীশীং লিক্লবা মণিপুরীশিংনা হৌজিকসু লোল অমসুং সাহিত্যগীদমক তৌগদবা য়ান্না লৈরি।
জগোয়-ঈশৈগী লমদা অচৌবা খুদোল তৌরিবা তামান্না রহমান, ওয়ার্দা রিহাব অমসুং শান্তোনা দেবীদা ইকায়খুম্নবা উৎপা
অনীশুবা সেসন্দা বাংলাদেশ গবর্নমেন্তকী হান্নগী এদিসনেল সেক্রেতরি শসিকুমার সিংহনা চীফ গেস্ত ওইরগা কমলগঞ্জ সব-দিস্ত্রিক্তকী একজিক্যুতিব ওফিসার মখোনচন্দ্র সূত্রধার, সাহিত্য একাদেমি এৱাদি শরতচান্দ থিয়াম, মণিপুরী সাহিত্য পরিষদ ইম্ফালগী জেনরেল সেক্রেতরি দাঃ এলাংবম প্রিয়োবর্ত্ত অমসুং লৈকোলগী প্রসিদেন্ত চোংথাম ওংবী সুবদনীনা স্পিসিএল গেস্তশিং ওইখি। সংসদকী প্রসিদেন্ত ওইরিবা এ কে শেরামনা প্রিসাইদ তৌখি।
গোল্ডন জুবিলিগী থৌরমগা মরী লৈননা অখন্ননা পুথোকপা 'মৈরা' সু ফোঙখি। জগোয়-ঈশৈগী লমদা অচৌবা খুদোল তৌরিবা শর্মিলা বন্দোপাধ্যায়, তামান্না রহমান, ওয়ার্দা রিহাব অমসুং শান্তোনা দেবীদা ইকায়খুম্নবা উৎপা ওইনা সাইতেসন পীদুনা মীয়ামদা শক্তাকখি।
থৌরম অসিদা স্পিসিএল গেস্ত ওইনা শরুক য়াখিবা মখোনচন্দ্রনা হায়খি, 'ঐহাক্লা মফম অসিদা থা ১১ রোম থবক তৌরকপা অসিদা মণিপুরীশিংনা ঈং-তপ্পা পামজবা পূন্নমক উবা ফংই। তশেংনা হায়রবদা ঈংনা চিক্না পূম্নমক নুংশিননা হিংমিন্নবা পাম্বদু ময়েক শেংনা খঙবা ঙম্মী। য়াম্না দিসিপ্লিন লৈবা মণিপুরীশিং গী মরক্তা য়াওবা ফৎজবসি ঐগীদি লাইবক ফবনি'।
থৌরম অদুদা শরুক য়াখিবা শরতচান্দ থিয়ামনা হায়, 'ঈগী মরী ওইরিবা বাংলাদেশকী মণিপুরীশিংনা মণিপুরী অমা ওইবগী মণিপুরী স্পিরিত অদুমক চপ চানা ঙাক্তুনা লৈরম্বা অসিগীদমক মণিপুর মীয়ামগী মহুৎ শিঞ্জরগা ইকায়খুম্নবা উৎচরি। চহী ৫০গী তুংদা লাক্কদবা চহী কয়াদসু ইমালোলগী সাহিত্যগী কলচরগীদমক মাঙজিন থানা বাংলাদেশকী লৈমায়সিদগী মালেমগী মফম কয়াদা যৌরকপা ওইরসনু হায়না পাউজেল পীজরি'।
থৌরমগী অরোইবদা মশক নাইরবা আর্তিস্ত কয়ানা মখল মথেলগী জগোয় শাখিবা
থৌরম অদুদা চীফ গেস্ত ওইখিবা শসিকুমারনা হায়, সংসদকী খোঙচৎ অসি য়ান্না শীংথানিংঙাইনি। বাংলাদেশকী মপান্দগী মণিপুরীশিংনা শরুক য়াবা হায়বসিসু ঐখোয়দা কান্নবা কয়া ফংই। মসিগুম্বা উনবা অমসুং লোয়ন-তিন্নবা হায়বসি য়াম্না তোয়না পাঙথোকপা মথৌ তাই।
থৌরম অসিগী অরোইবদা মশক নাইরবা আর্তিস্ত কয়ানা মখল মথেলগী জগোয় শাখি। নৌরিবা অঙাংশিংনসু ঈশৈ কয়া শক্তুনা মখোয়দা লৈরিবা হৈ-শিংবদু উত্থোকখি। মণিপুরগী শক্নাইরবা কোন্থৌজম বোবিননা মখল কয়াগী ঈশৈ শক্তুনা থৌরম অদুবু মপূং ফাহনখি।
সনা ফুদোংবা থৌরমগী অরোইবা নুমিৎ নবেম্বরগী ১৫ দা য়াম্না হিস্তোরিক ওইরবা সিলেত্তা লৈবা মণিপুরী রাজবারীদা অখন্নবা থৌরম ওইনা মণিপুরীশিংগী মরক্তা শীংথানিংঙাই ওইরবা লৈখিদ্রবা কবি লাইশ্রম সমরেন্দ্র, অইবা এলাংবম সোনামণি, লাইয়েকপা আর কে সি এস অমসুং থিয়েতর আইকোন রতন থিয়ামগী ফোতোদা লৈ কৎপগা লোয়ননা মখোয়গী মরমদা ৱা ঙাঙখি।
থৌরমগী অরোইবা নুমিৎ সিলেত্তা লৈবা মণিপুরী রাজবারীদা অখন্নবা থৌরমগী মতাং অমা
শক্নাইরবা সোসিএল ৱার্কর অমসুং বাংলাদেশকী সুপ্রিম কোর্তকী সেনিয়ার এদভোকেত এস সি সিনহানা চীফ গেস্ত অমসুং এ কে শেরামনা প্রসিদেন্ত ওইখি। থৌরমদুদা সমরেন্দ্রগী মরমদা এল রামেশ্বর, সোনামণিগী মরমদা ই প্রিয়োবর্ত্ত, আর কে সি এসকী মরমদা আর কে বুধিমন্ত অমসুং রতন থিয়ামগী মরমদা শরতচান্দ থিয়ামনা মরিক চুম্বা ৱা ঙাঙদুনা মখোয় মরিগী মরমদা শক্তাকখি।
অনীশুবা সেসন ওইনা কৈনাহল দেবীনা চেয়ার লৌদুনা শৈরেং শৈদিন্নবা অমা পাঙথোকখি। মণিপুরদগী সুবদনী, রামেশ্বর, প্রিয়োবর্ত্ত, বুধিমন্ত, ব্রোজেন্দ্রো, শরতচান্দ, সোবিতা, রঞ্জনাগা লোয়ননা বাংলাদেশকী নিরঞ্জন, শঙ্কর, মিনতি, রওশন আরা বাশীঁ, সোমেন্দ্রোনচিংবনা মশা মশানা ইবা শৈরেংশিং পাখি।
থৌরমগী চেয়ার লৌখিবী বাংলাদেশকী শক্নাইরবী অইবী কৈনাহল দেবীনা মশানা ইবা শৈরেং অমা পাখিবগা লোয়ননা অসিগুম্বা থৌরম অসি সাহিত্য চাওখৎহন্নবা হোৎনবদা য়াম্না মরু ওই হায়খি। শক্নািইরবা কোন্থৌজম বোবিননা ঈশৈ শকপগা লোয়ননা গোল্ডন জুবিলিগী থৌরম অদু য়াম্না মায় পাক্না লোইশিনখি।
সোর্স - পোক্নফম
0 কমেন্ট:
কমেন্ট তৌবিয়ু