ত্রিপুরাদা পাঙথোক্কদবা চোংথা মিয়াগী নীংশিং থৌরমদা শরুক য়াবীয়ুঃ ট্রাস্ট
ইম্ফাল, দিসেম্বর ৩০ : ইং ১৮৯১ দা মণিপুর অমসুং বৃটিশ অনীগী মরক্তা শোক্নখিবা এঙ্গলো মণিপুরী ৱারদা য়াম্না মরু ওইবা লানফমশিং কংলা, থৌবাল অথোকপম অমসুং খোংজমদা থৌনা ফনা লাঞ্জিংলেন ওইনা শরুক য়াখিবা মেজর চোংথা মিয়াগী ১১৫ শুবা লৈখিদবগী নীংশিং থৌরম মহৌশাগুম্না মহাক্না অরোইবা য়াহিপ তানখিবা ত্রিপুরাগী নারায়ণ খামারদা পাঙথোক্কনি।হায়রি।
মেজর চোংথা মিয়া মেমোরিয়েল ত্রাষ্ট ত্রিপুরানা শীন্দুনা লাক্লিবা জানুয়ারী ১৭ তা থৌরম অসি তাঙ্কক মরি থোক্না পাঙথোক্কনি। অহানবা তাঙ্কক্তা অয়ুক পূং ৯ তাবা মতমদা অথৌবা অসিগী মশু শুথাং চোংথাম গোপালকৃষ্ণনা চিংদুনা মীয়াম্না সিনাই তুরেল তোর্বান্দা লৈবা অথৌবা অসিগী সমাধি ঘাটতা তর্পন কৎকনি।
অহুমশুবা তাঙ্কক্তা মেজর চোংথা মিয়া মেমোরিয়েল কমপ্লেক্সতা লৈবা অথৌবগী মীতমদা শক্নাইরবা মীওই কয়ানা লুচিংদুনা হৈ লৈ কৎতুনা শ্রদ্ধাঞ্জলিগী থৌরম অমসুং অরোইবা তাঙ্কক্তা কালচারেল প্রোগ্রামনা মপূং ওইবা থৌরম পাঙথোক্কনি হায়রি।
মসিগুম্বা মণিপুর ইমাগী মপারি মেজর চোংথা মিয়াগী নীংশিং থৌরম অসিদা অথৌবা অসিগী পোক্নফম লমদম মণিপুরদা লৈরিবা তোঙান তোঙানবা লুপশিং, ইমাশিংগী লুপশিং, মহৈরোয় লূপশিং অমসুং লন্নাই মীওইশিংনা অথৌবা মফমদা হৈকৎ লৈকৎ তম্বা অসিদা লেংবীরক্তুনা শরুক য়াবীয়ু হায়না আপিল তৌরক্লি।
সোর্স: পোক্নফম
0 কমেন্ট:
কমেন্ট তৌবিয়ু