আসামদা ‘বারাক কালচারেল ফেস্তিবেল ২০২২’ হৌদোকখ্রে
ইম্ফাল, দিসেম্বর ৩০ : বারাক ম্যুজিয়াম এন্দ লাইব্রেরি, বনতারাপুর, কাছার, আসাম্না শীন্দুনা নুমিৎ নীনী চুপ্না চত্থগদবা ‘বারাক কালচারেল ফেস্তিবেল ২০২২’ ঙসি বারাক ম্যুজিয়ম কমপ্লেক্স, বনতারাপুরদা হৌদোকখ্রে। লাইব্রেরি অসিগী ফীরাল চিংখৎলবা মতুঙদা বারাক ম্যুজিয়ম এন্দ লাইব্রেরিগী লৈখিদ্রবা দোনারশিংদা ইকায়খুম্নবা উৎপগা লোয়ননা ফেস্তিবেল অসি অয়ুক পূং ৮.৩০ তাবা মতমদগী হৌদোকখি।
‘বারাক কালচারেল ফেস্তিবেল ২০২২’ হৌদোকপগী থৌরমদা চিফ গেস্ট হামোম সনাতোন (বাংলাদেশ)না ৱা ঙাংবগী তাংফম অমা
থৌরমগী মখা চত্থরকপা ওইনা ঙারিয়ানবম মোধুচন্দ্র সিংহনা থৌরম মপু ওইদুনা অয়ুক্কী দেলিগেত সেসন হৌদোকখি। সেসন অসি হৌদোকপা ওইনা ম্যুজিয়ম অসিগী ফাউন্দর দাঃ হাওরোংবম রাজমণি সিংহনা ফেস্তিবেল অসিগী মতাঙদা ৱাহৌদোক পীখি। অথোইবা মীথুংলেন অমদি অথোইবা লেংবীরকপশিংনা থৌরমগা মরী লৈননা ৱারোল কয়া ফোঙদোকখিবগা লোয়ননা ম্যুজিয়ম অসিবু অৱা-অনা থিদনা শেমগৎ-শাগৎলকখিবা অসিগীদমক্তা দাঃ হাওরোংবম রাজমনিবু থাগৎপা ফোঙদোক্নখি।
বারাক ম্যুজিয়ম এন্দ লাইব্রেরিগী প্রেসিদেন্ত ঙাঙোম বসন্ত কুমার সিংহনা থৌরম মপু ওইদুনা অনীশুবা সেসন হৌদোকখি। সেসন অসিদা মণিপুর স্তেতকী লংথাবাল এসেমব্লি কনস্তিত্যুন্সিগী এম এল এ, করাম শ্যাম সিংহ, লখিপুর এসেমব্লি কনস্তিত্যুন্সি, কাছারগী এম এল এ, কৌশিক রাই, মণিপুরগী ক্ষেত্রিগাও এসেমব্লি কনস্তিত্যুন্সিগী এম এল এ, নুরুল হুসেন, আর কে গোপালসনা, এম সুর্যকুমার শর্ম্মা, দাঃ ফুরিৎশাবম বিরমণি, কোইজম স্বপন অমদি মৈহৌবম সৈত্যবাননা মথংশিৎনা অথোইবা মীথুংলেন অমদি অথোইবা লেংবীরকপশিং ওইখি।
ইকায়খুম্নজরবা ডেলিগেট ময়াম্না মৈরা চুখৎপগী মতাং অমা
থৌরমগা মরী লৈননা এম এল এ কৌশিক রাইনা দাঃ হাওরোংবম রাজমণিনা হোৎনজদুনা আসামগী মনুঙদা ম্যুজিয়ম অমা শেমগৎ-শাগৎপগীদমক থাগৎখি। ম্যুজিয়ম অসি শেমগৎ-শাগৎপদা মতেঙ ওইনবা লুপা লাক্ষ ৫ খুদোল তমখি।
এম এল এ, করাম শ্যামনা রাজমণিগী হেৎনজবা অসিবু ইকায়খুম্নবা অমদি থাগৎপা ফোঙদোক্লদুনা মহাক্কুম্বা মীশক অসি অতাংবনি। ম্যুজিয়ম অসি আসামখক্তগী নত্তে। ঐখোয় মণিপুরগী পুৱারীগা শাগোন্নবা অরিবা পোৎলম কয়া থম্বীবা ম্যুজিয়াম অমনি হায়খি। লোয়ননা মহাক্কী মায়কৈদগী লুপা লীশীং ৫০ পীরদুনা মখা তানা ম্যুজিয়ম অসিগীদমক লুপা লাক্ষ ১০ পীনবা হোৎনগনি হায়না থাজবা পীখি।
এম এল এ, নুরুল হাসাননা ম্যুজিয়ম অসিবু শেমগৎ শাগৎপদা মতেঙ ওইনবা লুপা লীশীং ৫০ খূৎশিন্নখি। সেসন অসিদা এৱার্দ লান্থোকপগী থৌরম অমসু পাঙথোকখি। নাম্ব্রম রাধাবিনোদ সিংহনা শুশিরা বিদ্যা ভুষন, নামৈরাকপম নারায়ণ সিংহদা বিদ্যা ভুষন, মাংকা ময়াংলম্বমদা অধিকারিময়ুম কুঞ্জেশ্বর শর্মা মেমোরিয়েল কেশ এৱার্দ অমসুং অঙালু থাইমৈ মণিপুরদা উশম অঙৌ সিংহনা মেমোরিয়েল কেশ এৱার্দ পীদুনা ইকায়খুম্নবা উৎখি।
থৌরম অসিগী শরুক অমা ওইনা তোঙান-তোঙানবা ফুরপশিংনা মাগী মাগী ওইবা নাৎকী জগোয়শিং উৎখি।
সোর্স: হুইয়েন লানপাউ
0 কমেন্ট:
কমেন্ট তৌবিয়ু