ত্রিপুরাদা খুন্দারিবা মীতৈশিংদা মীতৈ ময়েক তম্বীবা চৎকদবা তিম অমা এম পি লৈশেম্বা সনাজাওবনা লমথাখ্রে
ইম্ফাল, এপ্রিল ১৬ : কুকিশিংনা মীতৈশিংগী লুরবা লাইফম্লেন অমা ওইরিবা থাংজিং চীংদা লাই খুরুম্বা থিংজিংল্লকপা অসি য়াম্না হকচীন্না লৌই। ইন্দিয়া গবর্নমেন্তনা অসিগুম্বা অসি য়েংদুনা লৈরিমখৈ মণিপুরদা ঈং-তপ্পা হঞ্জিল্লক্কনি হায়বা থাজদে হায়না রাজ্য সভাগী এম পি নিংথৌ সনাজাওবা লৈশেম্বনা ফোঙদোকখ্রে।
ৱাফম অসি সনাজাওবা লৈশেম্বনা ঙসি ত্রিপুরাদা খুন্দারিবা মীতৈশিংদা মীতৈ ময়েক তম্বীবা চৎকদবা মীওিই ৬ না শাবা তিম অমা লমথাবগী থৌরমদা ফোঙদোকখিবনি। ঙসি অয়ূক রাজ্য সভাগী এম পি অসিনা শলাই তরেৎকী ফিরাল চিংখৎতুনা সনা কোনুংদগী ত্রিপুরা পাংগদবা কাঙবু অদু লমথাখি।
লমথাবগী থৌরম অদুগা মরী লৈননা সনাজাওবা লৈশেম্বনা হায়, থাংজিং চীংদা মীতৈশিংনা লাই খুরুম্বা চঙবদা কুকিশিংনা অথীংবা পীদুনা মখোয়না তৌনিংবদা তৌরিবা অসি ইন্দিয়া গবর্নমেন্তনা য়েংদুনা লৈফম থোক্তে। মখোয়না তৌরক্লিবা থৌওং অসি য়াম্না মথোঙ হুক্তুবা অমখক্নি। অসিগুম্বা থৌওং অসি ইন্দিয়া গবর্নমেন্তনা হৌজিক নাকল অনীগা ৱারী শাদুনা লমদমসিদা তঙদু লৈতাবা হঞ্জিন্নবা হোৎনরক্লিবা অসিদা শীংনবনি হায়না লৌই।
থৌওং অসি অদুমক য়েংদুনা লৈরিমখৈ লমদম অসিদা ঈং-তপ্পা হঞ্জিল্লক্কনি হায়বদি থাজদে। মসিগী থৌওং অসিনা মখা তানা অদুমক চত্থরকপা তারগদি মীতৈশিং গী খাঙবগী পাঙ্গলসু লৈরক্লোই। মরম অদুনা মতম লৈরিঙৈদা ইন্দিয়া গবর্নমেন্তনা হীরম অসি মীৎয়েং চঙবনা খ্বাইদগী অচুম্বা খোঙথাং ওইগনি। করিগুম্বা মীৎয়েং চঙদনা উশিন্নদনা অসুম লৈথোকপা তারবদি য়েলহৌমী মীয়ামগা তান্নদুনা অচৌবা খোঙথাং অমা লৌরকপা য়াই হায়খি।
মহাক্না মখা তাখিবদা, মণিপুর অসি অপীকপা লমদম অমখক ওইজরবসু ইশাগী ইরোল ইয়েলক লৈজবা লমদম অমখক্নি। মসিগীদমক ঐখোয়না চাঙথোকচনা হিংবা ঙম্লিবনি। মণিপুরগী মপান্দা লৈরিবা ইরৈচাশিংসু মসিগী চাউথোকচবা অসি পোকচনবা ইয়েক অসি খঙহনবা মথৌ তায়। ৱাখল্লোন অসিদা মীলালনা চঙশিল্লিবা খোঙথাং অসিমক য়াম্না থাগৎনীংঙাইনি হায়খি।
পনবা য়াবদি, মীলাল (মীতৈ ইরোল ইয়েক লোইনশিল্লোন অপূনবা লূপ) না শীন্দুনা চৎখিবা ত্রিপুরাগী খোঙচৎ অদুদা শরুক য়াখিবশিং অদুদা মীলালগী প্রেসিদেন্ট খাইদেম ইঙোচা মীতৈ, ৱার্কিং প্রেসিদেন্ত শাদোকপম তোম্বা মঙাং, ভাইস প্রেসিদেন্ত ৱাইখোম গোজেন, জেনরেল সেক্রেতরি লাঙ্গোলজম নোংমাইলেম্বী লৈমা, এসিস্তেন্ত ফাইনান্স সেক্রেতরি সিনাম কুন্দিচা অমদি উকলগী প্রেসিদেন্ত মুতুম মনিতোন য়াওরি।
সোর্স: পোক্নফম
0 কমেন্ট:
কমেন্ট তৌবিয়ু