এল ব্রজমোহোনদা বীরকুমার লাইফতাইম এচিবমেন্ত এৱার্দ-২০২৪ পীরগনি
ইম্ফাল, ওক্তোবর ১৯ : মণিপুর থিএতরদা থোইদোক্না খুঙ্গংগী লমদা থিএতরগী অকনবা ঈহৌ শাগৎপদা মশাগী অরোয়বা মীকূপ ফাওবা কত্থোকপগা লোয়ননা থিএতরগীদমক হোৎনরমখিবা লৈখিদ্রবা এলাংবম বীরকুমার সিংহগী মিংদা হন্দক্কী চহীসিদগী হৌরগা চহী খুদীংগী ‘আর্ততা কত্থোক্লবা থৱায়’ হায়দুনা পীগদবা লাইতাইম এচিবমেন্ত এৱার্দ-২০২৪ অহানব ওইনা রূপমহল থিএতরগী সেনিয়র দিরেক্তর লোইতোংবম ব্রজমোহোনদা লান্থোক্লগনি।
থোইদোক্না মণিপুরী থিএতর অমদি খুঙ্গংগী চাওখৎনবা হোৎনবদা অচৌবা থৌদাং লৌরম্বশিংদগী চহী খুদীংগী খনগৎলগা ইকায় খুম্নবা ঊৎতুনা ‘আর্ততা কত্থোক্লবা থৱায়’ হায়রিবা এলাংবম বীরকুমার সিংহ লাইফতাইম এচিবমেন্ত এৱার্দসি পীগদবনি। এৱার্দ অসিদা শেলগী মনা, মেমেন্তো অমদি সাইতেসন অমা য়াওরি।
এলাংবম বীরকুমার-লাই মৈদোং মনীং মখা লৈকায়দনি। মশাগী চহী ৮৪ শুবদা লৈখিদে। মহাক এক্তরনি, প্লেরাইতনি, দিরেক্তরনি। মতম অমা মীয়াম্না ‘জয় দ্রামা’ হায়রগা খঙনখিবা তুরিং দ্রামা পার্তি অসিদগী হৌরক্লগা মহাক্কী থিএতরগী খোঙচৎ অসি শাগৎলক্লবা মতুং মণিপুরী থিএতরগী শাংলবা খোঙচৎ অসিদা চোকথবা লৈতনা চৎখিবা লমদমসিগী অতাঙবা আর্তিস্তনি। মহাক্কী পুন্সিগী অরোয়বা মীকূপ ফাওবা থিএতর হায়বিসিদগী লাপথোকখিদে।
থিএতরগী লমদা এক্তর অমা ওইনা থৱায় য়াওনা কন্না খোঙ থাংজিল্লিঙৈ মতমদা মশাগী চহী ৪৫ রোম শুরকপা মতমদা লাইবক থীবা করিনো হায়বা মফম ইখঙ খঙহৌদনা মশাগী মমীৎ অনীমক উবা ফংখিদে। মমীৎ অনীমক উখিদ্রবসু মশানা পামজবা থিএতরদগীদি খক লাপথোকখিদে মমীৎ উদ্রবসু তোঙান-তোঙানবা প্লে কয়া ইরমখিবদা নৎতনা প্লে কয়া অমসু দিরেক্সন পীরমখি। মী অমনা হেক্তা তৌবা ঙম্লরোইদবা অঙকপা মগুণ কয়াগা লোয়নখিবা অমদি মণিপুরী থিএতরগীদমক মপুন্সি কত্থোকখিবা অতাঙবা থৌমীনি।
অহানবা ওইনা এৱার্দ অসি পীদুনা ইকায় খুম্নগদৌরিবা লোইতোংবম ব্রজমোহন হিয়ংথাংদগীনি। মহাক্কী মণিপুরী থিএতরগী শাংলবা খোঙচৎ অসিদা থোইদোক্না লমদমসিগী মীয়াম্না মহাভারতকী ‘শকুনি শাবা’ হায়না শকখঙনরিবা আর্তিস্ত অসি তোঙান-তোঙানবা মনা-মথুম কয়াসু ফংখ্রে।
এৱার্দ অসি হৌজিক চত্থখিবা ৪৭ শুবা খা মণিপুর দ্রামা ফেস্তিবেল, ২০২৪ গী মনা য়েন্থোকপা নুমিৎতা লান্থোক্কনি।
সোর্স: পোক্নফম
0 কমেন্ট:
কমেন্ট তৌবিয়ু