আর কে সি এসকী অয়েকপা লাইশিংনা মণিপুরগী পুৱারী তাক্লিঃ আর কে বুধিমন্ত
ইম্ফাল, ওক্তোবর ১৯ : ফাইনা আর্তসকী লমদম শক্নাইরবা আর্তিস্ত লৈখিদ্রবা আর কে সি এস (রাজকুমার চন্দ্রজিৎ সনা সিংহ) গী অয়েকপা লাইশিংনা মীয়ামদা মণিপুরগী পুৱারীগী তাঙ্কক, থৌদোক কয়াবু তাক্লি হায়না আর কে সি এস বার্থ সেন্তিনরি সেলেব্রেসন কমিতিগী সেক্রেতরি আর কে বুধিমন্ত সিংহনা ফোঙদোকখ্রে।
ৱাফম অসি বুধিমন্তনা ঙসি আর কে সি এস বার্থ সেন্তিনরি সেলেব্রেসন কমিতি অমসুং মণিপুর সাহিত্য পরিষদ, ত্রিপুরানা পূন্না শীন্দুনা পাঙথোকখিবা আর কে সি এস বার্থ সেন্তিনরি সেলেব্রেসন থৌরমদা ফোঙদোকখিবনি। ইম্ফালগী কৈশামথোংদা লৈবা আর কে সি এস আর্ত গেলরিদা সাহিত্য একাদেমি এৱার্দি শরতচান্দ থিয়ামনা প্রিসাইদ তৌখিবা থৌরম অদুদা মণিপুরী সাহিত্য পরিষদ, ত্রিপুরাগী প্রেসিদেন্ত এল বিরমঙ্গল সিংহনা চীফ গেস্ত অমসুং আর্তস সোসাইতি মণিপুরগী প্রেসিদেন্ত তিঐচ দেবেন্দ্র সিংহনা গেস্ত ওব ওনর ওইনা শরুক য়াখি।
ঙসি পাঙথোকখিবা আর কে সি এস বার্থ সেন্তিনরি সেলেব্রেসন থৌরমগী মতাং অমা
থৌরম অদুদা আর কে বুধিমন্তনা হায়, লৈখিদ্রবা আর্তিস্ত অসিনা হিংলিঙৈ মতমদা পুৱারীগী তাঙ্কক কয়াদা থোকখিবা থৌদোক, ৱাথোক কয়াবু য়েকথোক্তুনা থম্বীরম্মী। মহাক্কী অয়েকপা লাইশিংনা লমদম অসিগী পুৱারী তাক্লি। ‘দি গ্লোরি ওব মণিপুরী সিবিলাইজেসন’ হায়না মিংথোনবা পেন্তিং অসিনা আর্তিস্ত অসিগী অরোইবা লাই ওইখি।
মহাক্না হায়, আর কে সি এস আর্ত গেলরি অসি লৈখিদ্রবা আর্তিস্ত অসিনা লমদম অসিদা তম্লম্বা মমল নাইদ্রবা খুদোলনি। মণিপুরগী পুৱারী খঙনিংবা মপান্দগী লাকপা শক্নাইরবা মীশিং য়াওনা তুরিস্ত কয়ানা আর্ত গেলরি অসিদা লেপ্তনা লাক্লি। মতম কাইথোক্তুনা লাইরিক পারগা খঙগদবা অদু মতম চঙহন্দনা য়াম্না লাইনা আর্তিস্ত অসিগী লাই য়েংলগা মণিপুরগী পুৱারী খঙবা ঙমহল্লি। মসিমক আর্তিস্ত অসিনা লমদম অসিদা তম্লম্বা মমল নাইদ্রবা খুদোলনি।
আর্তিস্ত অসিনা লৈখিদ্রবা মতুং ইং ২০০৫ দগী হৌরগা বার্থ এনিবর্সরি পাঙথোরকখিবনি। হন্দক ১০০ শুবা মপোক কুমওন লাকপদা কমিতি অসি শেমদুনা আর্তিস্ত অসিগী বার্থ সেন্তিনরি সেলেব্রেসন অসি চহী অমা চূপ্না পাঙথোক্নবা খোঙথাং লৌখৎপনি। মসিগী মখা তাবা প্রোগ্রামশিং ওইনা শৈরেং শৈদিন্নবা, অঙাংশিংগী পেন্তিং কম্পিতিসন, উ-চরা থাবা অমসুং স্তেতকী থাক্তা আর্ত একজিবিসন্নচিংবা পাঙথোক্নবসু শেম-শারি হায়না শক্নাইরবা লাইয়েকপা অসিগী মচানুপা বুধিমন্তনা ফোঙদোকখি।
সোর্স: পোক্নফম
0 কমেন্ট:
কমেন্ট তৌবিয়ু