শক্নাইরবা অইবা রাজকুমার জিতেন্দ্রজিৎ সিংহ লৈখিদ্রে
আগরতলা, এপ্রিল ১৭ : শিক্ষাগী লমদা ত্রিপুরাগী মনুং-মপান ময়াম্না শক খঙলবা শক্নাইরবা শিক্ষাবিদ অইবা রাজকুমার জিতেন্দ্রজিৎ সিংহ (১৪ সেপ্টেম্বর ১৯৩৮-১৭ এপ্রিল ২০২৫) কৃষ্ণখুয়া তানখ্রে। ঙসি অয়ুক পুং ১০.৫৫ তাবা মতমদা ত্রিপুরা মেডিকেল কলেজ হাসপাতালদা লৈখিদবনি। মশাগী চহী ৮৯ শুখ্রবা মহাক্না লৈখিদবা মতমদা লোইনবী, মচা নুপা অমা মমৌ নুপী অনী, মশু অমা য়াওিনা মরি মতা কয়াসু থম্বীরম্মী। য়াম্না ক্রিটিকেলগী ফীভমদা চৎখিবা এপ্রিল তাং ৮ হাপানিয়াদা লৈবা টি.এম.সি লায়েংশঙদা ভর্ত্তি ওইখি।
অহল ওইরকপগী লায়না অমদি চহী খরগী মমাং হার্টকী লায়ননা সার্জারিসু তৌখি। চৎখিবা চহী মচা নুপা অহল লৈখিদবনা মরম ওইদুনা থম্মোয়গী লায়নাননা লাইকন্নদুনা লাকখি। চয়োল অমা হেন্না আই.সি.ইউদা লৈরগা লায়েং চত্থখি। অদুবু পুন্সিগী অরোইবা য়াহিপ তাদুনা তাইবঙ মপুগী খুয়াদা চঙজখ্রে।
রাজকুমার জিতেন্দ্রজিৎ সিংহ, ইংকুমজা ১৯৩৮গী সেপ্টেম্বর ১৪, ধলেশ্বরদা তাইবঙ ফাওরকখি। অপোকপগী মিং রাজকুমার সুরেন্দ্রজিৎ সিংহ, অপোকপী মিংনা সিজা বিধু দেবী। মচিল মনাও অনীগী মহাক্না অহলনি, মনাও আরকে প্রফুল্লজিৎ এএমসিগী মেয়র ওইরম্মী।
আরকে জিতেন্দ্রজিৎ ইং ১৯৬৯ দা কলিকাতা ইউনিভার্সিটিদগী ইংরেজিদা এম.এ পাশ তৌরবা মতুং চহী কুনথ্রা ইং ১৯৬৯ দা কলিকাতা ইউনিভার্সিটিদগী ইংরেজিদা এম. এ পাশ তৌরবা মতুং চহী কুনথ্রা নিপান চুপ্না ত্রিপুরা লৈঙাক্কী শিক্ষা দপ্তরগী স্কুলশিংদা ওজা অমসুং বেসিক ট্রেনিং কলেজ, ত্রিপুরা ইউনিভার্সিটিদা গেষ্ট লেকচারার ওইনা থবক তৌরম্মী। ইং ১৯৯৬, সেপ্টেম্বরদা সিলেকশন গ্রেড লেকচারার ওইনা আগরতলা বেসিক ট্রেনিং কলেজদগী থবক্তগী পোত্থাখি। থবক্তগী পোত্থারবা মতুঙদসু প্রোফেশন্যাল অমা ওইনা ত্রিপুরা লৈঙাক্কী ত্রিপুরা বোর্ড অবা সেকেন্ডারী এডুকেশনগী মখাদা প্রাইমারী, সেকেন্ডারী অমসুং হায়ার সেকেন্ডারীগী ইংরেজি টেক্সবুককী অইবা অমসু ওইরম্মী। মহাক এস.সি.ই.আরটি, টিবিএসইগী কারিকুলাম, সিলেবাস, টেক্স বুক শেম্বা কমিটি নচিংবা শিক্ষা দপ্তরগী তোঙান তোঙানবা কমিটি কয়াদা য়াওখি।
মণিপুরী, বাংলা অমসুং ইংরেজিদা অইবা অমা ওইনা ময়াম্না শক খঙলবা মহাক লাইরিক কয়াসু ফোঙখ্রে। মহাক চহী কয়া শাংনা মণিপুরী সাহিত্য পরিষদ, ত্রিপুরাগী প্রেসিডেন্ট অমসুং জেনারেল সেক্রেটারী ওইবিরম্মী। মেজর চোংথা মিয়া ট্রাষ্টকী মেম্বরসু ওইরম্মী। ত্রিপুরা লৈঙাক্কী ডিরেক্টরেট অব ককবরক এ্যন্ড আডার মাইনোরিটি ল্যাঙ্গুয়েজ কমিটিগী মেম্বর ওইরম্মী। ত্রিপুরা লৈঙাক্না ‘মাতৃভাষা’ সম্মান পীদুনা মহাকপু ইকাইখুম্নখ্রে। সাহিত্য পরিষদ ইম্ফালনা ২০১০ দা প্লাটিনাম জুবিলিদা থোইদোকপা সম্মান তৌখি। অদুগা থৌপাং লুপনা ২০১২ দা অহানবা ওইনা থিয়াম ইবোচৌবী নেশনেল এৱার্ড পীদুনা ইকাইখুম্নখি। হন্দক চহী ড. ব্রজগোপাল রায় স্মৃতি পুরস্কার ২০২৪ পীদুনা ইকাইখুম্নখ্রবনি।
মহাক্না লৈখিদবা পাউ তাবদা ত্রিপুরা অমসুং মপান ত্রিপুরাগী লুপ কয়ানা অৱাবা ফোঙখি। লন্নাই মীওই কয়ানা শঙ্গায়দা লাক্লগা অরোইবা লৈ চাইখি। মণিপুরী সাহিত্য পরিষদ ত্রিপুরা অমসুং আসাম প্রেসিডেন্ট অনীনা অৱাবা ফোঙদোকপগী পাউদম পীরকখি।
সোর্স: মরূপ
0 কমেন্ট:
কমেন্ট তৌবিয়ু