‘শঙ্গাই ফম্মাং পুয়া’ বু ময়েক ৩৬না পাবা ঙম্বা মী লৈরবদি লুপা লাখ ১গী মনা পীজগনি: জে এ সী ফোর মীতৈ ময়েক
ইম্ফাল, মার্চ ০১ : মীতৈ ময়েক মূত্থৎলগা বেঙ্গলি ময়েক চৎহন্নবা পুয়া মৈ থাখি, বেঙ্গলি ময়েক ওইনা তমহন্নবা হোৎনরকখি হায়রদুনা ঙসিগী মীরৈাল অসিগী মমাঙদা মীতৈলোল তম্লমদে। বেঙ্গলি ময়েক্না ইবা বেঙ্গলি লোলগী লাইরিক তম্লম্মী। ইমালোল তমহল্লমদে। মপা মমানা কৌজবা, মপু মবেননা কৌজবা ইবোহল, ইবেয়াইমা, ইবোতোম্বা পূম্নমক এল পি স্কুলদা মীং চনবা মতমদা কুমারকান্ত, চন্দ্রকুমার, বিরমঙ্গল ওন্থোকই হায়না জোইন্ট এক্সন কম্মিটি ওন মীতৈ ময়েক্কী জেনারেল সেক্রেটারি সিনামচা অপানবা খুমনগী চেরোল অমনা ফোঙদোরক্লি।
চেরোল অসিনা মখা তানা হায়, ইশাগী ময়েক ইশাগী ইমালোল মাঙহন্নবা হোৎনরকপা তমথীরবা খোঙথাং অসি মীতৈ ময়েক্তসু চত্থরকই। হান্ন লৈরম্বা ময়েক ২৭ অসিগী মথক্তা বেঙ্গলি ময়েক্কী ঋ, ৯, ঞ, ড়, ঢ়, য, য, ট, ঠ, ড, ণ, ছ, ক্ষ ঁ অমসুং হিন্দুতন্ত্রগী সিম্বল অঞ্জিনচিংবা হাপচিল্লগা শেশজিল্লকখি। অদুবু হাপচিল্লিবা ময়েকশিং অসি মালেমগী লোল অমত্তদা শীজিন্নফম লৈতবগুম মীতৈলোলদসু শীজিন্নফম লৈতবা মরম্না পুয়া ইবদা য়াওদে। শেমজিল্লগা চেন্না অমদা অসুম থম্বগী ৱাদনি। পুয়া ইবদদি মীতৈলোলনা ইবা মরম্না পুয়া ইবদা চন্নফম লৈতে হায়রি।
পুয়া পূম্নমক চৎনরিবা মীতৈ ময়েক ২৭ অসিনা ইবা ঙাক্তনি। নূঙদা হকপা ষ্টোন ইনস্ক্রপ্টসনশিংদা মীতৈ ময়েক ২৭ কা বেঙ্গলি ময়েক্কা য়ান্নরগা ইবনি। নরসিংহ ইবদা ময়েক ৩৬ শীজিন্নফম লৈতে, শকাব্দ ইবদা বেঙ্গলি অঙ্ক ময়েক এক, দো, তিন, চার অসি ইরক্লি। ময়েক ৩৬না ইবা পুয়া অমত্তা লৈতে, ষ্টোন ইনস্ক্রপ্টসনসু অমত্তা লৈতে হায়রি।
চৈথারোল কুম্বাবা ময়েক ৩৬না ইবা নত্তে, ময়েক ২৭ না ইবনি। লমায় থাবদা শ্রী ১ (শ্রী এক) শ্রী ২ শ্রী দোনচিংবা বেঙ্গললি ময়েক হাপচিনবদনি। নিংথৌগী মমাঙদা ইবা নত্তনা নিংথৌ য়াওদনা ইবা য়াদবা শাগৈ পূম্নমক্কী হৌরকফম ওইবা পুয়াসিগী ৱাহৈ লিশীং ১০ মুক অসি ময়েক ৩৬ হায়দুনা শেমজিল্লবা অসিনা ৱাহৈ অমখক্তং ফাওবা পাবা ঙমদে। শঙ্গাই ফম্মাং পুয়াবু ময়েক ৩৬ না পাবা ঙম্বা মী য়াওরবদি জোইন্ট এক্সন কম্মিটি ফোর মীতৈ ময়েক্না লুপা লাখ ১ গী মনা পীজগনি হায়রি।
পুয়া মৈ থাদ্রিঙৈগী পুয়া অমত্তা ময়েক ৩৬ না পাবা ঙমদে। মরমদি ময়েক ৩৬ তা ‘ই’ ময়েক্না ‘উ’ ময়েক্কা য়াওদে। পুয়া মৈ থাদ্রিঙৈগী পুয়া ৱাচেৎলোন পাথুপ, খমওই য়াংওই শেকনিং, নিংথৌ ঙাসাবা সিংকক, ৱাকোক থিলেন সলাই অমাইলৈান পুকোকনচিংবা পুয়াশিংদি ‘ই’ ‘উ’ ময়েক অনী অসি য়াওবা ঙাক্তনি। ময়েক ২৭ না অরিবা পুয়া পাবা ঙমদে হায়বা মীনম্বা ৱা অসি অমুক হন্না হায়বা য়ারোই।
অরিবা পুয়া অমত্তা পাবা য়াদ্রিবা অসিদি বেঙ্গলি ময়েক থোমজিল্লগা অশেংবা মীতৈ ময়েক্কী শক্তম মাঙহনগে হায়বগীদমক অকল অলিং য়াম্না শীংবীগনু। মীতৈ ময়েক ২৭ তা বেঙ্গলি ময়েকশিং অসি হেক হাপচিনবদা মীতৈ ময়েক লৈরমদে, বেঙ্গলি ময়েক উরুরগা মীতৈ ময়েক শেমখিবনি হায়দুনা ডা. প্রিয়াসননা ইবা লাইরিক ‘লিঙ্গুইস্টিক সার্ভে ওফ ইন্দিয়া, ভোল্যুম-৩’দা ইদুনা লৈখ্রবদু শৌগৎপা ওইগনি। মসিদা এদ্যুকেসন মিনিষ্টারনা শুকখঙ খঙদনা মাঙ তাক্নবা খোঙথাং মীতৈ ময়েক ২৭ তা লৌরক্লবদি জোইন্ট এক্সন কম্মিটি ফোর মীতৈ ময়েক্না পোকপিরমদবনা হেন্না ফবা এদ্যুকেসন মিনিষ্টারনি হায়বা মীংথোল অসি পীজগনি হায়রি।
সোর্স: হুইয়েন লানপাউ।
0 কমেন্ট:
কমেন্ট তৌবিয়ু