সোরোকখাইবম গম্ভিনী সাহিত্য একাদেমি এৱার্দ ফংলে
ইম্ফাল, দিসেম্বর ২০ঃ চহী খুদীংগী সাহিত্য একাদেমিনা লৈবাকসিগী শকখঙলবা লোন ২৪ গী ওইনা অফবা লাইরিক অমমম সাহিত্য একাদেমি এৱার্দ পীনবগীদমক খনগৎপদা কুমসি চহী ইং ২০২৩ গী মণিপুরী লোনগী ওইনা ত্রিপুরাগী অইবী সোরোকখাইবম গম্ভিনীগী ‘য়াচঙবা নঙ হল্লো’ হায়রিবা শৈরৈং লাইরিক অসি য়াওরে। চহীসিগী সাহিত্য একাদেমি এৱার্দকী খল্লবা অইবী অসিগী লাইরিক অসি ইং ২০১৮ দা ফোঙখিবনি।
একাদেমি অসিগী ঙসি ফমখিবা একজিক্যুতিব কাউন্সিলনা জুরিশিংগী রিপোর্ত য়েংলগা শৈরেং লাইরিক অসিবু খনখিবনি হায়রি। মণিপুরী লোনগী ওইনা জুরি ওইখিবশিং এল বিরেন্দ্রকুমার শর্ম্মা, দাঃ কে মেমতোন দেবী অমসুং দাঃ ৱাইখোম রোমেশনি।
এৱার্দ অসি লাক্কদৌরিবা চহী ইং ২০২৪ গী মার্চ ২৪ দা দিল্লীদা লৈবা কমানি ওদিতোরিয়ামদা লান্থোক্কনি হায়রি। এৱার্দ অসিদা শেল ওইনা লুপ লাক্ষ ১, শাল অমসুং শেঞ্জেংগী কাস্কেত অমা য়াওরি।
অইবী সোরোকখাইবম গম্ভিনী ইং ১৯৭১ দা ত্রিপুরাদা ধরাই জিলাগী মনুং চনবা কমলপুর, বর্সুরমাদাদা পোকই। হৌজিক্না ত্রিপুরাগী নরায়নখামারদা লৈবা বিনোদ কুমার সিনহাগা য়ুম্বাল লম্বীদা খোঙদামিন্নদুনা লৈরি। মশামক এম এ (সংস্কৃত) অমসুং হিন্দী কোবিদনী। হৌজিক-হৌজিক ত্রিপুরা য়ুনিভার্সিতিগী হোস্তেল ৱার্দেন ওইনা থৌ পুরি। মণিপুরী অমসুং বাংলা লোল অনীমক্তা খুৎলোয়না ইরিবী গম্ভিনী অইবী, ক্রিতিক অমসুং হন্দোক্লোয়নি। অইবী অসি হৌজিক মণিপুর সাহিত্য পরিষদ, ত্রিপুরাগী একজিক্যুতিব বোর্দকী মেম্বার, কালচারেল ফোরাম মণিপুরগী লাইফ মেম্বার অমসুং ত্রিপুরা গবর্নমেন্তগী দিবলপমেন্ত ওব মণিপুরী লেঙ্গুয়েজ গী এদভাইজরি বোর্দকী মেম্বারসু ওইরি।
অইবী অসিগী হৌজিক ফাওবদা ফোঙখ্রবা লাইরিকশিংদি-হংলক্কনু ৱাহং অদো (শৈরেং-২০০১), সুব্রামের নির্বাচিত ছোটগল্প (হন্দোকপা বাংলা ৱারী মচা-২০০৫), বিদায়! কলৈপাক বিদায় (শৈরেং-২০০৭), তরঙ্গ ও আকাশ (শৈরেং হন্দোকপা-২০১০), য়াচঙবা নঙ হল্লো (শৈরেং-২০১৮) অসিনচিংবনি।
অইবী অসি মণিপুরী সাহিত্য পরিষদ, ত্রিপুরানা পীবা মোইরাংথেম লৈহাওতোম্বী নীংশিং মনা (২০০৮), মণিপুরী সাহিত্য পরিষদ, আসামনা পীবা মোইরাংথেম ওংবী হেমাবতি লিতরেরি এৱার্দ, মণিপুর সাহিত্য পরিষদ, ইম্ফালনা পীবা কামিণি কুমার গোল্ড মেদল (২০১০), মণিপুরী লিতরেরি সোসাইতি, আসামনা পীবা য়েংখোম প্রভাবতি মেমোরিয়েল এৱার্দ, মনাসি (সাহিত্য সাময়িকি), আগরতলানা পীবা কবি কারবি দেববর্মন সাহিত্য সম্মান (২০২০), ভারত বাংলাদেশ মোইত্রি সংসদ, আগরতলানা পীবা ভাষা সম্মান (২০২৩) অসিনচিংবা মনা কয়াসু ফংখ্রে।
অইবী অসিগী শৈরেংশিং বাংলা, ইংলিশ, গুজরাতিদা হন্দোক্তুনা মথংশীৎনা ‘দান্সিং আর্থ’, এন্থোলোজি ওব কন্তেম্পররি পোইত্রি ফ্রোম দা নোর্থ-ইস্ট, ‘ইন্দিয়ান লিতরেচর’, ‘ওক্সফোর্দ এন্থোলোজি ওব রাইতিং ফ্রোফ নোর্থ-ইস্ত ইন্দিয়া’, ‘নিষান্দন’, ‘দ ব্রোদার লেন্দস ওব এসিয়া, কেমব্রিজ প্রেস, যু এস এন চিংবদা ফোঙখ্রে। লোয়ননা অইবী অসি তোঙান তোঙানবা মফমদা পাঙথোকপা কবি সম্মেলন কয়াদসু শরুক য়াখ্রে।
নীংশিংবা য়াই, হৌজিকফাওবদা মণিপুরগী মপালদা লৈবা মণিপুরী অইবা অইবী ৪না সাহিত্য একাদেমি এৱার্দ ফংবা ঙমখ্রে। ইং ২০১২ দা সিলচরদগী লৈখিদ্রবা ওইনাম কৈশাম প্রিয়োকুমারগী ‘নোংদি তারকখিদ্রে’ হায়রিবা ৱারী মচাগী লাইরিক অসিবু বাংলাদা ‘বৃষ্টি আর হলো না’ হায়না হন্দোকখিবদা বাংলা লোনগী ওইনা সাহিত্য একাদেমিগী ত্রান্সলেসন প্রাইজ ফংখি। ইং ২০১৪ দা কাছারদগী নাওরেম বিদ্যাসাগরনা মহাক্কী শৈরেংগী লাইরিক ‘খুঙ্গং অমসুং রিফ্যুজি’ দা সাহিত্য একাদেমি এৱার্দ ফংখি। ইং ২০১৬ তা গুৱাহাতিদা লৈবী অইবী অনিতা নিংঙোম্বমনা ইন্দিরা গোস্বামিনা আসামীজদা ইবা ওতোবাইওগ্রাফি ‘অধা লেখা দাস্তাবেজ’ বু মণিপুরী লোনদা ‘ইবা লোইশিনখিদ্রবা পুন্সি ৱারী’ হায়না হন্দোকখিবা লাইরিক অসিসু সাহিত্য একাদেমিগী ত্রান্সলেসন প্রাইজ ফংবা ঙমখি। লোয়ননা চহী অসিগী ওইনা ত্রিপুরাগী সোরোকখাইবম গম্ভিনীনা মহাক্কী শৈরেংগী লাইরিক ‘য়াচঙবা নঙ হল্লো’ হায়বসিদা সাহিত্য একাদেমি এৱার্দ ফংলিবসি থারগা মপালদা লৈবা মণিপুরী অইবা অইবী একাদেমি এৱার্দ ফংবা ৪ শুরে।
ত্রিপুরাগী ওইনা গম্ভিনীনা অহানবা সাহিত্য একাদেমী এৱার্দ ফংবা অইবী অমা ওইবদা নত্তনা মপালগী মণিপুরীশিংগী মরক্তসু নুপী মরক্তা ওরিজিনেল ৱার্কতা একাদেমি এৱার্দ ফংবী অহানবা অইবীসু মহাক্না ওইরে।
সোর্স: পোক্নফম
0 কমেন্ট:
কমেন্ট তৌবিয়ু