পাওনা ব্রজবাসিগী ১৯০ শুবা মপোক কুমওন থৌরম পাঙথোকখ্রে, লাইরিক অমসু ফোঙখ্রে
ইম্ফাল, দিসেম্বর ২০ : মণিপুরগী অরোইবা নীংতম লানফমদা মরৈবাক্কীদমক থৱায়না পোন্থা পীখ্রবা অথৌবা পাওনা ব্রজবাসিগী ১৯০শুপা মপোক কুমওন থৌরমগা লোয়ননা লোংজম সোমোরেন্দ্র (অরুন) না এদিত ওইবা ‘পাওনা ব্রজবাসি অমসুং খোংজোম লাল’ হায়না মিংথোনবা লাইরিক অমা ঙসি বি তি রোদতা লৈবা রূপমহল থিয়েটার ফোঙখ্রে।
রূপমহল থিয়েতার অমসুং জি এম পাব্লিকেসন্স, কৈশামথোংনা শীনখিবা থৌরম অদু খোঙজোম লানবু শৈথাদুনা শকপা শৈহৌ ঈশৈ অমগা লোয়ননা হৌদোকখি। তুংদা অথৌবা পাওনা ব্রজবাসিগী ফোটোদা হৈকৎ লৈকৎ তমখি।
থৌরম অদুদা চীফ গেস্ত ওইনা শরুক য়াখিবা আর্ত এন্দ কালচারগী কমিশনার এম জয়না হায়, ইং ১৮৩৩ দা পোকখিবা পাওনা ব্রজবাসি মশাগী চহী ১৭ শুরকপা মতমদা মহাক্কী অপোকপা লৈখিদে। অপোকপীনা ফনা খাম্লবসু মহাক মতম অদুদা অপোকপগী মথৌ মঙম পাঙথোক্নবা বৃন্দাবন্দা চৎখি। মফম অদুদা চহী তরেৎ চূপ্না লৈদুনা মফম অদুগী লাইফমশিং কোয়না চৎখি অমসুং ১৮৫৬ কী লোইরকপদা য়ূমদা হল্লকখি। পাওনা ব্রজবাসি মহাক্কী মমানা চেকশিন্না শেন্নবীদুনা জেনারেল লোংজম রোমাদগী মহাক্না পামজরিবা থাঙগী মহৈ তম্লকখি হায়নসু এম জয়না হায়খি।
মহাক্না মখা তাখি, পাওনা ব্রজবাসিবু মহারাজ চন্দ্রকীর্ত্তিনা জুনিয়র ওফিসার ওইনা লৌশিনখি। নিংথৌবু এম্বুশ তৌরকপদগী মহাক্না নান্থোক্নবা শীনখিববু অপেনবা পোক্লদুনা নিংথৌনা সুবেদারগী ফমথোন, লৌ পরি অহুম অমসুং নিংথৌনা ফি য়ান্দুনা ইকায়খুম্নখি। পাওনা নিংথৌ অমসুং বৃটিশকী মরক্তা লৈনরিবা মরী অসি পাম্লমদে। মরম অসিদগী ইং ১৮৮৬ অদুৱাইদা মহাক সুবেদারদগী পোত্থানিংখি। বৃটিশকী পূক্নিং-ৱাখল্লোন খঙবদগী মহাক ভলুন্তরি রিতয়ার্দমেন্ত লৌখি। অদুবু মসিগী মতুংদা লান লাকপদগী পাওনা ব্রজবাসিবু কৌখৎতুনা য়াওহনখিবনি।
পাওনা ব্রজবাসি মশাগী অনিংবা অমসুং অপাম্বা পাঙথোকপদা শেম্বীবা মপুদা চেৎনা থাজবা মী ওইরকপনা শেম্বীবা মপুনসু মহাকপু থৌজনবীদুনা অথৌবা মীশক অমা ওইখি হায়নসু জয়না ফোঙদোকখি।
রিমসকী ক্লিনিকেল সাইকোলোজি গী ফোর্মার ঐচ ও দি ময়েংবম অক্ষয়কুমারনা প্রিসাইদ তৌখিবা থৌরম অদুদা রূপমহল থিয়েতারগী ভাইস চেয়ারমেন লোইতোংবম ব্রজমোহন, জি সি এন এস এগী প্রধান গুরু লৈমপোকপম লাকপতি অমসুং অইবা ক্রিতিক লাইশ্রম মেমোনা গেস্ত ওব ওনারশিং ওইনা শরুক য়াখি।
ঙসি ফোঙলিবা ‘পাওনা ব্রজবাসি অমসুং খোংজোম লাল’ হায়রিবা লাইরিক অসিদা য়াওবা চেপ্তার খরগী অইবা ওইরিবা, ওল মণিপুর য়ুনাইতেদ ক্লাবস ওর্গানাইজেসন (অমুকো) গী প্রেসিদেন্ত নন্দো লুৱাংসু ঙসিগী থৌরম অদুদা খোঙজোম লানগা মরী লৈনবা হিস্তোরিকেল রেকোর্দ কয়াবু মীয়ামদা অমুক হন্না নীংশিংখি।
সোর্স: পোক্নফম
0 কমেন্ট:
কমেন্ট তৌবিয়ু