লৈঙাক্কী ডিরেক্টরেট মাইনোরিটি ল্যাঙ্গুয়েজনা মণিপুরী ল্যাঙ্গুয়েজ ডে পাঙথোকখ্রে
আগরতলা : আগস্ত ২৫ : ত্রিপুরা লৈঙাক্কী ডিরেক্টরেট অব ককবরক এ্যন্ড আদার মাইনোরিটি ল্যাঙ্গুয়েজনা শীল্লাংদুনা ৩৩শুবা মণিপুরী লোলগী নুমিৎ থৌরম পাঙথোকখ্রে। চৎখিবা আগস্ট ২০, আগরতলা মুক্তধারা অডিটোরিয়ামদা পাঙথোকখিবা থৌরম অদু এ. এম. সিগী মেয়র দীপক কুমার মজুমদারনা চীফ গেস্ট ওইরগা লোয়শঙ অসিগী ডিরেক্টর রত্নজিৎ দেববর্মানা থৌরম মপু ওইবিখি।
থৌরম হৌবগী মমাংদা ইমালোলবু নুংশিজবাশিংনা মাস রেলি অমসু থোকখি
মৈরা চুখক্তুনা থৌরমদু হৌগৎপীরম্লগা চীফ গেস্ট অচীনবা থবক অমগী মরম্না হনখি। থৌরম অদু গেস্ট অব অনার ওইনা শরুক য়াদুনা মণিপুরী লোলগী এডভাইজরি কমিটিগী ভাইস চেয়ারম্যান থৌদাম নীলকুমার, সাহিত্য পরিষদকী প্রেসিডেন্ট এল বীরমঙ্গল সিংহ, সিনিয়র জার্নালিষ্ট কোন্সম মনীন্দ্রনা নুমিৎ অসিগা মরী লৈননা ৱা ঙাংখি। গেষ্ট অব অনার ওইখিবা সাহিত্য একাডেমি, নিউ দিল্লীগী মণিপুরী ল্যাঙ্গুয়েজ বোর্ডকী মেম্বর খোইস্নাম বীরলানা ভারত সরকারনা ৮শুবা সেদ্যুল্ডা মণিপুরী লোল অসিবু শক খঙবগুম্না ত্রিপুরা সরকারনা মণিপুরী লোল অসিবু শক খঙদুনা স্কুলদা তম্বী তাকপীবা হৌদোকখিবা এপ্রিল তাং ১৩ নুমিৎ অসিবুসু ঐখোয়না ইকাইখুম্নরদুনা পাঙথোকপা য়াই হায়না ফোঙদোকখি। নুমিৎ অসিগা মরী লৈননা তোঙান তোঙানবা হীরমদা খুন্নাইগী থোইদোকপা মশক নাইরবা এল খেলেন্দ্রে সিংহ, ডব্লিউ অরন্য সিংহ, আরকে জিতেন্দ্রজিৎ অমসুং আব্দুল নুর মীওই মরিবু ইকাইখুম্নখি। থৌরম মপু ককবরক লোয়শঙগী ডিরেক্টর রত্নজিৎ দেববর্মানা থাগৎ ৱাহৈ ফোঙদোকপীখি।
অরোইবদা কালচারেল প্রোগ্রাম অমসু পাঙথোকখি
থৌরম হৌবগী মমাংদা ইমালোলবু নুংশিজবা অইবা-অইবীশিংনা য়াকাইরোল ঈশৈ শক্তুনা মাস রেলি থোকখি অমসুং নুমিৎ অসিগা মরী রৈননা এল কুমারনা মোডেরেটর ওইদুনা পাঙথোকখিবা সিম্পোজিয়ামদা কোন্সম মণিন্দ্র, ডব্লিউ বীরমঙ্গল, এল বীরমঙ্গল, থাংজম রথীন্দ্র, টিএইচ নীলকুমার শরুক য়াখি। কবি এন প্রফুল্ল বিজয়না শৈদিন পুরেল ওইদুনা শৈরেং শৈদিন্নবগী থৌরম অমসু পাঙথোকখি। মদুদা শরুক য়াখিবা কবিশিংদি-বীরলা, মীনা, উমা, মলিনা, মৃনাল, খেলামোহন, মাধবী, অপূর্বিতা, সুরেখা, রঞ্জনা, ধীরেন, যোগেন্দ্র, পুষ্পিতা, শুভনা, সৈব্যা, লৈনা, গন্ধেশ্বরী, কৃষ্ণা, প্রনয়, অতুল রিক নচিংবা ২০না শরুক য়াদুনা মণিপুরী লোলনা শৈরেং পাঙথোকখি। অরোইবদা কালচারেল প্রোগ্রাম অমসু পাঙথোকখি।
সোর্স: মরূপ
0 কমেন্ট:
কমেন্ট তৌবিয়ু