রাধানগরদা ২২২ শুবা ঐতিহাসিক মহারাস লোয়ননা ত্রিপুরাগী মফম কয়াদসু রাসলীলা পাংথোকখ্রে
আগরতলাঃ রাধানগরগি শ্রী শ্রী রাধামাধব দেবতা বাড়ী মান্ডবতা তখেনগী ঐতিহাসিক মহারাস জগোই পাঙথোকখ্রে। চৎখিবা নভেম্বর তাং ২৯, নিশিথ পুর্নিমাগী থাবল্লক্তা ২২২ শুবা মহারাস অদু পাঙথোকখি। শিলচরগী রাজকুমার সত্যজিৎনা রাসধারী ওইদুনা হন্দক চহী পাঙথোকখিবা মহারাসতা গোপী ১৮ শরুক য়াখি। মহারাস অদু ত্রিপুরাগী ফরেষ্ট মিনিষ্টর মেবার কুমার জামাতিয়ানা মৈরা চুখৎলবা মতুং নট সংকীর্ত্তননা থৌগন তৌদুনা মহারাসতা যুগল মুর্ত্তি লেংথোক্লগা গোপী ময়াম্না নুমিদাং চুপ্পা রাসলীলা অদু শান্নখি। মথং নুমিৎ তোঙান তোঙানবা মৈতৈ খুঙ্গং খরদসু চৎনবী পথাপ মতুং ইন্না ষনশেনবা অমদি চহীগী রাসলীলা পাঙথোকখি। অৱাং জিলা মনুং চনবা কাঞ্চনবাড়ী মৈতৈ খুঙ্গং পুখ্রী অচৌবীগী শ্রী শ্রী রাধাগোবিন্দ মান্ডবতা শক্নাইরবা ওজা নিংঙোম্বম বীর সিংহনা রাসধারী ওইরগা ষনশেনবা অমদি রাসলীলা জগোই শান্নখি। নুংথিল পুং ১দগী ষনশেনবা জগোই শান্নখিবা মতুং নুমিদাং চুপ্পা গোপী ময়াম্না রাস লীলা শান্নখি।
রাসলীলাদা শরুক য়াখিবা সূত্রধারীশিংদি কৈসাম ওংবী প্রভাবতি, থৌনাওজম হীরা দেবী, এস সবিতা এল নন্দিতা শর্ম্মা, শান্তনা দেবীনি। রাসলীলাদা নিঙোম্বম ওংবী পুস্পিতা দেবীনা গোপী মকোক চিংখি হায়রি। অসোমদা ধলাই ডিষ্ট্রিক্ট মনুং চনবা মৈতৈ খুঞ্জাও অনী পাঞ্চাসী অমসুং কুচাইনালাদসু চহীগী রাসলীলা অমদি ষনশেনবা লীলা পাঙথোকখি। কমলপুর পাঞ্চাসীদা পাঙথোকখিবা ষনশেনবা অমদি রাসলীলাদা হুইয়াম ওংবী অনিতা সিংহনা রাসধারী ওইখি। অদুগা সুত্রধারীশিং মখোয় অদুদি ঙাঙোম ওংবী সুচিত্রা, থোঙ্গাম ওংবী রুহিনী দেবী, থোঙাম ওংবী গুনবতি অমসুং থাংজম নিঙোল কানন সিংহনা মকোক চিংদুনা গোপীশিং শরুক য়াখি। কুচাইনালা শ্রী শ্রী তৃনপ্রভু মন্দির মান্ডপতসু ষনশেনবা অমদি রাস লীলা শান্নখি। ওজা নিঙোম্বম বীর সিংহগী পৌরা খোয়াইগী নিঙোল নোংগ্রাকপম চনু অনন্তা দেবীনা রাস ধারী ওইরগা রাধা-কৃষ্ণ য়াওনা গোপী ১০ শরুক য়াদুনা রাসলীলা শান্নখি। ঈশৈ জগোই পাম্বা সংস্কৃতিপ্রেমী তখেনগী মৈতৈ খুঙ্গং খুঙ্গংদা চহীগী ওইনা নাৎকী থৌরম অসুম্না লেংদনা পাঙথোক্লি। ঙসি ইরাই ডিসেম্বর ৪, বিশালগড় সাব ডিভিশন মখাদা ঢাকার বাড়ী মৈতৈ খুঞ্জাওদা নুপান শাবা রাসলীলা শান্নগদৌরি। চহী ৫০ রোমগী মতুঙ হায়রিবা খুঙ্গং অসিদা নুপা রাস লীলা শান্নগদৌবনি হায়রি।
সোর্সঃ মরূপ
0 কমেন্ট:
কমেন্ট তৌবিয়ু