মীগী লাইনীং, মীগী চৎনবী য়াম্না পাম্লকপদগী ঐখোয়গী ইরমদম ইরৈপাকসি মাঙলকপনি: চাউবা
ইম্ফাল, নভেম্বর ১৪ : মীগী মনাৎ, মীগী লাইনীং, মীগী চৎনবী য়াম্না পাম্লকপদগী ঐখোয়গী ইরমদম ইরৈপাক অসি মাঙলকপনি হায়না সোইবম লৈকায়দা লৈবা হেল্লি ইংলিস স্কুলগী প্রিন্সিপাল নিঙথৌখোংজম চাউবা মীতৈনা ফোঙদোকখ্রে হায়না কংলৈ ইন্দিজিনাস মার্সেল আর্টস এন্দ কালচারেল সোসাইটি (কিমাক্স) কী এসিষ্টেন্ট পাব্লিসিটি এন্দ ইনফোর্মেসন সেক্রেটারি দব্লিয়ু য়ূমঙাংবা মীতৈনা থাদোরকপা চেরোল অমনা ফোঙদোরক্লি।
ৱাফম অসি মহাক্না থাঙ-তা দেগা মরী লৈননা হৌখিবা নভেম্বর ১০দগী হৌদুনা লেপ্পা লৈতনা কিমাক্সনা শীন্দুনা তোঙান-তোঙানবা মফমশিংদা পাঙথোরকপা থৌরমগী মখা চত্থরকপা ওইনা থাঙ-তা ফোর রিজিলিয়েন্স ইন টাইম ওফ ষ্ট্রাইফ হায়বা থীমদা সোইবম লৈকায়দা লৈবা হেল্লি ইংলিস স্কুলদা পাঙথোকখিবা থৌরম অমদা ফোঙদোকখিবনি। থাঙ-তা দেগী থৌরম অসি হৈঙাং কোন্থা মখা লৈকায়দা লৈবা মোদেল ক্লাবতসু পাঙথোকখি হায়রি।
সোইবম লৈকায়দা লৈবা হেল্লি ইংলিস স্কুলদা পাঙথোকখিবা থাঙ-তা দেগী থৌরম অদুদা স্কুল অসিগী প্রিন্সিপাল নিঙথৌখোংজম চাউবা মীতৈনা হায়খিবদা, থাঙ-তা মহৈ অসিগী মনুং চন্না য়াওরিবা শরিৎ-শরাক, খোঙলোন-খূৎলোন, মীহাৎ-মীকল, শরৈ শরাৎ অমদি য়েক্নবগী মতৌ করম্না ঙাকথোক্কদগে হায়বগী কাঙলোনসু মহৈরোয়শিংদা তাকপী-তম্বীবগী তঙাইফদবা লৈ।
মহৈরোয়শিংদসু থায়নগী ইপা-ইপু হাক্তক্তগী লৈরক্লবা য়াম্না তাঙলবা য়েক্নবদগী মশাবু মতৌ করম্না ঙাকথোক্কদগে হায়বগী কাঙলোনশিং থাঙ-তা দেগী মনুং চন্না তাকপী-তম্বীরি। ইপা-ইপুশিংনা থম্বীরম্বা থাঙ-তাগী তাঙলবা মহৈশিং অসি হৌরক্লিবা মীরোলশিংদা ঐখোয় পূম্নমক্না তাকপী-তম্বীবগী তঙাইফদবা লৈ হায়নসু ফোঙদোকখি হায়রি।
ঙসি পাঙথোকখিবা থৌরম অদুদা হৈঙাং কোন্থা মোদেল ক্লাবকী প্রেসিদেন্ট ইরোম ইবোতোম্বা, মোদেল ক্লাবকী এদভাইজর মুতুম কোন্দুম, থাঙ-তা দে ওবজার্ভেসন কম্মিটিগী চ্যেরমেন ইরোম ইবোমচা, থাঙ-তা দে ওবজার্ভেসন কম্মিটিগী ভাইস চ্যেরমেন লৈতান্থেম ধমেন্দ্রো, ওফিস কোওর্দিনেটর অরাম্বম তোন্দাং মীতৈ, কিমাক্সকী প্রেসিদেন্ট নিংথৌজম অজিৎ কুমার মঙাং, স্কুলগী মহৈরোয়শিং অমদি লাঞ্জেন্নরক্তুনা রিলিফ কেম্পতা চঙজফম লৌদুনা লৈরিবা ইনমেটশিংসু শরুক য়াখি হায়না চেরোলসিনা মখা তারি।
সোর্স: হুইয়েন লানপাউ
0 কমেন্ট:
কমেন্ট তৌবিয়ু