মালেমদা মেরা হৌচোংবা কুহ্মৈগুম্বা লৈমগনি হায়বা থাজদে: লৈশেম্বা
ইম্ফাল, ওক্টোবর ৯ : মণিপুরদা খুন্দামিন্নরিবা ফুরুপশিংগী য়াম্না শেংলবা কুহ্মৈ ওইবতা নত্তনা মৈহৌরোলদগী লৈরক্লবা চীংমী-তম্মী মচিন-মনাও ওইবগী অচেৎপা নুংশিবগী মরী ঊৎলিবা কুহ্মৈ মেরা হৌচোংবা ঙসি নাৎকী ওইবা চৎনবীগা লোয়ননা হরাও-তরাম্না পাঙথোকখ্রে।
মণিপুর গবর্ণমেন্তনা মপূং ওইবা থৌদাং লৌরগা স্তেত লেবেল ওর্গানাইজিং কমিতি ওন মেরা হৌচোংবা কমিটিনা শীন্দুনা সনা কোনুং অমসুং কংলাদা পাঙথোকখিবা থৌরম অদুগা মরী লৈননা ঙসি অয়ূক রাজ্য সভাগী এম পিসু ওইরিবা মণিপুরগী নিংথৌ লৈশেম্বা সনাজাওবনা লুচিংদুনা লমদম অসিদা খুন্দামিন্নরিবা তোঙান-তোঙানবা ফুরুপশিংনা মাগী-মাগী নাৎকী ওইবা ফিজোলশিং শেৎ-চাদুনা সনা কোনুংদগী কংলা তম্না কালচারেলগী ওইবা খোঙচৎ অমা চৎতুনা হৌদোকখি।
কংলাদা লাইগী ওইবা থৌরম কয়া পাঙথোক্লবা মতুংদা কংলা মেরা মেন তোংবা অমসুং য়েনখোং তম্বগী থৌরম পাঙথোকখি। কংলাদা চীংমি-তম্মী কয়ানা শরুক য়াদুনা ঙসি নুংথিল পাঙথোকখিবা থৌরম চীফ গেস্ত ওইনা শরুক য়াখিবা মণিপুরগী নিঙথৌ লৈশেম্বা সনাজাওবনা হায়খি, মেরা হৌচোংবগী থৌরম অসি য়াম্না লিরবা চহী লীশীং ২ হেল্লবা নোংদা লাইরেন পাখঙবা মতমদগী হৌরকখিবনি।
চীং-তম অনীগী য়াম্না নুংশিবা অমত্তা ঙাইরবা কুহ্মৈনি। মালেমদা অসিগুম্বা কুহ্মৈ অসি লৈরমগনি হায়বা থাজদে। য়াম্না কমন ওইবা কস্তমরি ফেস্তিবেল অমখক্নি। মালেমগী অমদি ইন্দিয়াগী মফম খুদীংমক্তা থেংনবা অমদি মণিপুরদা কুহ্মৈ ময়াম অমা থেংনৈ। হায়রিবা কুহ্মৈ অসি অকক্নবা কম্যুনিতি অমদা বেজ তৌবা, অকক্নবা লাইনিং অমদা বেজ তৌবনা অয়াম্বা ওইনা তৌই। অদুবু মেরা হৌচোংবা হায়রিবা কুহ্মৈ অসিদি জাতি পুম্নমক্কী ওইবা ধর্ম পুম্নমক্কী ওইবা ঐখোয় ময়ামগী অপুনবগী কুহ্মৈ অমনি।
চীংমী য়াওদনা মেরা হৌচোংবা য়ারোই। অদুগা তম্মী য়াওদনসু মেরা হৌচোংবা য়ারোই। হায়রিবা কুহ্মৈ অসি লমদম অসিদা খুন্দারিবা নীংশিংবা থোক্ত্রিঙৈদগী লাক্লবা ফুরুপ খুদীংমক্কী কুহ্মৈনি হায়বসি মতম চুপ্পদা কাওরোইসি। থৌরম অসি চীফ মিনিস্তর এন বীরেনগী লৈঙাক লাকপদগী য়াম্না মচু থোকপা থৌরম অমা ওইরে।
থৌরম অদুদা শরুক য়াখিবা ৱার্ক্স এন্দ য়াসকী মিনিস্তর গোবিন্দাস কোন্থৌজমনা হায়খি, লাইনিংনা ঐখোয় মশেল তোঙান-তোঙান তাহল্রবসু পোলিতিক্সনা ঐখোয়বু অমত্তা ওইনা পুনশিন্নবগী তঙাইফদবা লাক্লে। পুনশিল্লবদি ঐখোয়গী পাঙ্গল থৌনা হেনগৎকনি। মেরা হৌচোংবগী কুহ্মৈ অসিনা ঐখোয়ন পুনশিন্নদুনা হেন্না মশক থোকপা অমা ওইহল্লসি।
থৌরমগা মরী লৈননা খোঙলৈহনবা এ এস ৱুঙনাওয়ো জিমিক মেরা হৌচোংবা এৱার্দ-২০২২ নিংথৌ এ এস ৱাংয়ুং পিতর থাৱাইজাও, হুংপুংদা মণিপুরগী নিংথৌ লৈশেম্বা সনাজাওবনা পীদুনা ইকায় খুম্নবা ঊৎখি। ঙসিগী থৌরম অদুদা মিনিস্তর, এম এল এশিং, চীংগী খুল কয়াগী খুল্লাকপশিং অমদি থৌবুরোইশিংনা শরুক য়াখি। মেরা হৌচোংবা থৌরমদা শরুক য়াখিবা চীংমী-তম্মী অনীগী মরক্তা পোৎ লান্নখি। কাঙলূপশিংনা মশাগী নাৎকী ওইবা জগোয় ঈশৈসু লান্থোকখি।
সোর্স: পোক্নফম
0 কমেন্ট:
কমেন্ট তৌবিয়ু