মণিপুরী শৈরেংগী নুমিৎ-২০২২ দা ইকাইখুম্নবা উৎচখিবা মণিপুরী লোলগী শক্নাইরবা অশৈবা
ইকাইখুম্নবা উৎচখিবা অশৈবা মোইরাংথেম রাজেন্দ্র সিংহ:-
মোইরাংথেম রাজেন্দ্র (মোইরাংথৌ) সিংহ কুমজা ১৯৪১ গী ফেব্রুৱারিগী তাং ১৫, থাংজ নুমিৎতা তেন্থা খুঞ্জাও ময়াই লৈকাই, থৌবাল দিষ্ট্রিক্টতা পোকই। অপোকপগী মিংনা ইবোতোম্বী (চাউবা
) অমসুং অপোকপীগী মিংনা কুমতী (গুণমতী) কৌই। কুমজা ১৯৬৮ দা গুৱাহাটি য়ুনিভর্সিটগী মখাদা ইকনোমিক্সতা এমএ লোইশিনখি। লমদিং হায় স্কুল, ৱাংজিং সেকেন্দরি স্কুলদা ওজা ওইরম্লবা মতুংদা থৌবাল কোলেজতা ওজা ওইনা চংই। কুমজা ২০০০ দা থবক্তগী পোত্থাই।
কুমজা ১৯৭৮ দা ‘ভারত-রাসিয়াগী ললোন ইতিক’ হায়না মিংথোনবা ইকোনোমিষ্ট ওইবা মীৎয়েংদগী য়েংবা লাইরিক অমা ফোঙদুনা অইবা ওইনা চংশিল্লকখি। কুমজা ১৯৯৯ দা ‘মী অমসুং লাইবক’ মিংথোনবা শৈরেংগী লাইরিক অমা ফোঙলক্তুনা শৈরেং ইবা অমা ওইনসু শাফোঙলকখি। হৌজিক ফাওবদা কবি মোইরাংথেম রাজেন্দ্র সিংহগী ফোঙলবা শৈরেংগী লাইরিকশিংদি- মী অমসুং লাইবক (১৯৯৯), তাইবঙ মীরম্লেন (১৯৯৯), মসি ওইরে তাইবঙপাল (২০০০), তাইবঙ ফম্বাক্তা (২০০০), শৈরেং অপিশক (২০০০), শৈরেং পিক্কনাও (২০০০), ঐগী থম্মোয় কুরুক্ষেত্রদা (২০০২), রাজেনগী রাজেন, রাজেন রাজেন (২০০২), শৈরেং চমফুৎ ৱারেং চমফুৎ (২০০২), হিংনা হিংনা হিংনীংই (২০০২), লৌনম লাং (২০০৪), রাজেনগী থম্মোয়গী তাজমহল (২০০৪) কাইদ কাইদানা (২০০৫), মোইরাংথেম রাজেন (২০১২), কুন্তীগী মোবাইল ফোন (২০১৩) অমসুং তেন্থাগী রাজেন (২০২১) নচিংবনি।
অশৈবা অসিগী মফমদা ফিক্সন এন্দ পোইট্রি ক্লব, মণিপুরনা ‘মণিপুরী শৈরেংগী নুমিৎ, ২০২২’ দা ইকায় খুম্নবা উৎচরিবা অসিগী মমাঙদা অশৈবা অসিনা ফংখ্রবা মনা-মথুমশিংগী মনুংদা পনবা য়াবা খরদি- সোভিয়েট লেণ্ড নেহরু এৱর্দ (১৯৭৮),‘‘কবিরাজ” (শক্নাইরবী অইবী খাইদেম প্রমোদিনীনা পীরম্বা), ‘‘লাইফ টাইম এচিফমেন্ট এৱর্দ- ২০১২’’ (রাইটর্স এসোসিয়েসন, ককচিংনা পীবা) অমসুং ‘‘কাব্য ভূষণ’’ (মণিপুরী সাহিত্য পরিষদ, ইম্ফালনা কুমজা ২০১৩ দা পীবা) নচিংবনি।
মণিপুরদা লৈরিবা খোরিরোলগী লূপ কয়া অমগী মেম্বরসু ওইবিরিবা কবি মোইরাংথেম রাজেন্দ্রনা মণিপুর সাহিত্য সমিতি, থৌবাল; মণিপুরী সাহিত্য প্রচারক সভা, ৱাংজিং অমসুং সীৱেভস থৌবাল, মণিপুরগী প্রসিদেন্টসু ওইবিরম্মী।
ইকাইখুম্নবা উৎচখিবা অশৈবা রঘুবীর থিয়াম:-
রঘুবীর থিয়াম কুমজা ১৯৪৬ তা য়াইরিপোক লাইম্নাই, ইম্ফাল ইষ্ট দিষ্ট্রিক্টতা পোকই। হৌজিক্না য়াইরিপোক কৈথেল, থৌবাল দিষ্ট্রিক্টতা লৈরে। অপোকপগী মিংনা থিয়াম বীরমঙ্গল অমসুং অপোকপীগীনা কোইজম নিংঙোল তোম্বী কৌই। মহৈগী থাক্না গুৱাহাটি য়ুনিভর্সিটিগী মখাদা বিএনি। মণিপুর গবর্নমেন্টকী 
মখাদা ওজা ওইরম্মী। য়াইরিপোক জুনিয়র হায় স্কুলদগী থবক্তগী পোত্থাখি। শৈরেং, ৱারীমচা, দ্রামা অমসুং ঈশৈ ময়েক ই। ওল ইন্দিয়া রেদিওনা শক খঙলবা প্লেরাইট অমসুং লিরিষ্টনি। য়াইরিপোক থম্বালনু সাহিত্য মরুপ কন লাইব্রেরিগী ফাওণ্ডর সেক্রেটরি (কুমজা ১৯৯৩) নি। প্রসিদেন্টসু ওইরম্মী। য়াইরিপোক থম্বালনু সাহিত্য মরুপ কন লাইব্রেরিনা ফোঙবা চেফোঙ ‘থম্বালনু’ গী এদিটরসু ওইরম্মী।
হৌজিক ফাওবদা অশৈবা অসিনা এদিটর ওইবা লাইরিক অমা থারগা পূন্না লাইরিক তরামাথোই ফোঙখ্রে। মসিগী মনুংদা শৈরেংগী লাইরিক্না মাপলনি। শৈরেং নাচোম (১৯৮৮), ইমা, (১৯৯১), য়াইরিপোক থম্বালনু (১৯৯৩), মতমগী মণিপুরী শৈরেং (১৯৯৫), ধ্রুবতারা (১৯৯৯), শাৎকায়রক্লিবা অঙাঙবা থম্বাল (এদিটর, ২০০১), লাইরৈবাক্কী পাউদম (২০১৩), থম্মোয়াগী শৈরোল (২০১৯, ঈশৈ শৈরেং) অমসুং মণিপুরী লিমারিক (২০২০) নি। অশৈবা অসিগী অতোপ্পা লাইরিক অনী অসিনা- হোটেল গেলেক্সী (ৱারীমচা, ১৯৯৭) অমসুং ডাক্তর রোমেস কুমার থিয়ামগী পূন্সি ৱারী (বাইওগ্রাফি, ২০২১) নি।
অশৈবা রঘুবীর থিয়ামনা ফংখ্রবা মনা-মথুমশিংগী মনুংদা শীংথাবা য়াবা খরদি- ১) কুমজা ২০০০ দা ‘আর কে সনাতোম্বী এৱার্দ’ (ওজাগী শীনফমদা লৈরিঙৈদা তৌখিবা শীংথানিংঙাই ওইরবা থবকশিংবু শক খঙলদুনা পীরকখিবা), ২) কুমজা ২০০৩ দা ডলিট একাদমি ন্যু দিল্লীনা ‘ডা: অম্বেদকর ফেল্লোসিফ’, ৩) কুমজা ২০১৪ দা মণিপুরী সাহিত্য পরিষদ ইম্ফালনা ‘কাব্য ভূষণ’ উপাধি, ৪) কুমজা ২০১৪ দা ডলিট সাহিত্য একামি, অসামনা ‘সাহিত্য রত্ন’ অমসুং ৫) কুমজা ২০১৬ তা সাহিত্য সেবা সমিতি, ককচিংনা ‘চিংখু মোইরং লৈমা নীংশিং কবিরদাস মনা’ নচিংবা অসিনি।
ইকাইখুম্নবা উৎচখিবা অশৈবী খ্বাইরাকপম অনন্দিনী:-
মণিপুরী লোলগী অহানবা শৈরেংগী লাইরিক ফোঙখিবী অশৈবী খ্বাইরাকপম অনন্দিনী দেবী কুমজা ১৯৫২ গী ওক্তোবর ২৩, শগোলসেন নুমিৎতা 
উরিপোক সোর্ব্বোন থিঙেল, ইম্ফালদা পোকই। অপোকপগী মিংনা খ্বাইরাকপম মণি সিংহ অমসুং অপোকপীগী মিংনা লাইশ্রম নিংঙোল কমলিনী দেবী কৌই। কুমজা ১৯৭১ দা গৌহাটি য়ুনিভর্সিটিদগী পোলিটিকেল সাইন্সতা ওনর্সতা বিএ পাস তৌখি। কুমজা ১৯৯৮ দা বিএদ লোইশিনখি। মণিপুর লৈঙাক্কী এদুকেসন দিপার্টমেন্টদা তাকপী-তম্বিবগী শিনফমদা লৈরম্মী। রাজা ডুম্ব্রা হায় স্কুলদগী থবক্তগী পোত্থাখি। মণিপুরী লোলগী শক্নাইরবা কবি খ্বাইরাকপম চাউবা অইবী অসিগী ইধৌনি।
মণিপুরী লোলগী নুপী অইবীশিংগী অহানবা শৈরেংগী লাইরিক ওইরিবা অশৈবী অসিগী শৈরেংগী লাইরিক “শজিবুগী লৈরাং” অসি অশৈবী অসিনা ইবোতোনস্না স্কুলদা ক্লাস নাইন তম্লিঙৈ কুমজা ১৯৬৭ দা ফোঙখি। মসি মখা তারকপদা অশৈবী অসিগী ফোঙলবা শৈরেংগী লাইরিকশংদি- মহৌশাগী মপাউ (১৯৭৫), কূমসি কুমদি কুমকাংলে (১৯৮৬), পায়র খূদাপ হুল্ল প্রলয় (১৯৯৯), ইমাগীদমক (২০০৯) অমসুং ৱাহৈগী ইরৈদা (২০১১৭) নি। অশৈবী অসিনা কুমজা ২০০৩ দা কলচরেল ফোরমনা ফোঙবা নুপী অশৈবীশিংতগী ওইবা খোমজিনবা শৈরেংগী লাইরিক “থম্বাল চাম্মনিপাল” গী এদিটরসু ওইখি। মণিপুর মহিলা কল্যান সমিতিগী চেফোঙ “নুপীগী য়াইফ খোঙথাং” গী কুমজা ২০১০ গী মশীংগী এদিটরসু ওইখি।
অশৈবী অসিগী মফমদা ফিক্সন এন্দ পোইট্রি ক্লব, মণিপুরনা ‘মণিপুরী শৈরেংগী নুমিৎ, ২০২২’ দা ইকায় খুম্নবা উৎচরিবা অসিগী মমাঙদা অশৈবী অসিনা খোরিরোলগী লমদা তৌখিবা খুদোলশিংবু শক খঙবা ওইনা ফংখ্রবা মনা-মথুমশিংগী মনুংদা পনবা য়াবা খরদি- ১) “মহৌশাগী নুংশি মপাউ” লাইরিক অসিদা মণিপুর লৈঙাক্না কুমজা ১৯৭৬ তা সার্টিফিকেট ওফ ওনর, ২) মণিপুরী সাহিত্য পরিষদ, মেঘলায়া (শিল্লোং) না কুমজা ২০১৩ দা পীবা ‘কাব্য ভুষণ’ উপাধি, ৩) কলচেরল ফোরম, মণিপুরনা কুমজা ২০১৮ দা অশৈবী অসিগী শৈরেংগী লাইরিক “ৱাহৈগী ঈরৈদা” দা পীবা ‘লাইশোম ওংবী ইন্দ্রানি অমদি লাইশোম গীতাবলি নীংশিং মনা’, ৪) লৈমরোল খোর্জ্জৈকোল (লৈকোল) না কুমজা ২০১৯ দা পীবা ‘চোংথাম বিমলা বসন্ত এৱার্দ (লাইফটাইম এচীভমেন্ট এৱার্দ) অমসুং ৫) কলচেরল ফোরম, মণিপুরনা কুমজা ২০২০ দা পীবা ‘মাইস্নাম বাবু অমসুং পশোৎ মেমোরিয়েল এৱার্ড (আওটষ্টেন্দিং ৱুমেন ক্রিয়েটিভ রাইটর) নচিংবনি।
কর্টেসি : Mapao Literary Journal
0 কমেন্ট:
কমেন্ট তৌবিয়ু