মহারাজ কুলচন্দ্রগী নীংশিং থৌরম পাঙথোকখ্রে
ইম্ফাল, জানুয়ারি ২৮ : ১৮৯১ দা থোকখিবা এঙ্গলো মণিপুরী লাঞ্জাও অদুগী লুচিং পুরেল ওইখিবা মতম অদুগী মণিপুরগী নিংথৌ মহারাজ কুলচন্দ্রনা লৈখিদবা ৯০ শুবা কুমওন থৌরম ঙসি ইপসাগী কৈশাম্পাৎতা লৈনবা জস্তিত কমিটি ওন এঙ্গলো মণিপুরী ৱার মার্তিয়ার্স এন্দ ফ্রীদম ফাইতার্স ওব কংলৈপাক (মণিপুর) অমসুং নিংথেমচা নীংশিং লূপ অনীনা খূৎশম্নরগা অথৌবগী মফমদা হৈ-লৈ কৎতুনা ইকায়খুম্নবা উৎপগা লোয়ননা নীংশিং থৌরম পাঙথোকখ্রে হায়রি।
নীংশিংবা য়াই, বৃটিশ লৈঙাক্না ভারত পূম্বগী শরুক অহুম খুদম চন্দুনা আসাম ফাওবা মখোয়না লোই চল্লবা মতমদুদা, মশোং ফল্লবা বর্ম্মা লৈবাকপু বৃতিশশিংনা মায়োক্নবা ৱাগদবা মরম্না মণিপুরবু শম্বল ওইনা খাদুনা থম্মী। অহুমশুবা ত্রিতি ওব য়ান্দাবুদা বৃতিশনা বর্ম্মাবু খুদুম চনখ্রবনা মখোয়না লোই চল্লবা লৈবাক অনী ভারত অমসুং বর্ম্মা অনীগী মরক্তা মনিং তম্বা মণিপুরনা শম্বল ওইবা অদু পাম্লক্ত্রে। মখোয়গী লল্লোন ইতিক অমসুং অরোল অথুপ্তা খুদোং চানবগীদমক মণিপুরবু মখোয়গী খুবাম্নুংদা থম্নবা লৈঙাক্লোন্দা খূৎ থিংজিল্লক্তুনা অচেংবা মতাঙ য়েংদুনা মালেমগী লানগী কাঙলোন কয়ানা মণিপুরবু খুদুম চনখি হায়রি।
বৃতিশকী অরানবা মীনম্বা ৱায়োলদা ইরমদমগী অথোইবা কয়া মঙক্তা থৌরি থুদুনা হাৎপিখি, কয়া অমনা মরমদমদা হল্লকপা ফংহন্দনা কলাপানিদা লোই থাবীখি। লোই থাখিবশিং অদুগী মরক্তা মহারাজ কুলচন্দ্রসু অমনি হায়রি।
সোর্স: পোক্নফম
0 কমেন্ট:
কমেন্ট তৌবিয়ু