ঙসি অমসুং সাহিত্য হায়বসিদা থৌরম অমা পাঙথোক্কদৌরি
ইম্ফাল, জানুয়ারি ২৭ : সাথৌলূপ (সাহিত্য থৌপাং লূপ) লিংখৎখিবা চহী ২০ মপূং ফারকপগা মরী লৈননা চহী ১ চূপ্না তোঙান-তোঙানবা থৌরম কয়া পাঙথোকপগী শরুক অমা ওইনা, সায়োকা (সাহিত্য য়োকখৎ কাঙলূপ), তেন্থাগা খূৎশম্নরগা থঅ অসিগী ২৮ দা তেন্থা খুঞ্জাও ময়ায় লৈকায় কম্যুনিতি হোলদা ‘ঙসি অমসুং সাহিত্য’ হায়বসিদা থৌরম অমা পাঙথোক্কনি হায়না সাথৌলূপনা থাদোরকপা চেরোল অমনা হায়রি।
চেরোল অসিনা মখা তানা, হৌজিক লমদম অসিদা তঙদু লৈতাদবা ফীবম অমা মীয়াম্না মায়োক্নরিবা অসিদা লমদমসিগী অইবা অমদি অইবীশিংনা লৌরিবা থৌদাং অমসুং মখা তানা করি থৌরাং পায়খৎপা য়াবগে হায়বা মতাঙ থৌরমসিদা কূপ্না খন্নগনি।
সাহিত্য হায়বসি সমাজ অমগী মিংশেলনি হায়বগী ৱাখল্লোন অসিদা হৌজিক থোক্লিবা থৌদোক- ৱাথোক ময়াম অসি অইবা অমদি অইবীশিংনা করম্না ফোঙদোক্লিবগে হায়বা হীরম অসিগী মতাঙদা শরতচান্দ থিয়াম্না ৱা ঙাঙগনি। লোয়ননা মণিপুরী শৈরেংগী তাইবঙদা মণিপুরগী রাজনিতিগী মশক অসি অইবা অমদি অইবীশিংনা কমদৌনা উবগে অমদি য়েংবগে হায়বসিদা চাওবা, কমল, অঙাংহল, ইরাবত, নিলকান্ত, সমরেন্দ্রনচিংবা অইবশিং অসিগী শৈরেংশিংদগী হৌরগা হৌজিক্কী অইবা অমদি অইবীশিংনা মখোয়গী শৈরেংশিংদা রাজনিতিগী মশক-মওং অসি কমদৌনা ঊৎলিবগে হায়বা মতাঙসিদা মণিপুর য়ুনিবার্সিতিগী রিসার্চ স্কোলর নিংঙোম্বম নন্দোনা ৱা ঙাঙগনি। থৌরম অসিগী মোদরেতরনা শক্নায়রবা ক্রিতিক মোইরাংথেম প্রিয়োব্রতনা ওইগনি হায়রি।
সোর্স: পোক্নফম
0 কমেন্ট:
কমেন্ট তৌবিয়ু