ইম্ফাল, ওক্টোবর ২৫ : মণিপুরগী থাঙ-তাসু মালেমগী তোপ-তোপ্পা আর্ত ফোর্মশিংগী মরক্তা য়াওরি। লমদম অসিগী লৈহাওদগী থোরকপা মার্সিএল আর্ট ফোর্ম অসিনা মারেমগী মীয়াম্বু মমীৎ থকহনবদা নৎতনা অঙকপসু পোকহনবা ঙম্লি।  আর্ট ফোর্ম অসিবু য়োকখৎপা, হেন্না চাওখৎহন্নবা হোৎনবা মথৌ তায় হায়না এম য়ু সি (মণিপুর য়ুনিভার্সিতি ওব কালচার) গী ভাইস চাঞ্চেল্লর প্রোফেসার পাওনম গুনিন্দ্রোন ফোঙদোকখ্রে।

প্রোফেসার পাওনম গুনিন্দ্রোনা ৱাফম অসি ঙসি পাঙথোকখিবা হুয়েন লাল্লোং মণিপুর থাঙ-তা কালচারেল এসোসিয়েসনগী ৬৫ শুবা মপোক কুমওন থৌরমদা ফোঙদোকখিবনি। ইরিলবুংদা লৈবা হুয়েন লাল্লোং মণিপুর থাঙ-তা কালচারেল এসোসিয়েসনগী ওদিটোরিয়ামদা সংস্কার ভারতি মণিপুর প্রান্তকা খূৎশম্নরগা শীন্দুনা পাঙথোকখিবা থৌরম অদুদা এসোসিয়েসন অসিগী দিরেক্তর ওইরিবা কে সনাথোইবা শর্ম্মা (পদ্মশ্রী), হান্নগী এম পি থৌনাওজম চাওবা (পদ্মশ্রী) অনী য়াওনা স্তেত অমসুং নেসনেল এৱার্দ ফংলবা আর্তিস্তশিংবু অচম্বা খুদোলপোৎ তমদুনা মখোয়বু তরাম্না ওক্তুনা ইকায়-খুম্নবসু ঊৎখি।

থৌরম অদুদা চীফ গেস্তকী ৱারোল পীরদুনা পাওনম গুনিন্দ্রোন হায়, থাঙ-তা অসি মণিপুরগী পুৱারীগা শাগোন্নরক্লবা ত্রেদিসনেল মার্সিএল আর্ট ফোর্ম অমখক্নি। ঐখোয়গা থাঙ-তাগা তৎন-থানবা য়ারোই। থাঙ-তা হায়বসি য়াওদনা মণিপুরগী পুৱারী নৈনবা মপূং খক ফারোই। চহী লীশীং কয়াগী পুৱারী শেম্লক্তুনা নিংথৌরোল কয়ানা মথং-মথং পান্দুনা মনীং মখা তম্বা লৈবাক অমা ওইনা লৈরম্বা ঙমখিবা অসিমক থাঙ-তাগী মপালদগীনি হায়বদা হায়মনবা থোক্তে।

ঐখোয়গী ইপা-ইপুশিং অদুনা থাঙ-তাগী মতেঙনা পীকচারবসু কংলৈপাক অসি মনীং মখা তম্বা লৈবাক অমা ওইনা ঙাক্লকখিবনি। ঙসিসু মালেমগী মীয়াম্না থাঙ-তা অসি অঙকপা আর্ত ফোর্ম অমা ওইনা লৌনরিবনি। অসিগুম্বা ইপা-ইপুশিংনা থম্বিরম্বা মমল নাইদ্রবা আর্ট ফোর্ম অসিবু য়োকখৎতুনা হেন্না চাওখৎনবা হোৎনবদা ঐখোয় খূদীংমক্কী থৌদাং লৈ। মরম অদুনা ঐখোয়-ঐখোয়না লৌবা ঙম্বা অঙম্বা থৌদাং অদু লৌমিন্নসি হায়নসু মহাক্না আপিল তৌখি।

ইং ১৮৯১ গী এঙ্গলো-মণিপুর ৱার মতুংদা বৃটিশকী মীখা পোল্লুবদগী থাঙ-তা অসি মতম খরা মমি শামথরুরে। বৃটিশশিংনা মতম অদুদা থাঙ-তা তম্বা ফাওবা থিংখিবগী ৱাফম লৈ। মসিনা আর্ত ফোর্ম অসি মতম খরা মূত্থরুবগী অচৌবা মরম ওইখি। অদুবু ঐখোয়গী লাইওইখ্রবা ইপা-ইপূশিংনা আর্ত ফোর্ম অসি তরায়না মাঙহনবা য়ারোই হায়বা অচেৎপা ফীরেপ লৌদুনা অমুক হন্না য়োকখৎতুনা আর্ত ফোর্ম অসি হিংগৎহল্লকখিবনি হায়নসু প্রোফেসর পাওনা গুনিন্দ্রোনা ফোঙদোকখি।
হুয়েন লাল্লোং মণিপুর থাঙ-তা কলচারেল এসোসিয়েসনগী দিরেক্তর কে সনাথোইবা শর্ম্মানা প্রিসাইদ তৌদুনা পাঙথোকখিবা থৌরম অদুদা জে এন এম দি এ (জৱাহরলাল নেহেরু মণিপুর দান্স একাদেমি), ইম্ফালগী দিরেক্তর পুখ্রম্বম বিলাশ সিংহ অমসুং বিশ্ব ভারতি য়ুনিভার্সিতি, শান্তিনিকেতন ওয়েস্ট বেঙ্গলগী প্রোফেসার য়াইখোম হেমন্তকুমারসু গেস্ত ওব ওনর ওইনা শরুক য়াখি। থৌরম লোইশিল্লকপদা কলচরেল এসোসিয়েসন অসিগী মহৈরোয়শিংনা পাঙথোকপা থাঙ-তাগী পার্ফোর্মেন্সশিং অমদি কলচরেল প্রোগ্রামসু পাঙথোকখি।

সোর্স: পোক্নফম