বাংলাদেশকী শক্নাইরবা কবি অমসুং অইবা এ কে শেরামদা বাংলা একাডেমিনা ওনারারি ফেলোশিপ পীদুনা ইকাইখুম্নখ্রে
সিলেট, নভেম্বর ২৭ : বাংলাদেশকী শক্নাইরবা অইবা, কবি এ কে শেরামদা বাংলাদেশকী এথনিক মাইনোরিটি অমদি ইন্ডিজিনাস (আদিবাসী) ফুরুপকী অইবা অমা ওইনা, রিসার্চার অমা ওইনা শকখংবিদুনা হন্দক চহী অসিগী বাংলা একাডেমীনা ওনারারি ফেলোশিপ পীদুনা ইকাইখুম্নখ্রে।
২৫ নভেম্বর, ইরাই নুমীৎতা ঢাকা সিটিদা লৈবা বাংলা একাডেমীগী নজরুল মঞ্চদা চীং লেম্লবা থৌরম অমদা বাংলা একাডেমীনা হন্দক্কী চহীগী (২০২৩ ইং) ওইনা মশা মশাগী লমদা থোইদোক হেন্দোক্না শকখংলবা মীওই তরেৎতা ওনারারি ফেলোশিপ পিদুনা ইকায়খুম্নখিবনি। ইন্ডিজিনাস রিসার্চার অমা ওইনা এ কে শেরামগা লোয়ননা ফ্রীডম ফাইটারশিং মরক্তগী (মুক্তিযুদ্ধ) আক্কু চৌধুরী, সিনেমা/ফিল্মদা (চলচ্চিত্র) তানভীর মোকাম্মেল, জার্নালিজমদা (সাংবাদিকতা) মোজাম্মেল হোসেন মঞ্জু, কালচারেল এক্টিভিটিজদা (সংস্কৃতি) ফাল্গুনী হামিদ, মেডিসিন দা (চিকিৎসাবিজ্ঞান) ডা. হালিদা হানুম আখতার অমসুং ফোকলোরদা মো. আলম দেওয়ানদা ফেলোশিপ পিদুনা ইকায়খুম্নখি।
পনবা য়াবদি, এ কে শেরাম কবি, অইবা, রিচার্সার, হন্দোকলোয়, শৈরেংবা, ৱাঙাংলোয়, খোমজিন্বা, লূপ শৌগৎলোয়, অরিবা থিজিন্বা অমদি লোন্মী অমসুং সাহিত্যকার অমনি। বাংলাদেশতা চোইজাইননা তারিবা ইন্ডিজিনাস কাংলুপকশিংগী লোন অমসুং সাহিত্য চাওখৎ থৌদাং লৌখৎলিবা মীশক অমসুনি। মহাক বাংলা অমদি মণিপুরী লোনদা ইবদা খুৎলোয়রবা অমনি। বাংলাদেশতা মণিপুরী সাহিত্যগী খুমাং চাওনা থৌদাং লৌরক্লিবা অমদি লম অসিগী শিংথানিঙাই ওইরিবা লুপ বাংলাদেশ মণিপুরী সাহিত্য সংসদকি ফাউন্ডারনি। শিনফম ওইনা মহাক সোনালী ব্যাংক লিমিটেডকি ডেপুটি জেনারেল ম্যানেজার ওইনা থবক্তগী পোত্থাখি।
বাংলা একাডেমীনা ফেলোশীপ পিরকপদা এ কে শেরামনা অসুম্না ফোঙদোকখি, “বাংলা একাডেমীবু ঐহাক মরম অনিগীদমক থোইদোকনা থাগৎচৈ, তৌবিমল খংহনজৈ ঐগুম্বা অমবু অসুম্না ইকাই খুম্নবিরকপা, ঐদি ইমা অমসুং ইমালোনবু নুংশিজদুনা করিগুম্বা অমতং তৌজগে খন্দুনা হোৎনজখিবনি। থৌদাং অসিবু শক খংবিদুনা ‘ইন্ডিজিনাস মরমদা রিসার্চ তৌদুনা তেংবাংবগীদমক’ ফেলোশীপ অসি পিরক্লিবনি। পঞ্জনিংলি, ৱাখল অমদনা ঐ ইশাবু লাইবক ফবনি হায়জনিংঙি, করিগী হায়দি ঐগিদি ইমা অনিনি লৈরিবসে অমসুং ইমালোনসু অদুমক অনিনি। পোকপীবা পলেম ইমাগী লোন ‘মণিপুরী’ অমরোমদনা অনীশুবা ইমালোন ঐগী পোকফম লমগী লোন, ‘বাংলা’। লোন অনিসিগীদমক ঐনা ঙম্বমখৈ কৈনোমা তৌগে হায়না হোৎনজরকপনি।
অনিশুবা মরমগীদমক ঐ বাংলা একাডেমিবু থাগৎচৈ, মদুদি, ইন্ডিজিনাস (আদিবাসী) রিসার্চকিদমক ফেলোশীপ অসি পিরক্লি। ঐখোয় খংঙি, ‘আদিবাসী’ ৱারোল অসি বাংলাদেশ সরকারনা থোইদোকনা পামদে হায়না, অদুনা মখোয় ‘আদিবাসী’গী মহুৎ শিন্না ‘ক্ষুদ্র নৃগোষ্ঠী’, ‘ক্ষুদ্র জাতিসত্তা’, ‘উপজাতি’ অসিগুম্বা ৱারোল শিজিন্নবা হেন্না পাম্মি। অদুবু কাংলুপ অসিনা মশাবু ‘আদিবাসি’ হায়না মীংথোঞ্জবা পামজৈ।
বাংলা একাডেমী সরকারগী সংস্থা অমা ওইরবসু, সরকারনা হেন্না শিজিন্নহনিংবা ৱারোল শিজিন্নবগী মহুৎ ময়াম্না খঞ্জবা ৱাহন্থোককি মাইকৈ লৌদুনা ‘আদিবাসি’ হায়বা ৱারোল অসিমক পনবিরকপা”।
বাংলা একাডেমী ওনারারি ফেলোশিপ ফংলবা কবি এ কে শেরাম হৌজিক হৌজিকসু বাংলাদেশ মণিপুরী সাহিত্য সংসদ, মণিপুরী ভাষা গবেষণা উন্নয়ন সংস্থা, বাংলাদেশ প্রগতি লেখক সংঘ, সিলেট, জাতীয় কবিতা পরিষদ, সিলেটকী প্রেসিডেন্ট অমদি আন্তজার্তিক আদিবাসী ভাষা দশক উদযাপন কমিটিগী কনভেনর ওইনা থৌ পুরি। লোয়ননা প্রথম দিনের সূর্য, উদিচী শিল্পীগোষ্ঠীগীসু প্রেসিডেন্ট ওইরম্মি। অতৈ অতৈ লূপ কয়াগীসু থৌ পুদুনা অচৌবা থৌদাং লৌবিরম্মি। অইবা অসিগী বাংলা অমদি মণিপুরী ৩৬ হেন্না লাইরিক ফোংখ্রে অমদি ম্যাগাজিন, চেফোং কয়াগীসু ইডিটর ওইনা থৌ পুবিরম্মী, পুবিরি। মহাক কলকাতা, মণিপুর, আসাম, ত্রিপুরা, মেঘালয় অমদি বাংলাদেশকী মফম কয়াদগী লুপ কয়াতংনা ইকায়খুম্নবা উৎখ্রে। সাহিত্যদা ইন্টারন্যশনাল এৱার্ড অমদি ইকায়খুম্নবা ফংখ্রবা মীশক অমনি।
0 কমেন্ট:
কমেন্ট তৌবিয়ু