• 352
• ২৫শে অগাস্ট ২০২৫ ইং
• Share on:

পুন্সিবু মচু লোক্লিবা আই বসন্তগী ৱারীমচাগী লাইরিক ‘মায়থিরবা থাবল’- লাইরিক অসিদা মীয়েং অমা  --- তোংব্রম অমরজিৎ

লাইরিক অসিগী মিংথোল ওইরিবা ‘মায়থিরবা থাবল’ য়াম্না ৱাহন্থোক লৈবা তাইবঙ য়ুম্বাল পুন্সিগসু মরি লৈনবা য়াম্না ফজবা ৱারীমচানি। নোংমাইথেম থাবলনা ৱারীমচা অসিগী মরু ওইবা চরিত্র ওইরি। মপা ইবুংঙোনা মরল মথুম চীংগুম্না পৈদুনা থম্লম্বা ইমুংদা পোকই। নুংঙাই য়াইফবা ইমুংদা পোকপা ওইরবসু ফত্তবা শংগা তৌদে। লাইরিক নিংথিজনা তমদুনা সরকারগী থবক তৌবগী মহুত্তা মপানা থম্বীরম্বা লন থুম শেন্নবনা মহাক্কী মথৌ ওইখি...

লাইরিক্কী মমিং- মায়থিরবা থাবল
অইবা- আই বসন্ত
অফোঙবা- রাইটর্স ফোরম, ইম্ফাল
লাইরিক্কী মখল- ৱারীমচা
লাইরিক্কী মমল- লুপা ৪৫০/- 
লমায় মশিং- ২২০ মৈতৈ ময়েক য়াওরগা 
লাইরিক্কী মখুম- বিরেন্দ্রজিৎ নাওরেম 

মণিপুরী খোরিলোলদা থোইদোকনা ৱারীমচাগী লমদা চাওরবা খুদোল তম্লিবা অইবনি আই বসন্ত (ইরুংবম বসন্ত) মহাক ১৯৪৪গী ওক্টোবর ৩১দা তাইবঙ খোঙদারকখি। হৌজীকনা ৱাংখৈ খুনৌদা লৈ। ১৯৯৫ তগী হৌরদুনা ‘জিরিগী ভুত’ মিংথোনবা ৱারীমচাগী লাইরিক পুথোকলবা মতুংদা মথং মথং লেপ্তনা ইরকপা অমসুং ফোঙলকপা ৱারীমচা পুন্না ৮ শুরে। ৱারীমচা লাইরিক অনী অমদি মৈতৈ ময়েক ভর্জনসু পুথোকখ্রে। ‘পুন্সি অমসুং তিংখং’ (২০২১) নীংশিং ৱারীগী লাইরিক অমসু মনিপুরী খোরিলোলগী পুক্কৈদা খুদোল তমখিবা লৈরে। ঙসি ফাওবদা অইবনা ইবগী লমদা তৌরিবা খুদোল, মহাক্কি খুৎই অসিনা পীরিবা পাউজেল, লীরিবা খুনাইগী ৱারীশিংদা য়াওরিবা মগুণ অদুবু মশক খঙবা অমদি পুকনিং থৌগৎপা ওইনা তোঙান তোঙানবা খোরিলোলগী লূপশিংনা মনা মথুম কয়া পীদুনা ইকায়খুম্নবা উৎখিবা লৈরে। নীংশিংবা য়াবশিংদি, মহাক্কী ৱারীমচাগী লাইরিক ‘থম্মোয়ণা মকা লাম্লক্লবদা’ তা মণিপুরী সাহিত্য পরিষদ, ইম্ফালনা ২০১৫দা ‘নোংথোম্বম কুঞ্জমোহন সাহিত্য মনা' পীখি। ২০১৫দা অমুক হুইয়েন লানপাউ গ্রুপ ওফ পব্লিকেসন্স, ইম্ফালনা হায়রিবা লাইরিক অসিমক্তদা ‘হুইয়েন লানপাউ লিতরেরি এৱার্দ’ পীখি। ২০২০দা দ কলচরেল ফোরম মণিপুরনা অইববু ‘সোইবম মেরাদোনা মেমোরিয়েল এৱার্দ’ হায়রিবা লাইফ তাইম এচিভমেন্ত এৱার্দ অসি পীদুনা ইকায়খুম্নখি। ২০২০দা মহাক্কী লাইরিক ‘লমদাঙ অমদা’ হায়বসিদা ‘মণিপুর স্তেট কলা একাদেমি এৱার্দ’ ফংখি। লাইরিক অসিমক্তদা মণিপুরী সাহিত্য পরিষদনা পীবা ‘ব্রহ্মচারিময়ুম চিত্রেশ্বর শর্ম্ম নীংশিং সাহিত্য মনা ২০২০ ফংখি। নহারোল সাহিত্য প্রেমি সমিতি, ইম্ফালনা পীবা ‘লাইরেল্লাকপম জুগিন্দ্র নীংশিং সাহিত্য মনা’ ২০২৩ মহাক্কী লাইরিক ‘পুন্সি অমসুং তিংখংদা পীখি অদুগা লাইরিক অসিমক্তদা মণিপুরী লিটরেরি সোসাইতিনা ‘সনসম তোমাল নীংশিং সাহিত্য মনা ২০২৩ পীদুনা ইকায়খুম্নবা উৎখি। অইবা আই বসন্ত হৌজীক হৌজীক রাইটর্স ফোরম ইম্ফালগী ভাইস প্রসিদেন্ট ওইরি। ফোরম অসিনা পুথোকপা চেফোঙ সাহিত্যগী পাউ্গী এদিটরসু ওইরম্মি। 

রাইটর্স ফোরম ইম্ফালনা ফোঙবা ‘মায়থিরবা থাবল’ (২০২৪) লাইরিক অসিদা পুন্না ৱারীমচা ১৭ য়াওরি। লাইরিক অসিমক রাইটর্স ফোরম ইম্ফাল লিংখৎপীরম্বা লাইওইখ্রবা মেম্বরশিংগী মফমদা কত্থোকলি। লাইরিক অসিগী য়াওফম তাকপসিদা য়াওরিবা ৱারীমচাগী মিংথোলশিং অসি হেক পাবদা ৱারীশিং অসি লোয়নমক পানিংবা ফাওহল্লি। মিংথোল করম্না পীসিগে হায়না তরেৎ তরা থোকনা খল্লমগনি খল্লি অইবনা। লাইরিক্কী মিংথোল অসিমকসু য়াম্না ৱাহন্থোক লৈ। লাইরিক অসিদা ‘খোইজু লাইখাম’ কৌবা ৱারীমচানা শৈহৌ ওইরগা ‘কঞ্চন য়াদব’ মিংথোনবা অসিনা অরোইবা ওইনা য়াওরি। ‘খোইজু লাইখাম’ মণিপুর কলচরগা থাদোকনবা য়াদ্রবা থাজনবী অমদি লাইথৌ তিনথৌ থৌরমদা য়াওরিবা পোৎচং অমনি। ৱারীগী প্রোটাগোনিস্ত ওইরিবনা খুঙ্গংগী সেতিংদা লৈবা ওফিসকি ক্বাটর অমগী দেস্ক্রিপ্সন পীদুনা ফার্স্ত পর্সন নেরেসন্দা ৱারীসি হৌই। তেন্তকনা  ইম্ফাল হেদ ওফিসশিংদা তৌরিবা থবক খুৎশু, মতম চানা লোয়শিন্দবা অদু ফোংদোক্লি। লমহাং ওইনা তৌবা মফমদা শারিবা ক্বাটরদা লমলৈমা নত্রগা হেল্লোইগুম্বা অমা লাক্লগা প্রোতাগোনিস অসিবু মহাক্কী হৌখ্রবা পুন্সিগী যৌবন পুন্সিবু পাউদমহল্লি। লায়রবা ইমুং পোক্লুবনা মরম ওইদুনা থম্মোয়গী অনীংবা অপাম্বা ফোংদোকপা নংহৌদে লৈকাইগী হৌমিন্ন কামিন্নরকপী ইবেতোন্দা।  ইবেতোন্না মঙোন্দা চেল্লসি হায়বদা মহাকনা য়াখিদে। মতমগী মতুং ইন্না ইবেতোন লুহোংখি অমসুং অঙাং উনবদা লৈখিদে। ৱারী অসি লমহাংদুদা অয়ূক নুংথিল মরক মরক্তা লাকপী ইবেতোন মানবী লমলৈমা অদুদা লীখি। নুংথিল অমা লৈকাইগী তাগৌরো লাকপদা লমলৈমা অদুনা লৈরম্বদু শামিন ফংখি। মথংগী নুমিত্তা তাগৌরোনা খোইজু লাইখাম পুদুনা লাক্লগা য়ূমগী অকোয়বদা খোইজু লাইখাম ওকথোকখি। নুমিৎ অদুদগী নুপী অদু লাকখিদ্রে হায়না ৱারীমচাসি লোয়শিল্লি। ঐখোয়নদি আন্ধ বিশ্বাসনি হায়না লৈবা লমদম অসিগী ত্রেদিসন অমদি কলচরগা শাগোন্নরিবা থাজনবী চৎনবীশিং অসি লোয়নমক হেক পুংথা থাদোকপসু ফত্তে। মসিনা করিগুম্বদা মেদিকেল সাইন্সনা লায়েংবদা ৱারবা অনাবা ফাওবা উনা অমনা ঈশিং মরিক খরনা অনাবা ফাহনবসু য়াওরি হায়বসিদা থাজবা থম্লি। অইবা আই বসন্ত মোং ইহা হাদনা ফাগী ফজনা পুবা অইবনি। মসিগী ময়েক লারবা খুদম মহাক্কী ‘শিদ হীদাক’ হায়না মিংথোনবা ৱারীমচা অসিদা থেংনবীগনি। জ্বারদা লাইচুবা, পুন্সি শাংনদি হিংনিংবা, থবক শুনিংদবা থেম্বুং কৌবা নুপা অমগী ৱারীনি অইবনা পুথোকলকলিবসি। নোংমা লায়েংবা চৎপদা দাক্তরনা হায়রকপদু মহাকনা শিদ হীদাকনি হায়না খনখিবগী ৱারীনি। দাক্তরদুনা হায়, “ নঙগী নশাদা অতৈ অরুবা অনা অয়েক অমত্তা লৈতে। তৌবদবু নঙনা চেকশীঞ্জগদবা মতাং অমদি লৈ। মীনা নঙোন্দা ফনা য়াম্না শাউনবা তৌরক্লগসু নঙদি শাউগৎপা শুকয়া য়াদেকো” (লাঃ ৭) দাক্তরগী পাউতাক ইন্দবা ঙমখিদ্রে থেম্বুং মরমদি মহাক পুন্সি শাংনা হিংনিংই। শাওদবা ঙমদবা মীওইবা ওইরবসু মহাক অঙম্বা থাক্তা শাওদনবা হোৎনখি। জ্বার শান্নবদা চাগনি থক্কনি কাওই। ইমুং মনুং নুপী অঙাংনা করি চারিবা থকলিবা মহাক খঙদে। জ্বার শান্নবদা শেল মাংদুনা হল্লকখি। মাগী নুপীনা হেক খারবা নুপা হায়বদু ওই। আদুনা  নুমিদাংগী চাক অদু চাককুপ্না কুপ্পসু য়ুমদু হোদো হোরাও তৌরবনিনা খুদেংনা কুপ্লে। অদু উবদা শাওগে তৌখি থেম্বুং অদুবু শাওবা  ঙমদে মাগী নুপীগী পাউখুম্না জসতিফাই তৌরকপদা য়েঞ্জাংনা নোংমাংকা অফুৎপদু অদু হংগাম থোংবনি হায়রকখি। শেল মাংলগা উংদুনা লাকপদা শাওবদি লায়রদা চাক চাক্লুক অমা লোয়না চাথোক্লগা ফমুংদা তুমদুনা লৈরমখি। মাগী নুপীনা নুংশা থিনা য়েংলদুনা হংখি, “ হকচাংদু করিসু তৌদেকো” মদুদা থেম্বুংনা খুম্লকখি, “ করিসু তৌদে। নঙগী হংগাম থোংবদু চারুবদগী লোক থুংলম্বদু খরদুম ফরমাল্লে খল্লি” মতৈ মনাও অনীগী ডাইলোগ অসিদা তেন্না নুংঙাইহল্লি, নোকহল্লি। ফত্তবা মীগী হীদাক লৈতে। অহোংবা পুরকপা ৱাই অসিনচিংবা পাউজেল পীরি। 

লাইরিক অসিগী মিংথোল ওইরিবা ‘মায়থিরবা থাবল’ য়াম্না ৱাহন্থোক লৈবা তাইবঙ য়ুম্বাল পুন্সিগসু মরি লৈনবা য়াম্না ফজবা ৱারীমচানি। নোংমাইথেম থাবলনা ৱারীমচা অসিগী মরু ওইবা চরিত্র ওইরি। মপা ইবুংঙোনা মরল মথুম চীংগুম্না পৈদুনা থম্লম্বা ইমুংদা পোকই। নুংঙাই য়াইফবা ইমুংদা পোকপা ওইরবসু ফত্তবা শংগা তৌদে। লাইরিক নিংথিজনা তমদুনা সরকারগী থবক তৌবগী মহুত্তা মপানা থম্বীরম্বা লন থুম শেন্নবনা মহাক্কী মথৌ ওইখি। থবক অদুম চিঞ্জৈ। থাবল লম কোয়বদি পামজবা মীশক ওই। লূপ অমগী কছারদা কোয়বা চৎপদা মহাক্কী পুন্সি খোঙলোই ওইগদবী চন্দ্রপ্রভাগা থেংনখি। কছারগী তোলেন খুন্দা শেঞ্জাও পায়বা চন্দ্রপ্রভাগী মপানা থাবলগী মরি মখোঙ খঙবনা মচা নিংঙোল থাজনবা শিল্লকখি। থাবলনসু মায় হায়খিদে। হৌনবী মতুং ইন্না মখোয়নি লুহোংখি। য়ুম পাল্লবা মতুং চহী মতম শাংনা মমিত্তা মচা উবা ফংখিদে। য়ুম্লেপ চারা তম্নবা লৈররোইদ্রা ৱাজখি চন্দ্রপ্রভা।  থাবলদি শেম্বীবা তাইবঙ মপুদা থাজবা থমখি। অসোমদনা কমদৌরি চন্দ্রপ্রভাগী মনে কুঞ্জেনা ময়ূম পাল্লূবা ইমুংদুদা তিন্নবা য়াখিদে। মরমদি ইনাক খুনবা ইমুংগী নিংঙোল ওইবগী হৌনাশা হে তোংখি। য়ানদবদগী খায়নখি। অঙাং অমসু থমলখি। কুঞ্জেগী মপূরোইবা খরা লৈরগা লৈখিদে। অদুনা অঙাং অদু কুঞ্জেনা পুরকখি। হায়রিবা অঙাং অসি মনে চন্দ্রপ্রভাগী মনাক ইম্ফালদা মমানা পুরক্লগা থানমখি। মতাং তাঞ্জা অসিদা কুইনা মীরোলবা ঙমদনা লৈরুরবা চন্দ্রপ্রভা মীরোল্লকখি। থাবল নোংম- নোংমগী চীংনবা হেল্লকখি। কনাদা? ঙসাইগী মনে কুঞ্জেগী মচা চহি ১৪লোম শুরবা অদুদা।মরমদি মহাক মনেগী কাদা অয়ুক নুংথিল নুমিদাং অদু লৈ। থাবল মচিন্দি কাংথোক্তনা অসুম চীংনরকখি। মাগী নুপীবুসু।কুঞ্জে নোংমা মচাবু লৌবা লাকখি ইম্ফালদা। থাবলনা কোচি থাংনা ৱা খরা হায়। অদুবু মনে কুঞ্জেনা অরানবা থবক তৌবা নত্তবনা অশেংবা ৱারী পুম্বা লীথোকলকখি। চন্দ্রপ্রভাগা মনেগদি খঙই চাউবা হায়রিবা অঙাং অদু নুপাগী ফিজোল শেৎলগা ইম্ফাল থৈদুনা থম্বনি। অশেংবা ৱারীদু খঙলকপদগী থাবল মতোমতা য়াম্না ইকায়রকখি। ৱাখল য়াম্না লান্না খল্লুবা অদুগীদমক নিংঙমখিদে। “ চাউবনা চৎখিবা নুমিৎ অদুদা থাবলগী মমিৎতা ঈরা চেনখিবা অদু চন্দ্রপ্রভানা উখি। অশাওবা পুম্নমক কাউথোক্লগা চন্দ্রপ্রভানা য়াম্না চীং লেম্না নোক্লগা হায়খি, “ পূকচেল চেৎপা অমসুং ধর্ম্মা কায়দবসি নুপীনা খরদি হেনবোইরে।”  
ৱাখলনা শাগৎলগা হেক্তা মীবু লান্না খনবা অরানবা মীয়েংনা য়েংবসি মতম খূদিং মায়থিগনি হায়বদুগী পাউজেল পীরি। ৱারীমচা অসি চম্না য়াম্না ফজবা খুৎই অমা ওই। অতোপ্পা ৱারীমচা, “তপর্ন লোইবা নুমিৎকি মঙ” “পোকখায়দবা বোম” অসিনচিংবা ফজবা ৱারীমচাশিংসু পাবা য়াম্না নুংঙাই। মথং মথং লাইরিক কয়া ইবীরকখিগনি হায়না থাজবা থমজরি।