কবি এল মীনা দেবীগী অহানবা শৈরেং লাইরিক ‘মীৎ তাঙহনবীরো, না তাঙহনবীরো’ ফোঙখ্রে
মরূপ পাউমী, ১৩ ডিসেম্বর: ত্রিপুরাদা মচীন তুমখৎলক্লিবা অইবী কয়াগী মনুংদগী লাংগোনজম ওংবী মীনা দেবীগী অহানবা শৈরেং লাইরিক ‘মীৎ তাঙহনবিরো, না পঙহনবিরো’ ফোঙখ্রে। চৎখিবা ডিসেম্বর ৮, মণিপুরী সাহিত্য পরিষদ, ত্রিপুরানা শীন্দুনা ধলেশ্বরদা লৈবা মণিপুরী লাইব্রেরী এ্যন্ড রিছার্স সেন্টর হোলদা পাঙথোকখিবা থৌরম অমদা লাইরিক অসি মায়খুম হাংদোকখি।
থৌরম অদু পরিষদকী ভাইস প্রেসিডেন্ট এস খেলামোহননা ময়াই তাংবল লৌরগা এন. আই. টি আগরতলাগী এসিঃ প্রোফেসর এন অনুরাধা দেবী, আই. সি. এগী হান্নগী এসিঃ ডিরেক্টর এল কুমার অমসুং সাহিত্য পরিষদকী এডভাইজর ৱাংখেম বীরমঙ্গলনা অখন্নবা মীথুংশিং ওইনা শরুক য়াখি। থৌরম অদু মৈরা চুখত্তুনা হৌদোক্নবা মতুং পরিষদকী জেনারেল সেক্রেটারী টিএইচ নীলকুমার না ওক্ন-ৱারোল পীখি। থৌরম দা মীথুং ওইনা এসিঃ প্রোঃ এন অনুরাধা, এল কুমার অমসুং ৱাংখেম বীরমঙ্গল না তোঙান তোঙানবা মীৎয়েং দা লাইরিক অদুগী মরমদা ৱা ঙাংখি।
মণিপুরী সাহিত্য পরিষদনা ফোঙবা বাংলা অমসুং মৈতৈ ময়েকনা নম্বা লামায় ১১৭ গী লাইরিক অসিদা শৈরেং ৩৭ য়াওই। থৌরমগা মরী লৈননা কবি ১২ না শৈরেং শৈদিন্নবা থৌরমদা শরুক য়াখিবা কবিশিং মখোয় অদুদি সিজা মলিনা, খোইস্নাম ওংবী বীরলা, কেএইচ কনিকা, এন প্রফুল্ল বিজয়, কেএইচ মংগল, নেপ্রম মধুমিতা, টি যোগেন্দ্র, হৈগ্রুজম ওংবী গন্ধেশ্বরী, সোয়বম সুরেখা, এস খেলামোহন, সোইবম সৈব্যা, এল মীনা দেবীনি।
সোর্স: মরূপ
0 কমেন্ট:
কমেন্ট তৌবিয়ু