ইম্ফাল, ওক্তোবর ২৯ : দিপার্টমেন্ত ওব ইংলিশ, মণিপুরী য়ুনিভার্সিটিগী রিতয়ার্দ প্রোফেসার কেঐচ কুঞ্জো সিংহন মণিপুরী বাংলা অমসুং মীতৈ ময়েক্তা ইবা ‘চাংদম্নবগী খোরিরোল (থিওরি এন্দ প্রেক্তিসেস)’ অমসুং ‘ভারতকী ত্রাইবেল খোরিরোল নৈনবা’ হায়না মিংথোনবা লাইরিক অনী ঙসি হৌনবী মতুংইন্না মণিপুর প্রেস ক্লাবত ফোঙখ্রে।

থৌরম অদুদা লিলোং এ সিগী এম এল এ এমদি আব্দুল নাসিরনা চীফ গেস্ত, মণিপুরী লেংগ্বেজ এদভাইজরি বোর্দ, সাহিত্য একাদেমি নিউ দিল্লীগী কনভেনর প্রোফেসার রাজেন তোইজান্বনা প্রেসিদেন্ত, শক্নাইরবা ক্রিতিক অমসুং অইবা এল মেমো সিংহ অমসুং মণিপুরী দিপার্তমেন্ত, এম য়ুগী এসিস্তেন্ত প্রোফেসার দাঃ নাওরেম অহঞ্জাও মৈতৈনা গেস্ত ওব ওনারশিং ওইনা শরুক য়াখি।

ঙসি ফোঙখিবা লাইরিক ‘চাংদম্নবগী খোরিরোল (থিওরি এন্দ প্রেক্তিসেস)’ গী মতাঙদা এল মেমো সিংহনা ৱা ঙাঙখি অদুগা ‘ভারতকী ত্রাইবেল খোরিরোল নৈনবা’ অসিগী মতাঙদা দাঃ নাওরেম অহঞ্জাওনা ৱা ঙাঙখি।

লাইরিক অনী অসিগী অইবা রিতয়ার্দ প্রোফেসার ঐচ কুঞ্জো সিংহনা হায়, মহাক্কী অহানবা লাইরিক ‘চাংদম্নবগী খোরিরোল (থিওরি এন্দ প্রেক্তিসেস)’ অসি মারেমগী ওইবা সাহিত্যগী মনুঙদগী মচং ওইবা লাইরিকশিং খনগৎলগা মদুদা য়াওরিবশিং অদু চাংদম্নবনি। মসিনা মালেমগী তোঙান তোঙানবা লৈবাকশিংগী কালচার, পোলিতিক্স অমসুং শেল-থুমগী ফীবম পূম্নমক অসি গ্লোবেলাইজেসন লাকপদা ইমান মান্নবগী ফীবম অমদা লাকপা অসিদা সাহিত্যদা তাবা মমি অদু পুথোক্লগা মালেমগী পেন্দবা লৈরিবশিং অদু পূল্লপ পূনশিল্লগা ময়াই ওইবা লম্বী অমা ফংহন্নবা হোৎনবদা সাহিত্যনা লৌরিবা থৌদাং অদু ঊৎনবা লাইরিক অসি ইবনি।

মহাক্কী অনীশুবা লাইরিক ‘ভারতকী ত্রাইবেল খোরিরোল নৈনবা’ হায়রিবা লাইরিক অসি মরুওইনা ইন্দিয়াদা লৈরিবা স্তেত ৩০ রোম অসিদা মরুওইবা লোল ৩০/৪০ লৈবগী মনুংদা হান্না অদিবাসি কৌরম্বা হৌজিক্না ত্রাইবেল,  এস তি, এস সি হায়রিবা কাঙবুশিং অসিগী পোলিতিকেলগী ফীবম, ইকনোমিগী ফীবম অমসুং কালচারগী ফীবম অসি মতাইদা ইন্থোকপীবদৌনা লৈরম্মী। অদুবু দিমোক্রেসি লাক্লবা মতমদদি মী অমগা মী অমগা চপ মান্নবগী ৱাহন্থোক অমা লাকপা মতমদা মখোয় অসিসু পূল্লপ চিংখৎমিন্নরগা চপ মান্ননা হার্মোনি ওইবা সোসাইতি অমদা পূল্লপ লৈমিন্নবা য়ানবা হোৎনবদা সাহিত্যগী মতেঙ লৌরগা ত্রাইবেলশিংনা ইরকপা সাহিত্যদা করি ফোঙদোক্লি, ত্রাইবেলগী মরমদা অতোপ্পনা ইবা সাহিত্যদা করি ফোঙদোক্লি হায়বসি পারুরগা মদুদগী মরুওইবা পারাশিং লৌখৎলগা নৈনবদুনা দিমোক্রেসিগী ৱাহন্থোক পুরকপদা থোং মান্নবা ইন্দিয়া অমা শেমগৎপদা মতেঙ ওইগদ্রা খনবদগী লাইরিক অসি ইবনি হায়না প্রোঃ কুঞ্জোনা ফোঙদোকখি।

সোর্স: পোক্নফম