ৱার্ল্ড চেম্পিয়নশিপ্তা রোশিবিনা সিলভর মেদল ফংলে
ইম্ফাল, নভেম্বর ২১ : য়ুএসএগী তেক্সাসতা পাঙথোকপা ১৬ শুবা ৱার্ল্ড ৱুশু চেম্পিয়নশিপ্তা ইন্দিয়াগী মহুৎ শিন্দুনা শরুক য়ারিবী মণিপুরগী ৱুশু শান্নরোয় নাওরেম রোশিবিনা দেবী ফাইনেলদা মায়থীবা নংহৌদুনা সিলভার মেদেল ফংখ্রে।
মফম অসিদা ফংবা পাউনা হায়, হাংঝৌ এসিয়ান গেমসকী সিলভার মেদলিস্ত রোশিবিনানা এসিয়ান গেমস অদুদা সেমিফাইনেলদা মায়থীবা পীখিবা ভিয়েতনামগী থি থু ঙুয়েনগা ঙরাং নিংথৌকাবা নুমিৎতা ফাইনেলদা লম্বা তৌনখি। মহাক্কী ভিয়েতনামিজ লম্বা অদুনা মায় পাকখিবনা রেশিবিনানা সিলভারদা কেম্পেন লেইশিনখি। ৱার্ল্ড চেম্পিয়নশিপ অদুদা ইন্দিয়ানা সিলভার অমা অমসুং ব্রোঞ্জ অনী লৌদুনা কেম্পেন লোইশিনখি।
অঙনবদা, কুশাল কুমারনা নুপাগী কেজি ৪৮গী সন্দা কেতাগোরিদা ভিয়েতনামগী হাই ত্রান হুইগী মখূত্তা ০-২ দা সেমিফাইনেলদা মায়থীদুনা ব্রোঞ্জ ফংহৌখি। ছাবিনা নুপীগী কেজি ৪৮ গী কাংলূপ্তা ফিলীপিন্সকী জেন্নিফার কিলাপিওগী মখুত্তা মায়থীবা নংদুনা ব্রোঞ্জ ফংখি। রোশিবিনা হৌজিক হৌজিক্কী তোমথিন ঙান্না মচিন তুমখৎলক্লিবী ৱুশু শান্নারোয় অমা ওইরি অমসুং মহাক্না লৈবাক অসিগী খ্বাইদগী ফবা ৱুশু শান্নরোয়সু ওইরি।
ৱুশু এসোসিয়েসন ওব ইন্দিয়ানা মঙোন্দা চাউনা থাজবা থম্লি। রোশিবিনানা ইন্টারনেসনেল এরেনাদা অচৌবা এচিভমেন্তশিং তান্নবগী তুংগী লাইবক নক্না লৈরি হায়না এসোসিয়েসন অদুনা থাজবা থম্লি। মরকসিদা, ইন্দিয়াগী ৱুশুগী বোদি অদুনা রোশিবিনাবু চহী অসিগী ওইনা লেমজনিংঙাই ওইরবা অর্জুন এৱার্দকীদমক নোমিনেত তৌরি। মনা অদু মহাক্না শোয়দনা ফংবা য়াই হায়না আশা তৌরি। হন্দক্তি মহাক্না লৈবাক অসিগী খ্বাইদগী ফবা ৱুশুগী এচিভর ওইরি।
য়ু এস এগী ৱার্ল্ড চেম্পিয়নশিপ অদুদা ইন্দিয়াগী মহুৎ শিন্দুনা মণিপুরগী ঐচ কর্ণজিৎ শর্ম্মা অমসুং এম সুরজসু শরুক য়াখি। মখোয় অনীনা তাওলু ইভেন্ততা কম্পিত তৌখি। কর্ণজিৎনা তাইজিজান্দা ১১ শুবা মফম কনখি, অদুগা সুরজনা নুপাগী চংক্কান্দা তরেৎ শুবা মফম কনখি।
বিষ্ণুপুর দিস্ত্রক্তকী ক্বাসিফাই খুন্দগী নাওরেম দামু অমসুং রোমিলা দেবী অনীগী অনীশুবা মচানুপী রোশিবিনাগী এচিভমেন্তশিং অমসুং তুংগী আশা ৱাংনা লৈরিবনা স্তেত গভর্নমেন্তনা মহাক্কী চুনবা থবক অমা পীবীদুনা মহাক্কী তুংগী কেরিয়ারগীদমক শেম শাবদা মপাঙ্গল হাপ্পা ঙমগনি হায়না মহাক্কী ফেনশিংনা ফোঙদোক্নরক্লি।
রোশিবিনা হৌজি হৌজিক বিষ্ণুপুর দিস্ত্রক্তকী সি আই কলেজদা গ্রেজুয়েশন তৌরি। মহাক্না এসিয়ান গেমস ২০২২ দা সিলভার মেদল লৌদুনা হল্লকখ্রবা মতুংদা মহাক্কী কলেজনা হরাও তয়াম্না ওকপগী থৌরমদা কলেজ অদুগী প্রিন্সিপাল দাঃ এম মঙ্গিনা লেম্না কলেজ অদুদা মহৈ মশিং তম্নবগী খুদোংচাব পীগনি হায়না লাউথোক্তুনা পূক্নিং থৌগৎখি।
মহাক সাই এন সি ও ই ইম্ফালদা সেন্তর অদুগী হেদ কোচ মাইবম প্রেমকুমার সিংহগী লমজিং মখাদা চাংনা ত্রেনিং চত্থরি অমসুং কোচ অদুনা মহাক্কী তিমগা লোয়ননা নেসনেল অমসুং ইন্টারনেসনেল এচিভর কয়া পুথোকখি। এচিভরশিং অদুগী মনুংদা রোশিবিনানা অহানবা এসিয়ান ৱুশু চেম্পিয়ন ওইরি অমসুং য়েঙ্খোম জাসনসু প্রেমকুমারগী মখাদা শান্নদুনা ইন্দিয়াগী চহী ৩৩ গী ৱুশুগী পুৱারীদা অহানাবা ৱার্ল্ড ৱুশু চেম্পিয়ন ওইখি।
কোচ প্রেমকুমারনা হায়, রোশিবিনানা মহাক্কী ইঞ্জুরিদগী মপূং ফানা ফগৎলক্তুনা হেন্না ফরবা মতৌদা শেম শারগদি মহাক্না মথংগী ৱার্ল্ড চেম্পিয়নশিপ্তা গোল্ড লৌগনি হায়না ঐখোয়না আশা তৌবা য়াই। হৌজিক ফাওবদা রোশিবিনানা নিপল্লক নেসনেল চেম্পিয়ন ওইবা ঙম্লক্লি। মহাক্না নেসনেল গেমস অনীদা গোল্ড অমসুং ইন্টারনেসনেল মেদল ৮ লৌবা ঙম্লি। ইন্তারনেসনেল মেদলশিং অদুগী মনুংদা গোল্ডমরি, সিলভার অনী অমসুং ব্রোঞ্জ অনী য়াওরি।
মণিপুর গভর্নমেন্ত মহাক্না চূনবা থবক অমা মতম চানা পীবিরগদি ঐখোয়না লৈবাক অসিগীদমক অচৌবা এচিভমেন্তশিং তান্নবগী মতম অদু পংলাপ লাপ্লরোই হায়না ঐখোয়না আশা তৌই হায়না কোচ অদুনা মখা তানা ফোঙদোরকখি।
সোর্স: পোক্নফম
0 কমেন্ট:
কমেন্ট তৌবিয়ু