য়েলহৌমী মৈতৈশিংবু মালেমদগী মুৎখিদনবা থৌরাং লৌখৎপীয়ু হায়না য়ুনেস্কোদা চেরোল পীশিনখ্রেঃ অকসু
ইম্ফাল, আগস্ত ১০ : মালেমদা শান্তি পুরক্নবা হোৎনরিবা য়ু এন ওগী মশা অমা ওইরিবা য়ুনেস্কোনা শীন্দুনা চহী খুদীংগী লেপ্পা লৈতনা আগস্ত তাং ৯ খুদীংগী ‘মালেমগী য়েলহৌমীশিংগী নুমিৎ’ হায়না পাঙথোক্লিবা অসিগা মরী লৈননা হৌজিক-হৌজিক মায়কৈ কয়াদগী মণিপুরগী য়েলহৌমী ওইরিবা মৈতৈশিংবু মূৎখিনবা হোৎনরক্লিবা অসিদগী ঙাকথোক্নবা থৌরাং লৌখৎপীয়ু হায়না ওল খা-কংলৈ স্তুদেন্তস য়ুনিয়ন (অকসু) হেদ ওফিস ককচীংনা য়ুনেস্কোদা চেরোল অমা পীশিনখ্রে হায়না লূপ অসিনা থাদোরকপা চেরোল অমনা হায়রি।
চহী লীশীং ৩ হেনবগী পুৱারী লৈজরবা মৈতৈশিং অসি ঈংনা-চীক্না শান্তি ওইনা মণিপুরদা খুন্দারিবা ফুরূপ অমনি। ফুরূপ অসিনা স্পোর্তস, কলচর, মার্সিএর আর্তসনচিংবা হীরম কয়াদা ইন্দিয়াবু মারেমগী থাক্তা শক তাক্তুনা লাক্লি। অদুবু ইখঙ খঙহৌদনা কুকি-নার্কো তেরোরিস্তশিংনা হৌখিবা চহী মে ৩ দগী অফবা মখলগী খূৎলায় পায়দুনা করিসু খঙজদ্রবা ইচম চমজরবা মৈতৈশিংদা ওনশিন্দুনা লান্দারকখিবনি।
কুকিশিংদি ইন্দিয়া অমসুং মণিপুরদা রিফ্যুজিনি হায়বসি আর সুইসানা ইন্দিয়া গবর্নমেন্ততা কুকি রিলিফ ফন্দ নৎত্রগা রিফ্যুজি ফন্দ পীবিনবা হায়জখিবদা ৪ রক থোক্না ইং ১৯৫৭, ১৯৫৯, ১৯৬৬ অমসুং ১৯৬৮ দা ফন্দ পীখিবসিনা ময়েক শেংনা তাক্লিবনি। হৌজিক কুকিশিংনা মৈতৈশিংদা চত্থরিবা থবক অসি হিংচা-য়াইতম্বগী থবক ঙাক্তনি। মসিনা মরম ওইরগা ঙসিদি মৈতৈ কয়া রিলিফ কেম্পতা চঙজফম লৌদুনা ৱানা হিংলি। মসিনা মৈতৈশিং মারেমদগী কাঙ্খুল মুৎখিনবা অচৌবা অকিবা অমা পীরিবনি। মসিদসু নত্তনা কুকিশিংনা মণিপুরগী চীংমায় কয়া কোকথোক্তুনা পোপি থাবা, দ্রগ শুংবা অমসুং লল্লোন-ইতীক্কী থবক থৌরম কয়া পাক শন্না চত্থরকপা অসিনসু মীওইবা সমাজদা অচৌবা অকায়বা কয়া অমা পীরক্লি। অসিগুম্লবা কুকি-নার্কো তেরোরিস্তশিং অসিদগী ঙাকথোক্নবা হোৎনবদা মালেমগী ওইনা শান্তি পুরক্নবা হোৎনবদা অচৌবা থৌদাং লৌরিবা য়ুনেস্কোনা অকনবা মীৎয়েং চঙবিয়ু।
মৈতৈশিংনা তারিবা অৱাবসি লূপ অসিগী ফম্বাক্তা এৱার্নেস পীবিদুনা মীয়ামদা খঙহনবীয়ু। ইন্দিয়া গবর্নমেন্ত অমসুং মালেমগী সেক্যুরিতি এজেন্সিশিংনা মৈতৈশিংবু ঙাক-শেলহনবীনবা থৌরাং লৌখৎপীয়ু। লমদমসিগী হেরিতেজ সাইতশিং কনবদা মতেঙ পাংবীয়ু অমসুং ইন্দিয়া গবর্নমেন্ত, মৈতৈ ফুরূপ লোয়ননা মরী লৈনবশিংগা ৱারী শান্নদুনা স্তেত অসিদনা থোক্লিবা লান লোইশিন্নবা হোৎনবদা মতেঙ পাংবীয়ু হায়রি।
সোর্স: পোক্নফম
0 কমেন্ট:
কমেন্ট তৌবিয়ু