য়াইস্কুল খ্বাইরাকপমগী ‘মৈ ঈশিং নুংশিৎ’ হায়বা লাইরিক ফোঙখ্রে
ইম্ফাল, মার্চ ০৯: ইরমদম মীয়ামগী অপুনবা খোর্জ্জৈ লুপ (ইমাখোল), অৱাং পোৎশংবম খুনৌনা শিন্দুনা ঙসি নুংথিল কৈশাম্পাৎ নিত্যাইপাৎ চুথেক্তা লৈবা দি আই পি আরগী ওদিটোরিয়ামদা লুপ অসিগী পেত্রোন মেম্বর য়াইস্কুল খ্বাইরাকপমনা ইবা ‘মৈ ঈশিং নুংশিৎ’ হায়না মিঙথোনবা লাইরিক অমা ফোঙখ্রে।
লাইরিক ফোঙবগী থৌরমসিদা মণিপুর ষ্টেট কলা একাদেমিগী সেক্রেটরি সুনন্দ থোকচোম (এম এস এস), ইমাখোলগী প্রেসিদেন্ট ডা. চিঙ্গাংবম চন্দ্রকলা অমদি নহারোল সাহিত্য প্রেমি সম্মিটিগী প্রেসিদেন্ট নাওরোইবম ইন্দ্রমনিনা মথংশিৎনা অথোইবা মীথুং, থৌরম মপু অমদি অখন্নবা মীথুংলেন ওইনা শরুক য়াখি।
ঙসি ফোঙখিবা লাইরিক অসি লুপ অসিগী ওইনা ১২০ অদুগা অইবা অসিগীনা ১৯ শুবা লাইরিকনি। থৌরমসিদা লমদমসিগী তোঙান তোঙানবা খোরিরোলগী লুপশিংগী মীওইশিং অমদি খোরিরোলবু নুংশিবা মীওই কয়ানা শরুক য়াখি।
ফোঙলিবা লাইরিক অসিগী মরিকচুম্বা ৱাফম কয়া অইবা মাখোনমনি মোংশাবনা থমদুনা লাইরিক অসিগী মশক তকাখি। মহাক্না লাইরিক্কী মরমদা পোঙদোকপগা লোয়ননা অহল লমনশিংগী কোকতা লৈরিবা অফবা চৎন-লোনচৎ অমদি ঐখোয়না তানবদা ফংলরোইদবা মহৈশিং তমহৌনবা ঐখোয় পুম্নমক্না হোৎনসি।
ঐখোয়না মখোয়দগী লৌহৌবা মহৈশিং অসি ঐখোয়না অমুক হৌরক্লিবা নহাশিংদা তাকপী তম্বীরমসি হায়খি। য়াইস্কুল খ্বাইরাকপমদা মৈ, ঈশিং, নুংশিৎকী মরুওইবশিং খঙননবা লাইরিক অসি পুথোকপনি হায়খি।
সোর্স: হুইয়েন লানপাউ
0 কমেন্ট:
কমেন্ট তৌবিয়ু