আপডেট:
image

শজিবু থাদগী হৌরগা লমতা থা অরোইবা ফাওবগী সনামহী কিয়োংগী কেলেন্দার ফোঙখ্রে

ইম্ফাল, মার্চ ২১ : শজিবু থা মৈতৈগী চহী হৌবা নুমীৎতগী অরোইবা থা লমতা ফাওবগী চহী অমগী থাপান পাবা কেলেন্দার ফোঙবগী থৌরম মণিপুর প্রেস ক্লাবতা পাঙথোকখ্রে। লাইনিংথৌ সনামহী থৌগল কাঙলুপনা শীন্দুনা মণিপুর প্রেস ক্লাবতা পাঙথোকপা থৌরম অদুদা সনামহী কিয়োংগী ৱাঙাংলোয় লাইশ্রম পোইরৈতোননা পাউমীশিংদা হায়খি, হয়েং অসি শজিবুগী নোংমা পানবা হায়দুনা কংলৈপাক মণিপুর অসিগী শজিবু চৈরাওবা হায়দুনা খ্বাইদগী চাউবা থৌরম অমনি।

চহী হৌবগী থৌরম পাঙথোক্কদবা নুমীৎ অসিদগী কুমজা টেক হৌনবা থাজ নৌহৌনবা, শজিবু লাকয়েন তাইবা হায়বা থৌরম অসিসু ঙসিদগী হৌগদৌরিবনি। মসিগা লোয়ননা লাইনিংথৌ সনামহী থৌগল কাঙলুপ, ফাউন্দেসন ফোর য়ুনিভার্সিটি ওফ সনামহী কালচার সেলোই লংমাইচীংদা লৈবদা খুৎশম্নদুনা সনামহী কিয়োংদা পাঙথোক্লগনি।

লৈপাক অসিদা লৈরিবা সলাই তরেৎকী মপারী মমোমলোয়শিংদা চহী হৌবগী য়াইফ পাউজেল পীজবগা লোয়ননা মপান লমদা লৈরিবা কাছার, বাংলাদেশতা লৈরিবা মৈতৈশিংদসু য়াইফ পাউজেল পীজরি। মালেম অসিদা লৈরিবা নমুপোং মীওইবা হায়দুনা তাইবংপান অসিবু শেশ্বীবা মপু লৈ থাজরিবা পুম্নমকশিংদসু লাইনিংথৌ সনামহী থৌগল কাঙলুপ, ফাউন্দেসন ফোর য়ুনিভার্সিটি ওফ সনামহী কালচার সেলোই লংমাইচীংগী মায়কৈদগী য়াইফ পাউজেল পীজরি। হন্দক্কী চহী অসিদগী থাপালোন অসিসু পাঙথোকচবা হৌরদুনা ফোঙবগা লোয়ননা মীয়ামদা খঙহঞ্জবনি।

চৈরাওবা নুমীৎ অসিদা থৌনি থৌরম কয়াগা লোয়ননা সনামহী কিয়োং সেলোই লংমাই চীংগী শুমাং মথৌপুঙ পুঙদা কংলৈগী মশাইকোন্দা থাবল লিরোল শকপা অমদি ওগ্রি চোংবা পাঙথোকচবনি। মসিদা কংলৈচাশিংনা নাৎকী ফিজোল শেৎপীয়ু।

শজিবু লাকয়েন তাইবা থৌরম অসিসু য়াম্না মরুওইবা মৈতৈ ফুরুপকী চহী হৌবা নুমীৎতা পাঙথোকপা থৌরমনি। মসিনা মৈতে ফুরুপ খক্তা নত্তনা লমদমসিগী লৈজরক্লবা তৌদবা য়াদ্রবা থৌদাং অমা ওইনা লৈরকপা লিক্লমগী মনুং চনদবনি। অদুনা লমতা থা হায়বসি মৈতৈ ফুরুপকী চহী অমগী মপুং ফাবা অরোইবা থাসু থা ওইদুনা লাকপা মরম্না চহী লোইবগা চহী হৌরকপা নুমীৎ অসিদা শজিবু হৌরবনিনা লাকয়েন তাইবা হায়বসি লাক্কদৌরিবা চহীসিগী য়াইফনবনি হায়নসু ফোঙদোকখি।

সোর্স: হুইয়েন লানপাউ

0 কমেন্ট:

কমেন্ট তৌবিয়ু

আপনার ইমেইল ঠিকানা প্রচার করা হবে না. প্রয়োজনীয় ক্ষেত্রগুলি চিহ্নিত করা আছে *

পাউ অতৈসু

আপডেট: