ক্ষেত্রিময়ূম রাশিদা চোংথাম বিমলাবসন্ত এৱার্দ পীখ্রে
ইম্ফাল, দিসেম্বর ১৫ : লৈকোলনা লমদম অসিগী শক্নাইরবী ভেতরান এক্তর ক্ষেত্রিময়ূম নিঙোল লাইরেনলাকপম ওংবী রাশি দেবীদা চোংথাম বিমলাবসন্ত এৱার্দ-২০২৩ পীদুনা ইকায়খুম্নখ্রে।
লৈকোল (লৈমরোল খোর্জৈকোল) না শীন্দুনা মণিপুর প্রেস ক্লাবতা পাঙথোকখিবা মনা খূৎশিন্নবা অমসুং লাইরিক ফোঙবগী থৌরম অদুদা চীফ গেস্ত ওইনা শরুক য়াখিবা শক্নাইরবা ফিল্ম মেকর অরিবম শ্যাম শর্ম্মানা এৱার্দ অসি ক্ষেত্রিময়ূম রাশিগী মফমদা খূৎশিন্নখি। এৱার্দ অসিদা শেল ওইনা লুপা লীশীং ১০, সাইতেসন অমসুং সাল অমা য়াওরি। এৱার্দ অসি লৈখিদ্রবা চোংথাম বসন্তনা মহাক্কী লোয়নবী লৈখিদ্রবী বিমলাগী মিংদা কৎলম্বনি।
পনবা য়াই, চহী অসিগী চোংথাম বিমলাবসন্ত এৱার্দ ফংলবী ক্ষেত্রিময়ূম রাশি অহানবা ফিচর ফিল্ম মতমগী মণিপুর (১৯৭২) দগী হৌরগা লমজা পরশুরাম (১৯৭৪), শাফবী (১৯৭৬), ওলাংথাগী ৱাংমদসু (১৯৭৯) অমসুং মালেমদা মণিপুরী ফিল্মগী ফিদা অমা কনখিবা ইমাগী নিংথেম (১৯৮১) অমসুং হৌজিক দিজিতেলগী ইরা অসিদসু ফিল্ম কয়াদা কুম্লকখিবীনি। মহাক ঙল্লিঙৈ মতমদা মণিপুরী ফম্বাক লীলা (থিয়েতার) দসু অচৌবা মফম অমা কল্লগা লাকখি।
ক্ষেত্রিময়ূম রাশি, ইমাগী নিংথেম (১৯৮১)
থৌরম অদুদা চীফ গেস্ত এ শ্যাম শর্ম্মানা লুচিংদুনা ময়া নেপ্রম, নহাকপম অরুনা অমসুং লোংজম সঙ্গিতানা এদিতর ওইবা ৱারী মচাগী খোমজিনবা লাইরিক ‘লৈকোলগী লৈচল’, ময়াংলম্বম সুমতিনা ইবা ‘পুন্সিগা লৈচিল’ হায়না মিংথোনবা ৱারী মচাগী লাইরিক অমদি লোংজম সঙ্গিতনা ইবা লৈকোলগী চেফোঙ ‘লৈকোল’ ফোঙখি।
লৈকোলগী প্রেসিদেন্ত কেএসঐচ সুবদনীনা প্রিসাইদ তৌখিবা থৌরম অদুদা মণিপুরী লিতরেরি সোসাইতিগী প্রেসিদেন্ত নোংমাইথেম কিরনকুমারনা গেস্ত ওব ওনার ওইনা শরুক য়াখি।
সোর্স: পোক্নফম
0 কমেন্ট:
কমেন্ট তৌবিয়ু