যুব পুরস্কার, বাল সাহিত্য পুরস্কার লাউথোক্লে এ কে জিতেন অমসুং শান্তো এম য়াওরক্লে
ইম্ফাল, জুন ১৮ : সাহিত্য একাদেমীগী চহী অসিগী সাহিত্য একাদেমী যুব পুরস্কার অমসুং বাল সাহিত্য পুরস্কার পীগদবা অইবশিংগী মিং লাউথোকপদা মণিপুরী লোলগী ওইনা মথংশিৎনা এ কে জিতেন অমসুং শান্তো এম য়াওরক্লে।
সাহিত্য একাদেমীনা শক খঙবা লৈবাক অসিগী তোঙান-তোঙানবা লোলশিংদা পীবা মনা অনী অসিদা শেল ওইনা লুপা লীশীং ৫০/৫০ য়াওরি।
সাহিত্য একাদেমী যুব পুরস্কার, ২০২৫ পীনবা খনগৎপদা মণিপুরী লোলগী ওইনা য়াওরক্লবা এ কে জিতেন (অকোইজম জিতেন) ইম্ফাল ইস্ত দিস্ত্রিক্তকী মনুং চন্না লৈবা খুন্দ্রাকপম ময়ায় লৈকায়দগীনি। অদুগা বাল সাহিত্য একাদেমী পীনবা খনগৎপদা য়াওরক্লবা শান্তো এম (ময়েংবম শান্তোমনি সিংহ) না ইম্ফাল ওয়েস্ট দিস্ত্রিক্তকী মনুং চন্না লৈবা লৈফ্রাকপম (ৱাঙ্গোই মমাঙ) দগীনি। এ কে জিতেনগী ‘খোয়ুম নোংদম কাও’ হায়না মিংথোনবা ইপিক্তা সাহিত্য একাদেমী যুব পুরস্কার পীনবা খল্লকপনি অদুগা শান্তো এমগীনা ‘অঙাংশিংগী শান্নবুংদা’ হায়না মিংথোনবা প্লেদা বাল সাহিত্য পুরস্কার পীনবা খল্লকপনি।
যুব পুরস্কারগীদা মণিপুরী লোলগী ওইনা দাঃ চোংথাম নরেন্দ্র সিংহ, মেঘচন্দ্র কোংবম অমসুং পোলেম নবচন্দ্রনা জুরি মেম্বরশিং ওইখি অদুগা বাল সাহিত্য পুরস্কারগীদনা দাঃ খাঙেম্বম শমুঙৌ, নাওরেম বীরেন্দ্রজিৎ অমসুং দাঃ লোংজম শরতচন্দ্র সিংহ (শরতচন্দ্র লোংজোম্বা) না জুরি মেম্বরশিং ওইখি।
এ কে জিতেন ইং ১৯৯৫ দা পোকপনি। অপোকপগী মিংনা অকোইজম সানমতুম অদুগা অপোকপীগী মিংনা মেমচৌবী (মঙ্গোলঙানবী) কৌই। মহৈগী থাক্না এম এ মণিপুরীনি। মহাক্কী হৌখিবা ইং ২০১৮ দা ফোঙখিবা ‘শক্তম’ হায়না মিংথোনবা শৈরেংগী লাইরিক্তা মণিপুরী লিতরেরী সোসাইতিগী অঙোম নিংথৌ অমসুং অঙৌরে সাহিত্য মনা, ২০২১ অমসুং দিবিনা তখেল্লম্বম নীংশিং মনা, ২০২৪ ফংখ্রে। ‘ঐখৈায় ৱাখল তারে’ হায়না মিংথোনবা সোর্ত ফিল্ম অমসু পুথোকখ্রে। সোর্ত ফিল্ম অদু কলচরেল ফোরাম মণিপুরনা পীবা স্তোরি/দিরেক্তরগী থৌদাং লৌরগা পুথোকখিবনি। মহাক হৌজিক হৌজিক মণিপুরী লিতরেরী সোসাইতি, কলচরেল ফোরাম মণিপুর অমসুং অইবা অইবীশিংগী পাউশানফমগী মেম্বর ওইদুনা সাহিত্যগী থৌরম কয়াদা শরুক য়ারি।
অমরোমদা, ময়েংবম শান্তোমনি সিংহ ইং ১৯৫২ গী ফেব্রুয়ারী তাং ১১ দা পোকপনি। অপোকপগী মিংনা ময়েংবম তোম্বী সিংহ অদুগা অপোকপীগী মিংনা ময়েংবম ওংবী বারুনী দেবী কৌই। মহৈগী থাক্না এম এ (মেথমেতিক্স) অমসুং এল এল বিনি। ইং ১৯৭৭ তা কো ওপরেতিব দিপার্তমেন্তকা কো ওপরেতিব ইন্সপেক্তর ওইনা থবক চঙই। অদুগা ইং ২০১৪ গী দিসেম্বর ৩১ দা দিপুতি রেজিস্ত্রার ওইনা থবক্তগী পোত্থাখি। মহাক্না ইবা ফেমিলি ওয়েলফিয়ার প্রোগ্রামগী লীলা ৫ য়াওনা লীলা ১২ ওল ইন্দিয়া রেদিও, ইম্ফালদা লান্থোকখ্রে। ‘চেল্লগদি হিংগদ্রা’ হায়বা ঐচ আই ভিগী এৱারনেসতা য়ূম্ফম ওইবা থাংজ ১৩ গী ইপিসোদ ১৩ গী ওইবা রেদিও সেরিএল অমসু ওল ইন্দিয়া রেদিও, ইম্ফালদা শন্দোকখ্রে। হৌজিক ফাওবদা দ্রামা ১২ অমসুং শৈরেংগী লাইরিক ২ ফোঙখ্রে। ফোঙখ্রবা দ্রামাশিং অদুনা-লৈশা পাখঙ পার্ক (২০১৩), মীকুপ খরদুই পুন্সিগী মহাও (২০১৮), হয়েংগীদমক ঙসি (২০১৮), অঙাংশিংগী শান্নবুংসিদা (২০১৯), লীলা পিকত্রু মঙা (২০১৯), তাইবঙ ফাওদ্রিঙৈ (২০১৯), অপঙ নম্বর ৱান (২০২১), কনানা হেনগে য়েংশি (২০২১), মল্ল মল্ল লৈনুংশি (২০২২) অমসুং তাবুনুঙদগী (২০২২) নি। অদুগা শৈরেং লাইরিক অনী অদুনা মথংশিৎনা অনৌবা মায়থোঙ (২০২১) অমসুং অনৌবা মায়থোঙ (মীতৈ ময়েক) (২০২১) নি।
সোর্স: পোক্নফম
0 কমেন্ট:
কমেন্ট তৌবিয়ু