মীতৈ নুপীশিংনা মীতোপ্তা য়ূম পানবীগনু, অঙাং মশীং হেন্না পোকপীয়ু: এমএলএ রামেশ্বর
ইম্ফাল, মার্চ ২৬ : মণিপুর লৈঙাক্কী প্লান্নিং এন্দ দিভেলপমেন্ট ওথোরিটি (পি দি এ) গী চেয়ারমেনসু ওইরিবা কৈরাও এসেমব্লি কন্সটিট্যুএন্সিগী এম এল এ লৌরেম্বম রামেশ্বর মীতৈনা মীতৈ নুপীশিংনা মীতোপ্তা য়ূম পানবগীগনু অমসুং অঙাং মশীং য়ামহনবীয়ু, হেন্না পোকপীয়ু হায়না ফোঙদোকখ্রে।
ৱাফম অসি ঙসি কাছারগী লক্ষিপুরগী বিনাকান্দিদা লৈবা সাউথ বরাক কমপ্লেক্সতা পাঙথোকখিবা কুমজা ১৯৬৪ দা লিংখৎলগা সিলচরদা হেদ ক্বার্টার ওইরিবা ওল আসাম মণিপুরী য়ুথস এসোসিয়েসন (আময়া) না শীন্দুনা পাঙথোকখিবা ‘দি প্রেসিয়াস দে’ গী থৌরমদা অথোইবা মীথুংলেন ওইরদুনা এম এল এনা ফোঙদোকখিবনি।
মহাক্না মখা তানা হায়, লৈবাক কনসি অমসুং খুন্নাই কনসি হায়রগদি মীতৈ নুপীশিংনা মীতোপ্পা য়ূম পানবীগনু, অঙাং মশীং য়ামহনবীয়ু অমসুং হেন্না পোকপীয়ু হায়রদুনা মীতোপ্না ইশাগী য়ূমদা থবক শুবা লাক্লম্বদু ঙসিদি ঐখোয়না মীগীদা থবক থিবা চৎপা তারক্লিবা অসিদসু য়াম্না চেকশিনবীয়ু হায়খি।
ইশা ইশাগী শেম্মীৎলোন ফগৎহন্নবা কন্না হোৎনবীয়ু। লোয়ননা ঙসি পাঙথোকখিবা থৌরম অসিদগী হেন্না চাওনা য়ামদ্রবদা মফম অসিদা নুমিৎ হুমনি লেপ্লগা ময়াম অপূনবগী ওইনা পূনমিন্ননবা হোৎনরসি। মদুতদা ঐখোয়না পাম্লিবা খুদিংমক ফংবা ঙমগনি। লোয়ননা পূন্না চঙশিনমিন্নসি হায়খি।
লোয়ননা করিগুম্বা অপাম্বা অমা ফংনবা হোৎনবদা অপূনবগী শক্তম শাগৎপা মথৌ তাই। আসামদা লৈরিবা ইচিল ইনাওশিংনা পূনশিন্দুনা তাল্লবদি দিমান্দ খুদিংমক ফংলোইদবা লৈতে। আসামদা তারিবা মণিপুরীশিংগীদমক মণিপুর লৈঙাক অমদি মীয়াম্না মতম পূম্বদা মতেং পাংগনি হায়খিবগ লোয়ননা ৱাইখুগী চিংথনবগী থৌওং তোকপীরো হায়নসু আপীল তৌখি।
থৌরম অসিদা অখন্নবা মীথুংলেন ওইনা শরুক য়াখিবা লক্ষিপুর এসেমব্লি কন্সটিট্যুএন্সিগী এমএলএ কৌশিক রাইনা মণিপুরী হায়রিবা ফুরুপ অসি ইনাক খুনবা কালচার লৈবা ফুরুপ অমনি। মরম অসিনা চহী ৪০/৫০গী মতুং ফাওবা মখোয়গী কালচার মাঙহন্দনা থম্নবা মণিপুরী আর্ট এন্দ কালচার কমপ্লেক্স অমা মথং থাদা মফম চাবা য়েংদুনা শাগৎপা হৌরগনি হায়খি। লক্ষিপুরদা কালচারগী খক্তা নত্তনা পুৱারীগী ওইবা কয়াসু য়োকখৎতুনা থম্নবা মফমসু থম্লগনি হায়না মীয়ামদা লাউথোককি।
থৌরম অসিদা অখন্নবা মীথুংলেন ওইনা শরুক য়াখিবা মনিদকোগী চেয়ারমেনসু ওইরিবা ময়াং ইম্ফাল এসেমব্লি কন্সটিট্যুএন্সিগী এম এল এ কোংখাম রোবিন্দ্রোনা ফোঙদোকখিবদনা সিলচরদা অথুবা মতমদা মণিপুর ভবন অমা শাননবগী ৱাফম চীফ মিনিষ্টার এন বিরেনদা হৌদোক্তুনা তান্নরগনি হায়না ফোঙদোকখি।
অদুগা থৌরমগী ময়ায় তাংবল লৌখিবা আময়াগী চীফ এদভাইজরনা আসামদা খুন্দারিবা মীতৈশিংগী ওটোনোমাস দিষ্ট্রিক্ট কাউন্সিল অমা ফংনবী খোঙজং কয়া অথুবা মতমদা চঙশিনবা হৌরগনি। লোয়ননা খোঙজং অসিদা পূম্নমক্না শৌগৎপীয়ু অমসুং শরুক য়ামিন্নদুনা চঙশিনমিন্নসি হায়খি।
ঙসিগী থৌরম অসিদা অখন্নবা মীথুংরেন ওইনা শরুক য়াখিবশিংগী মনুংদা য়ু সী এমগী প্রেসিদেন্ট জয়চন্দ্র কোন্থৌজম, সোসল সাইন্টিষ্ট ডা. ধনবির লাইশ্রম, ইপসাগী ভাইস প্রেসিদেন্ট খুরাইজম অথৌবা, জিরিবামগী সোসল ৱার্কর এন বুধচন্দ্র, মণিপুরী সাহিত্য পরিষদ (আসাম) গী ভাইস প্রেসিদেন্ট কোইজ শ্বপন, আময়াগী লিগেল এদভাইজর এদভোকেট এন জি রামাকান্ত, মণিপুরী নেসনেল কাউন্সিল (গুৱাহাটি) গী প্রেসিদেন্ট কে এস ঐচ সিংহজিৎ, মাও য়ুনিয়ন ইম্ফালগী প্রেসিদেন্ট ডা. পুনি লোসি মাও অমসুং ওল আসাম মণিপুরী উইমেন মৈরা পায়বী কোওর্দিনেসন কম্মিটিগী প্রেসিদেন্ট অরুনানচিংবনা ওইখি।
সোর্স: হুইয়েন লানপাউ
0 কমেন্ট:
কমেন্ট তৌবিয়ু