ইম্ফাল, ওক্টোবর ২৭ : সিনে রাইটার্স এন্দ প্লেরাইটত ফোরাম (সি দব্লিউ পি এফ) মণিপুরনা ফিল্ম ফোরাম মণিপুর অমসুং মণিপুর স্তেত ফিল্ম দিবলপমেন্ত সোসাইতিগা পূন্না খূৎশম্নরগা ‘মণিপুরী ফিল্ম চাওখৎনবা হোৎনবদা ফিল্ম স্কৃপ্তগী থৌদাং’ হায়বা হীরমসিদা নোংমগী ওইবা সিম্পোজিয়াম অমা ঙসি পাঙথোকখ্রে।

পেলেস গেত্তা লৈবা এম এস এফ দি এসগী ওদিতোরিয়ামদা পাঙথোকখিবা থৌরম অদুদা সিনে রাইটার্স এন্দ প্লেরাইত ফোরাম মণিপুরগী প্রেসিদেন্ত মনাওবী এম এম, ফিল্ম ফোরাম মণিপুরগী চেয়ারমেন এল সূর্যকান্ত শর্ম্মা অমসুং এম এস এফ দি এসগী সেক্রেটারি সঞ্জু বাচস্পতিময়ূমনা প্রেসিদিয়াম মেম্বরশিং ওইনা শরুক য়াখি।

থৌরম অদুগী শরুক অমা ওইনা সিনে রাইটার্স এন্দ প্লেরাইতকী লৈখিদ্রবা অইবশিং অমসুং লমদমসিদা থোক্লিবা ঈরাং অসিদা ইরমদম ইফুরূপকীদমক থৱায়না পোন্থা পীখ্রবা অথৌবশিংগী মফমদা ইকায়খুম্নবা ঊৎপগা লোয়ননা মিনীৎ ২ তুমীন্না লেপ্তুনা অৱাবা ফোঙদোকখি।

সিম্পোজিয়াম অদুদা রিসোর্ছ পার্সন ৫ না তোঙান-তোঙানবা হীরমশিংদা ৱা ঙাঙখি। মালেমগী ফুরূপশিংগী মরক্তা থোক্লিবা মূক্নবা অমসুং ফিল্মদা তারিবা মমিগী মরমদা মোইরাংথেম রাজেন, স্কৃপ্ত রাইতরশিংনা লৌরিবা থৌদাংগী মরমদা অজিৎ য়ূম্নাম, ফজবা ফিল্মগীদমক ফজবা স্কৃপ্তকী মরমদা য়াম্বেম তোম্বী, ফিল্ম মার্কেত্তা স্কৃপ্তকী থৌদাংগী মরমদা ও সি মৈরা অমসুং মণিপুরী ফিল্ম স্কৃপ্তকী মচৎ অমসুং অওনবা হায়বা হীরম অসিদা বিনোরঞ্জন ওইনামনা ৱা ঙাঙখি।

ঙসিগী থৌরম অদুগী মনুং চন্না নেসনেল ফিল্ম এৱার্দ ফংলকখ্রবা ফিল্মগী লমদা থবক তৌরিবশিংসু ওক্তুনা মখোয়বু ইকায় খুম্নবা ঊৎখি।

সোর্স: পোক্নফম