মণিপুরীনা মহৈ তম্বগী অয়াবা পীবা নুমিৎ জারিবোন্দা ‘ইমা নীংশিংবা নুমিৎ’ পাঙথোকখ্রে
আগরতলা, মার্চ ২ : ইং ১৯৫৬ দা মপান মণিপুরদা ইমালোল মণিপুরী মহৈ তম্বা হৌবা য়াবগী আসাম লৈঙাক্না অয়াবা পীখিবা নুমিৎবু ‘ইমা নীংশিংবা নুমিৎ’ হায়না থৌগন মরূপ জফিরবোন, হাইলাকান্দিনা চহী খুদিং পালন তৌবগা লোয়ননা হন্দক চহী লুপ অসিগী ৬৭ শুবা মপোক কুমওন থৌরম ঙরাং মার্চ ১, লাইশ্রমখুন মমাং লৈকাইগী য়াইফা শঙলেন্দা পাঙথোকখ্রে। থৌগন মরূপকী অঙম্বা নেপ্রম মনিন্দ্রনা মীফম মপু ওইদুনা পাঙথোকখিবা কুমওন থৌরম অদু জারিবোন কলা একাডেমি প্রেসিডেন্ট থিংগোম বেনুবাবুনা অখন্নবা মীথুং ওইখি।
থৌরমদা মণিপুর ষ্টেট শুমাং লীলা কাউন্সিলগী প্রেসিদেন্ট মাইবম পূর্ণিমাসি লৈমা, মেম্বার পিএইচ গুনচন্দ্র শর্ম্মা, সঙ্গীত নাটক একাদেমি এৱার্দি এসএইচ হেমন্ত, এনএসডি মেম্বার ক্ষেত্রি য়ুগিন্দ্র নচিংবা শরুক য়াখি হায়রি। থৌরম অসিগা মরী লৈননা অকন্নবা ওজা খরা কৈসাম বীরেন্দ্র, এম দেব (সুব্রাম), এস প্রিয়ব্রত, এল খগেন্দ্র ইকাইখুম্নবগা লোয়ননা এইচ.এস.এল.সি অমসুং ঐইচ. এস দা মকোক থোংলকপা মহৈরোইশিং, শান্ন খোৎনবগী লমদা মায় পাক্নবশিং ওকখি। পনবা য়াবদি মণিপুরগী ৱাংমদা আসামদা ইং ১৯৫৬ গী জুন ৭ দা লৈঙাক্না নোটিফিকেশন থোক্তুনা মণিপুরী লোলনা মহৈ তম্বা হৌবা য়াবগী অয়াবা পীখি। চহী অদুমক্তদা লিংখৎখিবা থৌগন মরূপকী ৬৭ শুবা ফাউন্ডেশন ডে নুমিৎ মার্চ ১, চহি খুদিং পাঙথোক্তুনা লাক্লি।
সোর্স: মরূপ
0 কমেন্ট:
কমেন্ট তৌবিয়ু