আপডেট:
image

বাংলাদেশকী কালচারেল টিম মণিপুরী সঙাই ফেষ্টিভেল শরুক য়ানবা ইম্ফালদা থুংলরে

ইম্ফাল, নভেম্বর ১৯ : থা অসিগী ২১দগী ৩০ ফাওবা নুমিৎ ১০ নি চুপ্না পাঙথোক্কদৌরিবা মণিপুর সঙাই ফেষ্টিবেলগী ১১ শুবা এডিশনদা শরুক য়ানবগীদমক্তা ঙসি বাংলাদেশকী মণিপুরী কালচারেল কমপ্লেক্সকী মীওই ২৭ না শাবা কালচারেল টিম অমা ইম্ফালদা থুংলরে। বাংলাদেশকী কালেচারেল টিম অদুনা ঙসি নুমিদাংৱাইরম পুং ৩ রোম তাবদা ইম্ফাল এয়ারপোর্টতা থুংলবদা মণিপুর টুরিজম দিপার্টমেন্ট, মনিৱুদ টিম অমদি তোঙান তোঙানবা মীওই কয়ানা হরাও তয়াম্না ওক্তুনা লেংয়ান ফি খুদোল তমখি।

ঙসি ইম্ফালদা থুংলখিবা বাংলাদেশকী কালচারেল টিম অদুদা য়াওরকখিবা বাংলাদেশ সুপ্রিম কোর্টকী সিনিয়র এডভোকেট লাইরেঞ্জাম সুরচন্দ্র সিনহানা পাউমীশিংদা ফোঙদোকখিবদা মণিপুর সঙাই ফেষ্টিভেলদা শরুক য়ানবগীদমক্তা ঙসি থুংলরিবা কালচারেল টিম অসিনা অহানবা ফেসনি। হয়েং ২ শুবা ফেসকী ওইনা মণিপুরী কালচারেল কমপ্লেক্স বাংলাদেশকী মীওই ১০না শাবা কালচারেল টিম অমসু ইম্ফালদা থুংলগনি। হন্দক পাঙথোক্কদৌরিবা মণিপুর সঙাই ফেষ্টিভেল অসিনা মণিপুরগী চিফ মিনিষ্টার এন বিরেনগী ইনিসিয়েটিভ অমগী মতুং ইন্না মণিপুর টুরিজম দিপার্টমেন্টনা শিল্লগা মখোয়বু শরুক য়াবা ফংহনবীবা অসিগীদমক্তা হায়নিংঙাই লৈতনা ফোঙদোকচরি। মসিনা লমদম অসিগী ইপা ইপুশিংনা চৎলম্বা কালচার অদু বাংলাদেশতসু চাওখৎহন্নবা হোৎনবদা অচৌবা মতেং ওইগনি।

বাংলাদেশতা লৈরিবা মৈতৈশিংগী মশিং অসি শুপ্নগী লিশিং ১৫-১৬ খক্তমক্নি। হৌজিক অসি মৈতৈগী কালচার অসি বাংলাদেশতদি শিথরকপগুম্না তৌরে। মণিপুর গভর্ণমেন্টনা স্পোন্সর তৌবিরগা বাংলাদেশতা লৈরিবা মৈতৈগী লুচিংবশিং অমসুং আর্টিষ্টশিংবু চহি খুদিংগী মণিপুর সঙাই ফেষ্টিভেলদা শরুক য়ানবগী খুদোং চাবা পীবিরগদি বাংলাদেশত লৈরিবা মৈতৈশিংনা ঐখোয়গী ওইবা নাৎ-কালচার অসি য়োকখৎনবা হোৎনবদা হেন্না খুদোংচাবা অমা পীবদা নত্তনা ঐখোয়গী কালচার অসি হেন্না চাওখৎকনি। বাংলাদেশকী মীয়াম্না মণিপুরগী কালচারদা হেন্না থৱাই য়াওরক্কনি। কালচারদা নত্তনা তোঙান তোঙানবা বিজিনেস অমদি প্লান কয়াসু মায় পাকপা ঙমগনি। 

মণিপুর অসি ঐখোয়গী ইপা ইপুশিংগী হৌরকফম ওইবা মরম্না ঐখোয়না লাকপা মতমদা লমদম অসিগী মীয়াম্না হরাও তয়াম্না ওক্লম্বা অসি উবদা পুক্নিংদা নুংঙাইবা অমসুং হায়ফম খঙদনা মমিৎতগী মপি তানা পাউদমখি।

সোর্স: থৌদাং

0 কমেন্ট:

কমেন্ট তৌবিয়ু

আপনার ইমেইল ঠিকানা প্রচার করা হবে না. প্রয়োজনীয় ক্ষেত্রগুলি চিহ্নিত করা আছে *

পাউ অতৈসু