ইম্ফাল, ওক্টোবর ২২ : রাইটার্স ক্লাব মণিপুর নম্বোলগী ২৯শুবা মপোক কুমওনগা মরী লৈননা শক্নাইরবা অইবা প্রোফেসার নোংমাইথেম তোম্বীগী ‘ ৱাহৌদোক অমসুং অতৈ ৱারেং খরা’ হায়বিবা নৈন-ৱারেংগী লাইরিক অসিদা নামৈরাকপম চন্দ্রেশ্বর (কামেশ্বর) নীংশিং সাহিত্য মনা ২০২৩ পীদুনা ইকায়খুম্নখ্রে।

ঙসি মণিপুর প্রেস ক্লাবতা পাঙথোকখিবা থৌরম অমদা প্রোফেসার এন তোম্বীদা মনা অসি খূৎশিন্নখি। চহী অহুম-অহুম লৈরগা পীবা মনা অসিদা শেল ওইনা লুপা লীশীং ২৫, সাইতেসন অমসুং সাল অমা য়াওরি। মনা অসি লৈখিদ্রবা নামৈরাকপম চান্দেশ্বর (কামেশ্বর) গী লোয়নবী নামৈরাকপম ওংবী পশোৎলৈমা, মচানুপা এক্স-এম এল এ নামৈরাকপম লোকেন অমদি ইমুং-মনুংনা কৎপনি।

থৌরম অদুদা দাঃ থিংবাইজম নবকুমারনা ইবা ‘লোয়ালমগী মপাউ’ (এ মিথো-লিজেন্দরি স্তোরি) হায়না মিং থোনবা লাইরিক অমসুং শরতচন্দ্র নোংথোম্বমনা ইবা ‘খোঙ্গুল’ হায়না মিংথোনবা পুন্সি ৱারীগী লাইরিক অমসু ফোঙখি। থৌরম অদুদা এম য়ুগী মণিপুর দিপার্তমেন্তকী রিতয়ার্দ প্রোফেসার পোলেম নবচন্দ্রনা চীফ গেস্ত, রাইটার্স ক্লাব মণিপুর নম্বোলগী ভাইস প্রেসিদেন্ত খাইদেম তোম্বনা প্রেসিদেন্ট ওইনা শরুক য়াখি।

ইম্ফাল কলেজগী রিতয়ার্দ প্রিন্সিপাল দাঃ এম প্রিয়োব্রতনা ঙসি ফোঙখিবা লোয়ালমগী মপাউ হায়রিবা লাইরিক অসিগী মতাঙদা ঙাঙখি অদুগা সাহিত্য একাদেমিগী ত্রান্সলেসন এৱার্দি সলাম তোম্বনা ঙসি ফোঙখিবা খোঙ্গুল হায়রিবা লাইরিক অসিগী মতাঙদা ৱা ঙাঙখি। ঙসিগী থৌরম অদুদা নামৈরাকপম চান্দেশ্বর (কামেশ্বর) নীংশিং সাহিত্য মনাগী দোনর এক্স-এম এল এ নামৈরাকপম লোকেনসু শরুক য়াখি।

সোর্স: পোক্নফম