image

নিংথৌ লৈশেম্বা সনাজাওবনা সনাগী নিংশিং শগাই লোইশঙ মরি শঙ্গাখ্রে

ইম্ফাল, অক্টোব ১৯ : লাইনিংথৌ সনামহি টেম্পল বোর্দ, হয়িং খোংবান, উফোং য়ুম্ফম, ইম্ফালনা শীন্দুনা ‘সনাগী নিংশিং শগাই’ শঙ্গাবগা লোয়ননা নৌনা শেমজিল্লবা টেম্পল বোর্দ অসিগী লোইশঙ মরি, অমাইবা, অমাইবী, পেনা অমসুং উমংলাই লোইশঙ ঙসি এমপি রাজ্য সভা, নিঙথৌ লৈশেম্বা সনাজাওবনা ইনোগুররেসন তৌখ্রে।

হয়িং খোংবান্দা লৈবা লাইনিংথৌ সনামহি টেম্পল বোর্দকী কমপ্লেক্সতা পাঙথোকখিবা থৌরম অদুগী কিনোট এদ্রেস পীরদুনা মেম্বার সেক্রেটারি এলএসতিবি, মাইস্নাম শিবদত্ত লুৱাংনা হায়, মেরা নোংমা পানবদগী থাবুম অমা চুপ্না চত্থরকপা থৌরমগী মনুং চন্না ঙসি য়াইফরবা নুমিৎ অসিদা সনামহি লাইনিং চৎলিবসিগী অথোইবা লাইনিংকোল ওইরবা হয়িং খোংবান উফোং য়ূম্ফম অসিবু মপুং ফাহন্নবা হোৎনবদা অচৌবা থৌগাই লৌবীরম্বা লাইওইখ্রবা অহল লমনশিংবু নিংশিংবা অমদি ইকায়খুম্নবা উৎপগা লোয়ননা অপুনবা শক্তম অমা শাগৎনবগী পান্দমদা ‘সনাগী নিংশিং সগাই’ হায়না মীংথোনবা শঙলেন অসি মীয়ামদা খুৎশিন্নবনি।

লাইওইখ্রবা অহলশিংগী ৱারি লিখুল য়াওবা শক্তমগা লোয়ননা শঙলেন অসি হাংদোক্কনি হায়খি। সনাগী নিংশিং শগাই অসিদা লৈতেংলিবশিংগী মনুংদা ইনিংথৌ কুলচন্দ্র, হান্নগী চীফ মিনিষ্টর য়ংমাসো শৈজা অমদি লনাই মীওই অমগী মখুৎতগী লাইফম্লেন অসিদা লাই পুরক্নবা হোৎনবদা থৱায়না পোন্থা পীখিবা অথোইবা মীওই অনি ওইনামদগী ওইনাম চাওবা অমদি হৈঙাংদগী হৈস্নাম কুমার মঙাং লাইনিংথৌ সনামহি বোর্দকী অহানবা প্রেসিদেন্ট ওইরম্বা ডা: লৈশাংথেম চন্দ্রমনি অমদি বোর্দকী থৌগাই কয়া পুরম্বা লাইওইখ্রবা অহলশিং অমদি লাইশং অসিগী লাইওইখ্রবা মাইবরেলশিংগী শক্তম য়াওরি।

অহানবগী ওইনা বোর্দনা ফংবা রেকোর্দ খরগী মতুংইন্না শক্তমশিং মফম অসিদা থম্বনি মখা তানা অহেনবা শক্তমশিং থম্নবগী থৌরাং তৌরি। শঙলেন অসি শঙ্গাবগা লোয়ননা নৌনা শেমজিল্লবা টেম্পল বোর্দ অসিগী লোইশঙ মরি উমংলাই অমাইবা, অমাইবী অমদি পোন লোইশঙ অসিসু শঙ্গাবনি হায়না ফোঙদোকখি।

এমপি রাজ্য সভা, নিঙথৌ লৈশেম্বা সনাজাওবনা থৌরম অদুগা মরী লৈননা ফোঙদোকখিবদা লাইনিংথৌ অসি অতোপ্পা মফম লৈরম্মী। মসি য়াম্না ৱানা মফমসিদা পুরক্নবা হোৎনবদা অচৌবা থৌদাং লৌখবা অহল লমনশিংদুবু ইকায়খুম্নবা মখোয়গী মফমদা তৌবীমল খঙবা উৎপা ওইনা মখোয়গীদমক্তা ম্যুজিয়ম অমা থম্লগা মখোয়গী অয়েকপম ফোটো মুর্তিনচিংবা থম্লগা মীয়ামদা শক্তাকপা ওইনা শঙ্গাবনি।

মফম অসিদা লৈরিবা অমাইবা, অমাইবী, পেনা লোইশঙ উমংলাই লোইশঙগী করম্না তৌই হায়বনচিংবা মশক তাকপা মখোয়গী ফিরোলশিং থশ্বা লোইশঙ অসিসু ঙসি শঙ্গাবনি। ঙসিগী থৌরম অসি য়াম্না পুক্নিং থৌগৎনিঙাই ওই ইপানাৎ ইপুনাৎকী লিক্লমদা লাকপা অদুগা ইপানৎ ইপুনাৎকী হিঙ্গৎ ঈহৌদা অচৌবা থৌদাং লৌবীরম্বা অদুগুম্বা লাইওইখ্রবশিংবু ইকায়খুম্নবা ফংবসি য়াম্না লাইবক ফবনি হায়খি। থৌরম অদুদা চিয়ারমেন পিদিএ অমদি ভাইস প্রেসিদেন্ট, লাইনিংথৌ সনামহি টেম্পল বোর্দ, লৌরেম্বম রামেশ্বর মীতৈ অমসুং ফোর্মার মিনিষ্টার আরভি মিংথিংসু শরুক য়াখি।

সোর্স: সঙাই এক্সপ্রেস

0 কমেন্ট:

কমেন্ট তৌবিয়ু

আপনার ইমেইল ঠিকানা প্রচার করা হবে না. প্রয়োজনীয় ক্ষেত্রগুলি চিহ্নিত করা আছে *

পাউ অতৈসু