নামব্রম শংকরগী শৈরেং অনী
থম্মোয়গি ইনবক্স
থম্মোয়গি ঙাল্লবা ইনবক্স পিক পিক থনখি
নঙগি শুহ্মৎলবা নুংশি পাউজেল ময়াম্না,
নিক নিক লাউরবা নুংশি ৱাহৈগি অমৃত
শিন্থদুনা চোৎখি থম্মোয়গি শুমাং হিংগোন।
নিংশিংলি মীকুপ্তো
নুংশিরবা মঙলান্দো
কাউঙমদ্রবা তঞ্জাদো।
লেপ্তনা চেল্লিবা মতমগি অমুবা কোমদো
প্রেক প্রেক তেক্থখি ফজখ্রবা ৱাখালশিং
লৈরা লৈরা হুর হুর পুত্থখি নুংশিবা ময়াম।
অদুঙৈ শিন্থখিবা নুংশিবগী অমৃত ময়াম
খ্রক খ্রক লাউনা চকৃং ওইনা নপ্না লৈরে
থোৎলবা নৌরবা ঐগী থম্মোয়গি মঙ্গোন্দা।
মেরা’থা লাক্লে
হিয়াংগৈসু লাক্কনি
মথং মথং অমুক
শজিবু – কালেন।
নোংজু থাগি নোংদা চোৎলগনি অমুক
চকৃং কানা লৈরবা কল্লবা নুংশিবা ময়াম,
শিন্থরগনি নুংশিবগী মচু নাইরবা অমৃত
নিক নিক লাউরনি নুংশি নুংশি ৱাহৈশিং
পিক পিক থল্লনি অমুক থম্মোয়গি ইনবক্স।
লমন
(জননেতা হিজম ইরাবতকী মপোক নুমিৎতা)
মীয়োইবগী পুন্সিগী মহৈ য়ালহৌরবা
অথোইবা নঙগী লমন
ঐখোয়না করম্না শিংজগনি ?
নঙনা মাঙ য়ান্না চৎলম্বা লম্বী
হৌজিকসু শেংবা লেপ্ত্রি
নঙনা খোইরম্বা সনাগী লবুক্তা
শম্বোত খোইরী লেপ্তনা
নঙনা তাকপিরম্বা পুন্সিগী মন্ত্র
মুরুম মুরুম শোল্লি ঙসিসু
নঙগি মঙালনা ঙাল্লিবা থাউমৈ
মঙাল শন্দোক্লি তত্তনা
য়ুম খুদিং
খুল খুদিং
মৈতৈ খুদিং
নঙগী খোঙ্গুল লৈরম্মি
ঢাকাগী ‘পোগোজ’ স্কুলগী মঙ্গোনদা
খুৎফম লৈরম্মি ফকলাংগী চেক, ডেক্স-বেঞ্জতা
নঙগী খোঙ্গুল কদায়দা তারমদে?
নিংথৌ কোনুং, মন্দোপকী সংর্কীত্তণ
শৈরেংগী লৈকোল, লানফম, পুন্সি ঈশৈগী সুর,
সুরমা মপাল, সিলেটকী কৈশুম শঙ…
নঙগী লমন ঐখোয়না করম্না শিংজগনী ?
নঙনা খোংথারম্বা লম্বী, তাকপিরম্বা ঈশৈ
নঙনা থানবিরম্বা থাউমৈগী মঙাল
মীয়োই পুকনিং খুদিং শন্দোকচবা নত্তনা।
0 কমেন্ট:
কমেন্ট তৌবিয়ু