ত্রিপুরাগী লময়ানবা কমলজিৎকী ১০০ শুবা মপোক কুমওন পাঙথোক্কনি
ইম্ফাল, ওক্টোবর ১৫ : সাহিত্য থৌপাং লূপ (সাথৌলূপ) না মণিপুর গবর্নমেন্তকী দিরেক্তোরেত ওব ইনফোর্মেসন এন্দ পব্লিক রিলেসন্স, রাজর্ষি ভাগ্যচন্দ্র কলচরেল ফাউন্দেসন মণিপুর অমসুং মণিপুরী সাহিত্য পরিষদ ত্রিপুরাগা খূৎশম্নরগা ত্রিপুরাগী লময়ানবা রাজকুমার কমলজিৎ সিংহগী ১০০ শুবা মপোক কুমওনগী থৌরম অমা লাক্লিবা ওক্তোবর ২০গী নুংথিল পূং ১ তাবা মতমদা দি আই পি আরগী ওদিতোরিয়মদা পাঙথোক্কনি হায়রি।
থৌরম অসিদা মণিপুর গবর্নমেন্তকী আর্ত এন্দ কলচরগী কম্মিস্নার এম জয় সিংহ (আই এ এস) না চীফ গেস্ত ওইদুনা মৈরা চুখৎতুনা হৌদোক্কনি। আর কে কমলজিৎকী মফমদা লৈ-শু কত্তুনা হৌদোক্কদৌরিবা থৌরম অসিদা মণিপুরী সাহিত্য পরিষদ ত্রিপুরাগী প্রেসিদেন্ত লাঙ্গোলজম বীরমঙ্গল সিংহ অমসুং রাজর্ষি ভাগ্যচন্দ্র কলচরেল ফাউন্দেসনগী ভাইস প্রেসিদেন্দ গুরুময়ুম রঞ্জিৎ শর্ম্মানা গেস্ত ওব ওনর ওইগনি লোয়ননা সিহত্য একাদেমি এৱার্দি শরতচান্দ থিয়ামনা প্রিসাইদ তৌগনি হায়রি।
আর কে কমলজিৎকী মরমদা ইবা লাইরিক অমসু নুমিৎসিদা ফোঙগনি। থৌরম অসিগীদমক মণিপুরী সাহিত্য পরিষদ ত্রিপুরাগী প্রেসিদেন্ত এল বীরমঙ্গলগা লোয়ননা ত্রিপুরাগী মীওই তরেৎনা শরুক য়াবা লাক্কনি। ৱাংখেম বীরমঙ্গল, আর কে তরুঞ্জিৎ, শীজ মলিনা, মিনা দেবী, কেএসঐচ মাধবী, তিঐচ সোভনা দেবীনচিংবনা শরুক য়াবা লাক্কদৌরিবা থৌরম অসিদা আর কে কমলজিৎকী মরমদা মুতুৱা বাহাদুর, দব্লিউ বীরমঙ্গল অমসুং আর কে তরুঞ্জিৎনা ৱা ঙাঙগনি।
থৌরম অসিগী শরুক অমা ওইনা এ আই আর ইম্ফালগী স্তেসন দিরেক্তর ওইরম্বা দিলিপ ময়েংবমনা চেয়ার লৌদুনা শৈরেং শৈদিন্নবগী থৌরমদা ত্রিপুরা অমসুং মনিপুরগী অইবা ৩০ রোম্না মশা মশানা ইবা শৈরেংশিং পাথোক্কনি হায়রি।
ত্রিপুরা লমদমদা লময়ানবা অমা ওইনা ঙসি ফাওবা শক্না শোন্নরিবা আর কে কমলজিৎ সিংহ, আগরতলাদা ইং ১৯২৪ গী আগস্ত ৮ দা পোকখি। মহাক ত্রিপুরা তেরিতোরিয়েল কাউন্সিলগী মতম অমসুং ত্রিপুরা লেজিসলেতিব এসেমব্লিদা এম এল এ ওইরমখি। শান্তিনিকেতন দা ইহান হানবা মণিপুরী জগোয় তম্বীখিবা গুরু আর কে বুধিমন্তগী মরিশুবা মচানুপা অমা ওইরিবা কমলজিৎনা ত্রিপুরাদা মণিপুরী সাহিত্য পরিষদ লিংখৎপদা মাংজিন থাখি লোয়ননা অহানবা সেক্রেতরিসু ওইখি।
হাক্না এসোসিয়েত এদিতর ওইদুনা ইং ১৯৪৭ তগী খোঞ্জেল কৌবা মণিপুরী মেগাজিন অমা ইহান হান্না ফোঙবা হৌখি। মহাক্না ফাউন্দর এদিতর ওইদুনা নোর্থ ইস্ততা অহানবা ওইনা ইং ১৯৬৯ দগী চয়োলগী চেফোঙ ‘মরুপ’ ফোঙবা হৌখি। মহাক্না লাইরিক কয়াসু ইদুনা ফোঙলম্মী। পনবা য়াবা খরদি ত্রিপুরাগী মৈহৌরোলদা মৈতৈ, ত্রিপুরা বিজয় (তখেল ঙম্বদগী বাংলাদা হন্দোকপা) অসিনচিংবনি।
সোর্স: পোক্নফম
0 কমেন্ট:
কমেন্ট তৌবিয়ু