জুদো মিক্স টিমদা মণিপুরনা গোল্ড অদুগা নুপা ফুটবোলদনা সিলভার লৌবা ঙমখ্রে
ইম্ফাল, নভেম্বর ০৮ : গোৱানা য়ূম্বু ওইদুনা হৌজিক-হৌজিক চত্থরিবা ৩৭ শুবা নেসনেল গেমসকী ওেইনা ঙসি তোঙান-তোঙানবা দিসিপ্লিনশিংদা মণিপুরগী শান্নরোয়শিংনা গোল্ড মেদল অমা অমসুং সিলভার মেদেল অমা লৌবা ঙমখ্রে।
জুদো মশান্নগী ওইনা মিক্স টিমদা মণিপুরনা গোল্ড মেদল লৌবা ঙমখিবনি। মিক্স টিমদা য়াওরিবা মণিপুরগী নুপা শান্নারোয়শিংনা কেজি ৭৩ গী কেটগোরিদা এল জগদিশ, কেজি ৯০ গী কেটেোরিদা টি ঐচ নিংথেম্বা অমসুং কেজি ৯০ মথক্কী কেটগোরিদনা ঐচ বিরকমলনি। অদুগা নুপীগী শান্নরোয়শিংনা কেজি ৫৭ কী কেটগোরিদা ঐচ সোভাশিনী, কেজি ৭০ গী কেটগোরিদা টি ইনুংঙানবী অদুগা কেজি ৭০ মথক্কী কেটগোরিদনা এল রোশনীনি।
ঙসিগী গোল্ড মেদল অসি থারগা জুদো মশান্নগী ওইনা মণিপুরগী শান্নরোয়শিংনা পূন্না গোল্ড মেদল ৫, সিলভার মেদল ২ অদুগা ব্রোঞ্জ মেদল ২ পূন্না মেদল ৯ লৌবা ঙমখি। হান্না মেদল লৌখ্রবশিংদি নুপাগী কেজি ৬৬ কী কেটগোরিদা এল জগদিশ (গোল্ড), নুপীগী কেজি ৪৮গী কেটগোরিদা এল সনাতোম্বী (গোল্ড), কেজি ৭০ গী কেটগোরিদা টি ইনুংঙানবী চনু (গোল্ড), কেজি ৭৮ গী কেটগোরিদা এম ইন্দুবালা (গোল্ড), কেজি ৪৮গী কেটগোরিদা এল মোনালিসা (সিলভার), কেজি ৬৩ গী কেটগোরিদা ঐচ সুনিবালা (সিলভার), কেজি ৫২ গী কেটগোরিদা এন সর্দা (ব্রোঞ্জ), কেজি ৬৩ গী কেটগোরিদা আই কল্পনা (ব্রোঞ্জ) নি।
অমরোমদা, ঙসি সার্ভিসেস অমসুং মণিপুরগী মরক্তা শান্নখিবা নুপাগী ফুটবোল ফাইনেল মেটচতা সার্ভিসেসনা মণিপুরবু পাঞ্জল ৩-১ দা মায়থীবা পীরমখ্রে। টিম অনীগী মরক্তা শান্নখিবা মেটচ অদুগী হৌগৎলকপদগী সার্ভিসেসকী টিমনা বোল হেন্না পায়দুনা খরা লাকচনা শান্নবা ঙমখিবদগী মেটচ অদুগী ১৩ শুবা মিনিটতা জার্সি নম্বর ৮ মিদফিল্ডার খৃষ্টোফার কামৈনা মণিপুরগী মায়কৈদা মেটচ অদুগী অহানবা পাঞ্জল চনবা ঙমখিবদগী অহানবা হাফ লোইবা ফাওবদা সার্ভিসেসনা পাঞ্জল ১-০ মণিপুরদগী মাংজিল থানা লৈবা ঙমখি।
অনীশুবা হাফতা মণিপুরগী শান্নরোয়শিংনা য়াম্না কন্না হোৎনদুনা মখোয়গী মায়কৈদা চনশিনখিবা পাঞ্জল অদু হন্দোক্নবা শান্নখি। মদুনা মরম ওইরগা মেটচ অদুগী ৪১ শুবা মিনিটতা মণিপুরগী জার্সি নম্বর ৬ মিদফিল্ডাল ফিজম সনাথোই মীতৈনা ইক্কেলাইজর ওইরিবা পাঞ্জল অদু চনবা ঙমখি। মখা তানা শান্নখিবদা টিম অনীমক্কী শান্নরোয়শিংনা হৈ-শিংবা মান্ননা কৃক-কৃক ইন্ননা শান্নখি। মদুনা মরম ওইরগা অমনা অমগী মায়কৈদা পাঞ্জল চন্নবা হোৎনখিবশিং মায় পাকপা ঙম্নখিদে। অদুম ওইনমক সার্ভিসেসকী টিমনা মেটচ অদুগী ৬২ শুবা মিনিটতা খঙহৌদনা চত্থরকখিবা এটেক অমা মণিপুরগী জার্সি নম্বর ১৫ দিফেন্দর সোইবম অভিনাশনা থিংনবা হোৎনবদা শোয়বদগী মশাগী মায়কৈদা পাঞ্জল অমা চনশিনখি। মদুনা মরম ওইরগা সার্ভিসেস পাঞ্জল ২-১ দা মাংজিল থানা লৈবা ঙমখি।
মণিপুরগী মায়কৈদগী পাঞ্জল অদু হন্দোক্নবা য়াম্না কন্না হোৎনরবসু মায় পাকপা ঙমখিদে। অমরোমদা, মেটচ অদুগী অনীশুবা হাপকী ইঞ্জ্যুরি টাইম শান্নখিবদা সার্ভিসেসকী বিকাশ থাপানা মখা তানা পাঞ্জল অমগা অমুক চনবা ঙমখিবদগী মেটচ অদু সার্ভিসেসনা পাঞ্জল ৩-১ দা মায় পাক্তুনা নুপা ফুটবোল টিমগী গোল্ড মেদল লৌবা ঙমখিবনি। অদুগা মণিপুরগী টিমনা সিলভার মেদল লৌখিবনি। ঙসি শান্নখিবা মেটচ অদুগী মেটচ কম্মিস্নরনা আদলির থোমাস দি ক্রুসনা ওইখি।
সোর্স: হুইয়েন লানপাউ
0 কমেন্ট:
কমেন্ট তৌবিয়ু