• 332
• ১৬ই জুলাই ২০২৫ ইং
• Share on:

ইংলিশতা হন্দোকপা ‘হেমাম নিলমণি’ ফোঙখ্রে

ইম্ফাল, জুলাই ১৫ : কিয়াম তম্পাকলৈমা দেবীনা মণিপুর লোলদা ইবা ‘হেমাম নিলমণি’ গী ইংলিশ লোলদা নোংমাইথেম কিরনকুমার সিংহনা হন্দোকপা লাইরিক অমা থা অসিগী ১৪ দা নিউ দিল্লীগী পিতম্পুরাদা লৈবা ভারত বিকাস পরিষদকী ভবন্দা ফোঙখ্রে।

হেমাম নিলমণি এ দেদিকেতেদ লিদর হায়না মিংথোনবা লাইরিক অদু ভারত বিকাস পরিষদকী নেসনেল ওর্গানাইজিং সেক্রেতরি সুরেশ জেননা লূচিংদুনা ফোঙখি।

হেমাম নিলমণিনা মণিপুর ফ্রীদম ফাইতর অমা ওইনা ইন্দিয়াগী নিংতম্বগী লান্দা য়াম্না মরু ওইবা থৌদাংশিং লৌখি। ইন্দিয়ান নেসনেল আর্মি (আই এন এ) গী কত্থোক্লবা মেম্বর অমা ওইনা নেতাজি সুভাস চন্দ্র বোসকী মখাদা ৱার্ল্ড ৱার-২ গী মতমদা ইন্তলিজেন্স, ওর্গানাইজিং সপ্লাইনচিংবদা থৌদাং য়াদুনা লৈবাক্কীদমক পুন্সি থাদোকপা পামুখিদে। মহাক্কী মরৈবাক নিংবগী থৌদাংশিংনা বৃতিশনা মহাকপু ফাদুনা জেলদা থমখি। ইন্দিয়ানা মনিং তম্লবা মতুঙদা মহাক মণিপুরগী দিপুতি এদজুকেসন মিনিস্তর ওইদুনা স্তেত অসিগী ফাউন্দেসনেল এদজুকেসনেল ইনস্তিত্যুসন কয়া লিংখৎপদা মাঙজিল থাখি।

লাইরিক অসিবু হন্দোক্লিবা নোংমাইথেম কিরনকুমার সিংহ, শকখঙনরবা শৈরেং ইবা, ঈশৈ ইবা, ত্রান্সলেতর অমসুং ফ্রীলান্স রাইতরনি। মহাক সাহিত্য একাদেমি নিউ দিল্লীগী মণিপুর লেংগ্বেজ এদভাইজরি বোর্দকী কনভেনর ওইরম্মী। মণিপুরী লিতরেরি সোসাইতিগী থংনবা তার্ম অনীরক প্রেসিদেন্ত ওইরম্মী লোয়ননা হৌজিক্না দিরেক্তরেত ওব লেংগ্বেজ দিবেলপমেন্ত এন্দ ইমপ্লিমেন্তেসন মণিপুরগী লেংগ্বেজ এদভাইজরি বোর্দকী মেম্বর ওইরি।

সোর্স: পোক্নফম