বাংলাদেশতা শজিবু লিকোন টুর্নামেন্ট ২০২৬ অমসুং কাং টুর্নামেন্ট ২০২৬ হৌদোকখ্রে
সিলেট, এপ্রিল ১৮ : সিলেটতা অহানবা ওইনা শিবগঞ্জ নুপী লুপনা শিল্লাংদুনা শজিবু লিকোন টুর্নামেন্ট ২০২৬ মায় পাকনা হৌদোকখ্রে। ঙরাং ইরাই নুমিৎ, এপ্রিল ১৭ সিলেট সিটিগী শিবগঞ্জ লৈকাইগী শ্রীশ্রী রাধাকৃষ্ণ জগবন্ধু বিগ্রহ মন্দির মান্ডপতা পাংথোকখিবা টুর্ণামেন্ট অদুদা চীফ গেষ্ট ওইনা বাংলাদেশ সরকারগী মিনিস্ট্রি ওফ লেবর এন্ড এম্প্লোয়মেন্ট অমসুং মিনিস্ট্রি ওফ এক্সপাট্রিয়েটস ওয়েলফেয়ার এন্ড ওভারসিস এম্প্লোয়মেন্ট কী ওনারেবল মিনিস্টার আরিফুল হক চৌধুরীনা হৌদোকপিখি।
পনবা য়াবদি টুর্নামেন্ট অসি সিলেট শিবগঞ্জ লৈকাইগী নুপি লুপনা শিল্লাংবনি। সিলেট সিটি মনুংদগী লৈকাইশিংদগী ১৮ টিম শরুক য়াখি। টিম ৩ না গ্রুপ ৬ খাইদোক্তুনা শানখিবা অহানবা রাউন্ডদগী চ্যাম্পিয়ন ওইনা টিম তরুক্না কোয়ারটার ফাইনাল কাখ্রে। ইরাই খুদিংগী শান্নবা টুর্নামেন্ট অসিগী ফাইনাল মে থাগী তাং ১ দা শান্নগনি।
থৌরম অসিদা মীথুংলেন ওইনা শরুক য়াখি বাংলাদেশ হিন্দু কল্যান ট্রাস্টকী ট্রাস্টি সুদিপ রঞ্জন সেন বাপ্পু, সিলেট এমএজি ওসমানি মেডিকেল কলেজ হাসপাতালগী ইউরোলজী ডিপার্টমেন্টকী হেড ওইবিরম্বা প্রফেসর ডাঃ প্রমোদ রঞ্জন সিংহ, শ্রীশ্রী রাধাকৃষ্ণ জগবণ্ধু বিগ্রহ মন্দির পরিচালনা কমিটিগী প্রেসিডেন্ট মুতুম সুরজিৎ, জেনারেল সেক্রেটারী থোঙাম প্রদিপ সিংহ অমদি সোস্যোল এক্টিভিস্ট এল প্রশান্ত সিংহ, হাওরম্বম বাবলু, লোইচম্বম মিন্টু, মাইস্নাম রাজেশ না চিংবা শক্নায়রবা কয়াসু থৌরম অদুদা শরুক য়াখি।
অমরোমদনা , সিলেট সিটিগী মৈতৈশিংনা খুন্দাবা লৈকায়শিংগী মনুংদা কাং মশান্না অসি শৌগৎপা ওইনা নয়াবাজার মনিপুরী পাড়ানা শিল্লাংদুনা সিলেট মনিপুরী কাং এসোসিয়েশন গী মতেং লৌরগা অহানবা ওজা শগোলশেম বিনোদ মেমোরিয়াল ইন্টার মনিপুরী কাং টুর্নামেন্ট ২০২৬ অসিসু ঙরাংদগী হৌদোকখ্রে।
নয়াবাজার পঞ্চায়েতগী প্রধান খুঞ্জাগী অহল নামব্রাম কৃষ্ণমনি সিংহনা থৌরম মপু অমসুং নামব্রাম শংকরনা কন্ডাক্ট তৌদুনা পাংথোকখিবা হৌদোকপগী থৌরম অদুদা এক্স কাউন্সিলর জনাব হুমায়ুন কবির সুহিন, এক্স কাউন্সিলর জনাব সোহেল আহমেদ রিপন, সিলেট মনিপুরী কাং এসোসিয়েশন গী প্রেসিডেন্ট য়ুমনাম নৃপেন্দ্র সিংহ, টিকেন্দ্রজিৎ, কেএইচ সমেন্দ্র সিংহ, মিয়ার উদ্দিন অমসুং মাসুম আহমেদ য়াওনা শকনাইরবা মীওই কয়া শরুক য়াখি।
টুর্নামেন্ট অসিদা নুপা কাংখুৎ তরা তরেৎ অমসুং নুপী কাংখুৎ নিপান শরুক য়াগনি হায়রি।
0 কমেন্ট:
কমেন্ট তৌবিয়ু