আগরতলাদা নুপীখক্তগী ওইবা নেসনেল সেমিনার অমা পাংথোকখ্রে
আগরতলা, জুলাই ২৬ : ত্রিপুরাগী আগরতলাদা অহানবা ওইনা নুপীখক্তগী ওইবা নেসনেল সেমিনার অমা পাংথোকখ্রে। নোংমাইথেম ফাউন্ডেশন ইম্ফালনা তখেল্লৈ তেঙবাং লুপ ত্রিপুরাগা খুৎশম্নরগা ঙরাং জুলাইগী ২৫, আগরতলা প্রেস ক্লাবতা "টু-ডে নেসনেল সেমিনার ওন রিফ্লেক্টিং রুটস: ত্রিপুরা মণিপুরী উইমেন এন্দ কালচরেল হেরিতেজ" হাইবা হিরমদা সেমিনার অসি হৌদোকখিবনি।
লৈখিদ্রবা শক্নাইরবা স্কোলর নোংমাইথেম তোম্বীগী স্মৃতিদা আগরতলা প্রেস ক্লাবতা পাঙথোকখিবা সেমিনার হৌদোকপগী থৌরমদা লৈমরোল খোর্জৈকোল লৈকোলগী প্রেসিদেন্ত চোংথাম ওংবী সুবদনিনা অথোইবা মীথুং, তখেল্লৈ তেঙবাং লুপকী ভাইস প্রেসিদেন্ত সিজা মলিনানা থৌরম মপু, অদুগা দিএম য়ুনিবর্সিতি ইম্ফালগী হান্নগী মণিপুরী হেদ ওব দিপার্তমেন্ত দাঃ আর কে মুসুকসনা দেবীনা অখন্নবা মীথুং অমসুং সাহিত্য একাদেমি এৱার্দি সোরোকখাইবম গম্ভীনি অমসুং য়েলাম ওংবী কাঞ্চন সিনহানা ইকায়খুম্নবা মীথুংশিং ওইনা শরুক য়াখি হায়রি।
সেসন অহুম থোকনা পাংথোকখিবা সেমিনারগী অহানবা সেসন্দা শক্নাইরবা অইবী ঙাঙোম একাসিনী দেবী, ইম্ফালনা মোদারেতর ওইরগা 'নুপী অমসুং খুন্নাই' হায়বসিগী মথক্তা সিজা মলিনা, খোইবম শৈবা অমসুং কে সরিতানা পেপর পাথোকখি।
অনীশুবা সেসন্দা শক্নাইরবী অইবী মায়া নেপ্রম, ইম্ফালনা মোদারেতর ওইরগা সাহিত্য অমসুং নুপীগী মথক্তা তোঙান তোঙান্না খোইস্নাম ওংবী বীরলা, এল মীনা দেবী, ক্ষেত্রীময়ুম মাধবী অমসুং হিজম বেবীনা পেপর পাথোকখি।
অহুমশুবা সেসন্দা দাঃ সলাম শান্তিবালা দেবী, ইম্ফালনা মোদারেতর ওইরগা 'য়ুমেন, কলচর এন্দ পার্ফোরমিং আর্তস'কী তোঙান তোঙানবা হীরমদা কে এইচ সুদেস্না সিংহ, খুমন্থেম অনিমা, এল আশা সিংহ অমসুং সিজা পুর্নিমানা পেপর পাথোকখিবনি। থৌরম অসিগী মনুং চন্না সাহিত্য একাদেমী মনিপুরী লোলগী এদভাইজরী বোর্দকী মেম্বর খোইসনাম বীরোলানা থাগৎ ৱারোল লান্থোকখি।
থৌরমগী অরোইবদা নোংমাইথেম অনুরাধানা চেয়ার লৌরগা মণিপুর অমসুং ত্রিপুরাগী নুপী খক্তগী ওইবা সৈরেং সৈদিনবগী থৌরম অমা পাংথোকখি হায়না আগরতলাদগী ফংবা পাও অসিনা হায়রি।
0 কমেন্ট:
কমেন্ট তৌবিয়ু