ঐখোয়না অমত্তা ওইনা লেপ্লিমখৈ মনিপুর কায়হনবা ঙল্লোই: এম এল এ ইবোমচা
ইম্ফাল, জুলাই ২৭: ঐখোয়না অমত্তা ওইনা লেপ্লিমখৈ মনিপুর কায়হনবা ঙম্লোই হায়ৱানা লাম্লাই এসেমব্লি কনষ্টিটুএন্সিগী এম এল এ খোংবান্তবম ইবোমচানা ত্রিপুরাগী আগরতলাদা ঙরাং হৌদোকখিবা অহানবা মনিপুরী এনুএল এৱার্দ সেরিমোনিদা ফোংদোকখ্রে।
আগরতলাগী সুকান্ত একাডেমি হোলদা পাংথোকখিবা থৌরম অদু অহানবা ওইনা তখেললৈ তেংবাং লুপ (তখেল লৈমা তেংবাং লুপ) অমসুং মনিপুরী লিটরেরী এন্দ কলচরেল ফোরম, ত্রিপুরা অনীনা পুন্না শীনবনি।
লুপ অনী অসিনা এৱার্দ সেরিমোনি অসি ত্রিপুরাদা খুন্দারিবা মনিপুরী মহৈরোইশিংগী মরক্তা একাডেমিক এক্টিভিটিদা হেল্লবা তেলেন্ত লৈবশিংগীদমক অমদি লায়রবা ইমুংগী মহৈরোইশিংদা পীবা চহী অনী শুরক্লবা স্কোলারশিপ পীবা থৌরমগী মনুং চন্না পাংথোকখিবনি হায়বসু ফোংদোকখি।
মহাক্না হায়, ‘ঐখোয়না অফ—ফত্ত, অপেন—পেন্দা কাউথোক্লদুনা ঐখোয়না অমত্তা ওইনা লেপ্লিবা মখৈ কনামত্তনা মনিপুরবু মচেৎ তাহনবা ঙম্লোয় হায়বগী অচেৎপা থাজবা লৈ। মনিপুরবু নমথদুনা মীয়ামবু ওৎ—নৈনবা চত্থরক্লিবা এক্সতরনেল ফোর্সশিংবু ঐখোয়না পুন্না থেংনমিন্নবা চঙই।’
ত্রিপুরাদা খুন্দারিবা মৈতৈ কাঙলুপকী ইন্ফ্রাষ্ট্রকচর শেমগৎনবা পান্দমদা ত্রিপুরা গবর্নমেন্টনা মৈতৈ গেস্ত হাউস অমা শাননবা লুপা ৭০,০০০ কায়থোক্লক্লিবা অসি অফবা অমনি। মহাক্কী মায়কৈদগীসু পাংবা য়াবা মতেংশিং পাংগনি হায়না এম এল এ ইবোমচানা ফোংদোকখি। থৌরম অদু শীনবদা মতেং ওইনা এম এল এনা লুপা লাখ অমা মতেং পাংখি।
থৌরম অদুদা চিফ গেস্ত ওইনা শরুক য়াখিবা এম এল এ ইবোমচানা হায়খি, ত্রিপুরাদা খুন্দারিবা মনিপুরীশিংনা ঐখোয়গী কলচর অসি ঙাকপা অমদি কনবা ঙম্নবা হোৎনবগদবনি। আসাম অমদি অতৈ মফংশিংদা মনিপুরীশিং মীশীং য়ামজদবা ওইরবসু, শীংনবা কয়া থেংনরবসু ঐখোয়না ঐখোয়গী কলচর অমসুং লিটরেচর অসি শিহনদনব কন্না হোৎনবগদবনি।
ত্রিপুরাদা মনিপুরীশিংনা ঐখোয়গী কলচর অমসুং লিটরেচর ঙাকতুনা লৈরম্বা উবদা এম এল এ ইবোমচানা নুংঙাইবা অমসুং অপেনবা ফোংদোকখি।
মনিপুরগী হৌজিক ওইরিবা জিওপোলিটিকেল ক্রাইসিস অসিদা লৈঙাক পায়রিবা বি জে পিগী এম এল এ ইবোমচানা লো শেম্লিবশিংগী পুক্নিং চিংশিল্লদুনা হায়খি, আইদিওলোজিকেল অমদি পোলিটিকেলগী মান্নদবা কয়া লৈরবসু ফুরুপ অসিগী অহাবা তৌগদবা থবক্তি স্তেত অসিবু কনবা হায়বসিনি।
মহাক্না হায়খি, ‘ঐখোয়না কনানা চুম্মী—কনানা লাল্লি, করিনা ফৈ —করিনা ফত্তে হায়বদু খন্নমিন্নগদবনি। ঙসি ইরমদম মনিপুরদা করি থোক্লগদগে হায়বসি হায়বা ঙমদে।’
সাহিত্য একাডেমি নিউ দিল্লিগী মনিপুরী ল্যাঙ্গুয়েজ এডভাইজরী বোর্ডকী মেম্বর খোইস্নাম বীরোলানা প্রিসাইদ তৌখিবা থৌরম অদুদা মনিপুরী সাহিত্য পরিষদ ত্রিপুরাগী প্রসিদেন্ট লাংগোলজম বীরমঙ্গল, মনিপুরী লিটরেরী এন্দ কলচরেল ফোরম ত্রিপুরাগী প্রসিদেন্ট নিংথৌজম বিরা সিং, লৈমারোল খোর্জৈকোল (লৈকোল) মনিপুরগী প্রসিদেন্ট সুবদনী দেবী অমসুং সোসিএল এক্টিভিস্ত এল বীরজিৎনা গেস্ত ওব ওনরশিং ওইনা শরুক যাখি।
থৌরম অদুদা লৈখিদবা রাজকুমার কমলজিৎ সিংহদা তখেল রত্ন এৱার্দ লান্থোকখি। ত্রিপুরাগী ৱাংমদা লৈবা মীশিংদা পীবা বাবুরে তারা মনি মেমোরিএল নেসনেল এৱার্দনা ডি এম ইউনিভার্সিটি ইম্ফালগী মনিপুরী ডিপার্টমেন্টকী হান্নগী হেড রাজকুমারী মুসুকসনা দেবীদা, কলচরেল এক্টিভিস্ত কেএইচ বিজয়লক্ষ্মী দেবীদা এম এল সি এফ লাইফটাইম এচিভমেন্ট এৱার্দ, রাজকুমার ব্রহ্মজিৎ সিংহদা পুখ্রম্বম ইবেয়াইমা দেবী মেমোরিএল এৱার্দ, খুমন্থেম অনিমাদা খোইস্নাম বঙ্গবীর মেমোরিএল য়ং তেলেন্ত এৱার্দ অমসুং বোদিবিল্ডিংগী গোল্ড মেদালিস্ত ডা: বিশাল সিংহদা য়ুথ এক্সেলেন্স এৱার্দ লান্থোকখি।
চহী অসিগী ত্রিপুরাগী হায়র সেকেন্দরি অমসুং সেকেন্দরি এক্সামদা থোইদোক হেন্দোক্না মায় পাক্লবা মহৈরোয় ক্ষেত্রিময়ুম নায়ানিতা অমসুং এন স্নেহাদা খাইদেম নিঙোল সগোলশেম ওংবী অচৌবী দেবী নীংশিং শেলগী মনা, তখেল্লম্বম অনীক দত্তদা একাডেমিক লোরিএত এৱার্দ, তোঙ্গম নীলম সিংহদা ক্ষেত্রিময়ুম নিভা দেবী এৱার্দ, খোইস্নাম মমতা, দবাজিং সিংহ অমসুং এন দেবস্মিতা সিংহদা খোইস্নাম বঙ্গবীর মেমোরিএল একাডেমিক এৱার্দ পীখি।
থৌরমগী অরোইবদা ত্রিপুরা অমসুং জে এন মনিপুর দান্স একাডেমি ইম্ফালগী আরতিস্তশিংনা জগোয় অমসুং থাং-তা খুদোল তমখি।
সোর্স - পোক্নফম
0 কমেন্ট:
কমেন্ট তৌবিয়ু