য়াইরিপোক থম্বালনু সাহিত্য মরুপ কম লাইব্রেরী শাফোঙলকপগী ৩০ শুবা মপোক নুমীৎ থৌরম পাঙথোকখ্রে
ইম্ফাল, জানুয়ারি ০৩ : মণিপুরী খোরিরোলগী লুপশিংগী মনুঙদা মশক নাইবা খোরিরোলগী লূপ অমা ওইনা য়াইরিপোক থম্বালনু সাহিত্য মরুপ কম লাইব্রেরী শাফোঙলকখিবগী ৩০রক শুবা মপোক নুমীৎ থৌরমগা লোয়ননা উশম নিলচন্দ্র নীংশিং খোরিরোল মনা ২০২২ লান্থোকপগী থৌরম অমা ঙসি য়াইরিপোক বিষ্ণুনহাদা লৈবা য়াইরিপোক বেদমিন্টন ইন্দোর ষ্টেদিয়ামদা পাঙথোকখ্রে।
ঙসি পাঙথোকখিবা থৌরম অদুদা ৱাংখেম এ সীগী এম এল এ কৈশাম মেঘচন্দ্রনা অথোইবা মীথুং, য়াইরিপোক থম্বালনু সাহিত্য মরুপ কম লাইব্রেরীগী ভাইস প্রেসিদেন্ট রাজেন্দ্র মতুমনা থৌরম মপু অদুগা খোরিরোলগী লূপ অসিমক লিংখৎখিবা অদুগা লূপ অসিমক্কীসু অথোইবা পাউতাক্লোই ওইরিবা শক্নাইরবা খোরিলাংবা রঘুবির থিয়াম অমসুং সাহিত্য একাদেমী নিউ দিল্লগিী মণিপুরী লেঙ্গুয়েজ এদভাইজরি বোর্দকী কনভিনার নোংমাইথেম কিরনকুমারনা অখন্নবা মীথুংশিং ওইনা শরুক য়াখি।
হন্দক চহীগী ওইনা উশম নিলচন্দ্র নীংশিং খোরিরোল মনা ২-২২ রাজেশ্বরি য়েংখোমনা ইবা অহানবা শৈরেংগী লাইরিক নীংতম্বগী মচুগীদমক রাজেশ্বরি য়েংখোমদা মনা অদু খুৎশিন্নখি। মনা ফংলবী অইবী রাজেশ্বরি য়েংখোম ককচিং লাইথগোল লৈকায়দগী য়েংখোম ধনঞ্জয় অমসুং লৈখিদ্রবী ইবোচাওবীগী মচানুপীনি। মহাক ককচিং ৱাইরি পুঙ পরেংদগী নাওরেম জয়কুমারগা য়ুম্বান লম্বীদা খোঙদামিন্নদুনা সগোলবন্দ খম্লাম লৈরক্তা লৈরি।
মনা অসি য়াইরিপোক থম্বালনু সাহিত্য মরুপ কম লাইব্রেরীগী হৌজিক হৌজিক জেনারেল সেক্রেটারিগী ফম পুরিবা অদুগা শক্নাইরবা ঈশৈ শৈরেংবা নিরঞ্জন উশমনা মহাক্কী লৈখিদ্রবা অপোকপগী মিংদা কৎপনি। মনা অসিদা শেল ওইনা লুপা লিশিং ১০, লেংয়ান ফি অমসুং শকখঙ চে অমমম য়াওরি। লৈখিদ্রবা উশম নিলচন্দ্র কলা সংস্কৃতিদা ঙাওজবা, ঈশৈ পাম্বা, মায়থোং য়াম্বা মীশক অমনি। য়াইরিপোক লমদমদা য়াইরিপোক মোনু লৈমা হোল শাদুনা মীয়ামদা সিনেমা, দ্রামা য়েংনবগী খুদোংচাবা পীবীরমখি। য়াইরিপোক থম্বালনু সাহিত্য মরুপ কম লাইব্রেরীগী পেত্রোন মেম্বার অমসুনি। মহাক কুমজা ১৯৯৯ দা তাইবংপান থাদোকখি।
সোর্স: হুইয়েন লানপাউ
0 কমেন্ট:
কমেন্ট তৌবিয়ু