সাথৌলুপনা হাওরোংবম রাজমনিদা থিয়াম ইবোচৌবী নেসনেল এৱার্দ পীরগনি
ইম্ফাল, সেপ্টেম্বর ২৪ : সাহিত্য থৌপাং লুপ (সাথৌলুপ), না চহি ২/২ লৈরগা পীবা থিয়াম ইবোচৌবী নেসনেল এৱার্দ-২০২২ গী ওইনা হাওরোংবম রাজমনিদা পীরগনি হায়রি। আসামগী কাছার দিষ্ট্রিক্টকী মনুং চন্না লৈবা বনতারাপুরদা শক ১৯৭১ গী ফেব্রুয়ারী ১দা পোকখিবা রাজমনিনা ঙসি ফাওবদা লোল, সাহিত্য, কালচারগীদমক লৌরিবা থৌদাং অসিবু ইকাই খুম্নবা উৎতুনা মনা অসি পীগদবনি।
মনা অসিদা শেল ওইনা লুপা লিশিং ১০, সাইটেসন অমা অমদি লেংয়ান অমা য়াওরি। মনা অসি সেপ্টেম্বর ৩০দা পাঙথোক্কদৌরিবা ইন্টারনেসনেল ট্রান্সলেসন ডেগী থৌরমদা ওল্ড এসেমব্লি মিউজিয়াম এন্ড দা আর্কাইবসকী ওদিটোরিয়ামদা পীগদবনি। ইন্টারনেসনেল ট্রান্সলেসন ডেগা মরি লৈননা মণিপুরী সাহিত্যবু শক্তাকপদা ত্রান্সলেসননা লৌরিবা থৌদাং হায়বা হিরমসিদা মণিপুর য়ুনিভার্সিটিগী মণিপুরী দিপার্টমেন্টদা এসোসিয়েট প্রোফেসার ওইরিবা ডা: চিরোম রাজকেতননা ৱা ঙাংগনি।
লোয়ননা থৌরম অসিদা সাহিত্য একাডেমিগী মণিপুরী এদভাইজরি বোর্ডকী কনভেনর নোংমাইথেম কিরন কুমারনা চিয়ার লৌগনি। থৌরমসিগী অরোয়বদা হিজম ইরাবত, এলাংবম নিলকান্ত, লাইশ্রম সমরেন্দ্র, শ্রী বীরেন অমদি রাজকুমারী মধুবীরনা ইরম্বা শৈরৈংগী ত্রান্সলেসনসু পাথোক্কনি হায়রি।
সোর্স: সঙাই এক্সপ্রেস
0 কমেন্ট:
কমেন্ট তৌবিয়ু